¹ Ekucaleni kwekubusa kwaJehoyiyakhimu indvodzana yaJosaya, leli livi laphuma kuSimakadze, latsi, ² "Simakadze utsi: Mani ebaleni lendlu yami ubese ukhuluma ngawo onkhe emadolobha ase Judiya letele kutodvumisa endlini yami. Memetela onkhe emagama lengikuyale kutsi uwasho kubo. Unganciphisi ngisho linye ligama! ³ Kungenteka balalele, leyo naleyo ndvodza igucuke etindleleni tayo letimbi, ngako ngitahulisa tinyawo mayelana nalesehlakalo lengihlele kusiletsa kubo ngenca yetento tabo letimbi. ⁴ Ngako kumele utsi kubo, 'Simakadzetsi usho loku: Uma ningangilaleli mine kute nihambe ngemtsetfo wami lengiwubeke embikwenu - ⁵ uma ningawalaleli emagama tinceku tami baprofethi lengisolo ngibatfume ngalokungapheli kini- kodwa anikalaleli! - ⁶ ngakoke ngitawukwenta lendlu lena ifane neShilo; ngituwugucula lelidolobha leli libe sicalekiso emehlewni etive tonkhe temhlaba.'" ⁷ Bapristi, baprofethi, kanye nabo bonkhe labantfu bamuva Jeremiya amemetela lamagama endlini yaSimakadze. ⁸ Ngakoke kwenteka kutsi ngesikhatsi Jeremiya sekacedzile kumemetela konkhe Simakadze labekamuyale kutsi akusho kubo bonkhe labantfu, bapristi, baprofethi, kanye nabo bonkhe bantfu lebekabagcinile wase utsi, "Impela utawufa! ⁹ Uprofethe leni egameni laSimakadze watsi lendlu lena itawufana neShilo bese lelidolobha litawushiywa lodvwa, lisale lingenamuntfu?" Ngoba bonkhe labantfu sebakhe sigungu lesimelelene naJeremiya endlini yaSimakadze. ¹⁰ Kwase kutsi tiphatsimandla taJuda taweva lamagama tase tiyenyuka tisuka endlini yenkhosi taya endlini yaSimakadze. ¹¹ Bapristi kanye nebaprofethi bakhuluma netiphatsimandla kanye nakubo bonkhe bantfu. Batsi, "Kulungile kutsi lendvodza ife, ngoba uprofethe lokubi ngalelidolobha, njengobe nitivele ngetindlebe tenu!" ¹² Ngako Jeremiya wakhuluma kuletiphatsimandla nakubo bonkhe labantfu wase utsi, "Simakadze ungitfumele kutsi ngiphume ngitoprofetha lokumelelene nalendlu kanye nalelidolobha, ngisho onkhe lamagama leniwevile. ¹³ Ngako nyalo, yentani tindlela tenu tibe ncono kanye netento tenu, phindze nilalele livi laSimakadze Nkulunkulu wenu kute ngihulise tinyawo mayelana nalesehlakalo lasimemetele lesimelelene nani. ¹⁴ Mine lucobo lwami - bukani mine! - ngisesandleni senu. Yentani kimi lokuhle nalokulungile emehlweni enu. ¹⁵ Kodwa ngempela yatini kutsi uma ningibulala mine, nitawube niletsa ingati lengenacala kini kanye nakulelidolobha kanye nebantfu labahlala kulo, ngobe ngicinisile Simakadze ungitfumile kini kutsi ngimemetele onkhe lamagama etindlebe tenu. ¹⁶ Ngako letiphatsimandla kanye nabo bonkhe labantfu batsi kubapristi nakubaprofethi, "Akulungi kutsi lendvodza ife, ngobe seyimemetele tintfo kitsi egameni laSimakadze Nkulunkulu wetfu." ¹⁷ Ase emadvodza kulabadzala belive asukuma futsi akhuluma nabo bonkhe labantfu bebabutsene ndzawonye. ¹⁸ Base batsi, "Mikha wase Moreshethi abeprofetha emalangeni aHezekiya inkhosi yaka Juda. Wakhuluma kubo bonkhe labantfu baka Juda watsi, 'Simakadze wemikhosi utsi: Siyoni utawuba yinsimi lelinyiwe, iJerusalema itawuba yindvundvuma yematje bese intsaba yelithempeli iba lihlatsi.' ¹⁹ Hezekiya inkhosi yakaJuda kanye naJuda wonkhe bambulala yini? Akamesabanga yini Simakadze wase ujabulisa buso baSimakadze kute Simakadze ahulise tinyawo mayelana nalesehlakalo lasimemetele kubo? Ngako sitawenta bubi lobukhulu ngetimphilo tetfu?" ²⁰ Kusenjalo kwaba nalenye indvodza leyaprofetha egameni laSimakadze - Uriya indvodzana yaShemiya wase Kiyathi Jeyalimu - naye waprofetha amelelene nalelidolobha kanye nalendzawo, avumelana nawo onkhe emagama aJeremiya. ²¹ Kodwa ngesikhatsi iNkhosi Jehoyiyakhimu kanye nawo onkhe emasotja akhe netiphatsi mandla beva livi lakhe, yase inkhosi yetama kubabulala, kodwa Uriya weva futsi wesaba, ngako wabaleka wase uya eGibhithe. ²² Yase Inkhosi Jehoyiyakhimu itfumela emadvodza kutsi aye eGibhithe- Elinathana indvodzana ya-Akbho kanye nemadvodza kutsi aye eGibhithe alandzele Uriya. ²³ Batsatsa Uriya bamkhiphela ngaphandle kweGibhithe base bamuletsa eNkhosini Jehoyiyakhimu. Wase Jehoyiyakhimu umbulala ngenkemba waphindze watfumela sidvumbu sakhe emathuneni eluntfu nje. ²⁴ Kodwa sandla sa-Ahikhamu indvodzana yaShafani beyinaJeremiya, akanitwanga etandleni tebantfu kute bambulale.