¹ Kwatsi ngemuva kwesikhatsi emaFilisti ahlangana kuyolwa nema-Izrayeli. Akhishi watsi kuDavide, ''Hlala wati kutsi utopuma nami nelibutfo lami, wena nelibutfo lakho.'' ² Davide waphendvula watsi ku-Akhishi, ''Nakusho wena, shotsi sototibonela ngewakho kutsi titfunywaitakho tihlasela kanjani.'' Akhishi watsi kuDavide, ''Nakunjalo shotsi ngitokwenta gadze wami sonkhe sikhatsi.'' ³ Ngesikhatsi Samuweli sekafile, sonkhe sive sema-Izrayeli sasimulilele saphindze samungcwaba eRama, edolobheni lakhe. NaSawula bekacoshe bonkhe bantfu labakhuluma nalabafile nobe labaphengulwako. ⁴ Abese emaFilisti ayahlanganyela benta inkambu eShenumi; naSawula wabutsanisa imphi yonkhe yema-Izrayeli, benta inkambu eGilibhowa. ⁵ Sawula nakabona imphi yemaFilisti, wetfuka, nenhlitiyo yakhe yashayela etulu. ⁶ Sawula wathantaza kuSimakadze acela lusito, kepha Simakadze akamuphendvulanga-hhayi ngemaphupho, nobe i-Urim, nobe baphrofethi. ⁷ Wabese Sawula utsi etisebentini takhe, ''Ngitfoleleni sangoma lesisikati, khona ngitoya kuso ngive ngaso kutsi ngentenjani.'' Tisebenti takhe tamphendvula tatsi, ''Lalela, ukhona umfati e-Endor lotsi usangoma yena.'' ⁸ Ngakoke Sawula waphica umkhondvo, wagcoka letinye tembatfo wahamba, yena nalamanye emadvodza lamabili ahamba naye. Baya kulomfati losangoma ebusuku. Sawula watsi, ''Ngikhulumele nanangu lengitomusho.'' ⁹ Lesangoma saphendvula satsi. ''Khumbula, uyati Sawula wenteni, kutsi uvale konkhe endzaweni kukhuluma nalabafile nobe imimoya. Kepha ke ungitsiyelani, ufuna ngife?'' ¹⁰ Sawula wamtsembisa wafunga kuSimakadze watsi kulesangoma, ''Kusekhona Simakadze, kute sigwebo lotositfola ngaloku.'' ¹¹ Wabese lomfati uphendvula utsi, ''Ngubani lolofuna ngikuvetele yena?'' Sawula waphendvula watsi, ¹² ''Ngivetele Samuweli.'' Kepha watsi lomfati nakabona Samuweli, wakhala wamemeta kakhulu wakhuluma naSawula, watsi. ''Ungiyengeleni? Wena kantsi unguSawula.'' ¹³ Inkhosi yabese itsi kuye, ''Ungesabi. Ubonani?'' Lomfati waphendvula Sawula watsi, ''Ngibona nkulunkulu aphuma emhlabatsini.'' ¹⁴ Sawula wabuta watsi, ''Unjani nawumbuka?'' Waphendvula watsi lomfati, ''Ngibona indvodza lendzala iyeta; igcoke timpulampula.'' Sawula wavele wati kutsi nguSamuweli, wavele wagoba inhloko kumkhomba inhlonipho. ¹⁵ Samuweli watsi kuSawula, ''Ungiphatamiseleni wangivusa?'' Sawula waphendvula, ''Ngihluphekile kakhule, ngoba emaFilisti ayahlanganyela alungisela kungihlasela, naNkulunkulu ungifulatsele akasangiphendvuli, ngeba profethi, nobe emaphupho. Ngakoke ngibite wena, kute ungatise kutsi ngentenjani.'' ¹⁶ Samuweli watsi, ''Yini ke loyibuta kimi, ngoba Simakadze akushiyile, waba sitsa sakho? ¹⁷ Simakadze wente kuwe lebekavele atse utokwenta kuwe. Simakadze ukwemukile bukhosi wabunika lomunye umuntfu-wanika Davide. ¹⁸ Ngoba awukalaleli Simakadze nakhuluma wangaluveti lulaka lwakhe kuma-Amaleki, kungakoke sekakwente loku namuhla. ¹⁹ utokulahlela etandleni temaFilisti wena nema-Izrayeli, futsi kusasa wena nendvodzana yakho nitobe nikanye nami lana. Simakadze utoyekelela imphi yema-Izrayeli yehlulwe ngemaFilisti.'' ²⁰ Sawula wavele wawela phasi emhlabatsini ngaleso sikhatsi etfuke kakhulu ngalokwakushiwo nguSamuweli. Bekete emandla emtimbeni, ngoba bekangakake wadla lilanga lonkhe, nebusuku bakhona. ²¹ Lesangoma seta kuSawula sabona kutsi ukhatsatekile, satsi kuye, ''Ngilalele, sisebenti sakho sesikwentile lolokucelile; ngabeka imphilo yami etandleni takho ngenta lokushoko. ²² Ngalokoke nyalo, ngiyakuncenga, silalele sisebenti sakho lesingumfati, ngivumele ngibeke longakudla embikwakho. Udle kute utoba nemandla nasohamba.'' ²³ Kepha Sawula wala watsi, ''Ngeke ngidle.'' Kepha tisebenti takhe, kanye nalesangoma, tamuphocelela, wabalalela. Ngakoke wavuka phasi wahlala embhedzeni. ²⁴ Lesangoma sasinelitfokati lelalikhuluphalisiwe dvute nendlu yaso; masinyane salibulala lelitfokati; satsatsa fulaha, wakubhucabhuca, wabhaka sinkha lesingenamvubelo. ²⁵ Sakuletsa kuSawula netisebenti takhe, badla. Babese bayasukuma bayahamba ngalobo busuku.