¹ ''Kodvwa wena, ndvodzana yemuntfu, titsatsele sitini sakho bese usibeka embikwakho. Bese udvweba lidolobha laseJerusalema kuso. ² Yakha tindvonga tekuvimbetela, wakhe lutsango lekulivimbetela. Umise tinkambu eceleni kwalo. Bese ufaka imigcala yekulibhidlita ilitungelete. ³ Ubobese utitsatsela lipani lensimbi ulisebentise lube ngatsi lubondza lwensimbi emkhatsini wakho nelidolobha bese uyagucuka uyalibuka, liyawube selivimbetekile, futsi uyawulivimbetela. loku kuyawuba sibonakaliso kuyo indlu yaka Israel. ⁴ Ubobese sewulala ngemhlubulo wakho wesencele bese ubeka sono sendlu yaka Israel etikwakho; utawetfwala tono tabo tilingane nemalanga lotawulala ngawo ngalomhlubulu wesencele lovimbetele indlu yakaIsrael. ⁵ Mine cobo lwami nginiketa kuwe lilanga linye kumelela umnyaka ngamunye wekona kwabo:emalanga langu -390! Ngalendlela, utawetfwala sono sendlu yakaIsrael. ⁶ Utawutsi nase ucedze lamalanga lawa, uphindze ulale phansi kwesibili ngemhlubulo wakho wangasekudla, ngobe utawetfwala sono sendlu yakaJuda emalanga langu-40. Ngikuniketa lilanga linye umnyaka umunye. ⁷ Gucula buso bakho ububhekise eJerusalem letungeletelwe, kanye nemkhono wakho lombulelwe kuprofetha umelane nawo. ⁸ Ngoba naka! Ngitakubopha khona ungeke ukhone kugucuka ngalomhlubulo uyekulomunye kuze ucedzele lamalanga akho ekuvimbetela. ⁹ Titsatsele kolo, nebhali, emabhontjisi, tinhlumaya, nemabele, kanye nesipileti; ukufake esitjeni sekuphatsa lesisodvwa bese utentela sinkhwa sihambelane nalenombolo yemalanga lotawulala ngawo ngalomhlubulo wakho. Utosidla -390 wemalanga. ¹⁰ Lokudla lotakudla kutabe kukaliwe, emashekele langemashumi lamabili ngelilanga, phindze utasidla ngesikhatsi lesibekiwe ngelilanga. ¹¹ Utawubese unatsa emanti, lakaliwe kutsi abe yihhafu yelitha, utawubese uyawanatsa esikhatsini lesibekiwe. ¹² Utakudla njenga mawudla licebelengwane lesinkhwa, kopha ukupheke ngemasimba ebantfu embikwebantfu babuka!'' ¹³ Ngobe Simakadze utsi, ''Loku kusho kutsi lesinkhwa lesi bantfu bakaIsrael labatasidla sitabe singcolile, lapho emkhatsini wetive lengitabacoshela khona.'' ¹⁴ Kodvwa ngatsi, ''Alasi, Nkhosi Simakadze! Angizange sengitingcolise! Angizange sengidle nobe yini lokwafa ngobe lokwabulawa tilwane, ebusheni bami kuze kube kunyalo, nenyama lengcolile ayizange seyingene emlomeni wami!'' ¹⁵ Manje watsi kimi, ''Buka! Ngikunikete bulongo benkhomo esikhundleni kwemasimba emuntfu khona utopheka lesinkhwa ngawo.'' ¹⁶ Wachubeka watsi kimi, ''Ndvodzana yemuntfu! Naka! Ngitawunciphisa kutfolakala kwekudla eJerusalema, phindze batawukudla kudla lokukaliwe basekhatsatekile bese banatsa emanti sebachachatela. ¹⁷ Ngobe batakweswela sinkhwa nemanti, wonkhe umuntfu utawudvumala ngemnakabo phindze aphelelwe ngemandla ngenca yesono sabo.''