1 Davide wacabanga watsi, ''Ngiyofa ngalelinye lilanga ngibulawa nguSawula; kute lengikuhlalele lana kuncono ngibaleke ngiye eveni lemaFilisti;Sawula utovele adzinwe kungifuna laka-Izrayeli; ngalendlela lena ngitobe ngimubalekele.'' 2 Davide wesuka wewela wahamba, yena nalalamanye emadvodza lamakhulu lasitfupha bekakadze akanye naye, bahamba baya ku-Akhishi indvodzana yaMoyakhi, inkhosi yaseGathi. 3 Davide wahlala na-Akhishi eGathi, Davide nalamadvodza, nemindeni yawo, Davide nebafati bakhe lababili, Ahinoyami umJezreelite, na-Abhigeli umKhameli, umfati waNabhali. 4 Sawula wabikelwa kutsi Davide ubalekile waya eGathe, ngakoke wayekela kuchubeka amugijimise. 5 Davide watsi lu-Akhishi, ''umangabe ngiyatsandzeka emehlweni akho, nginike indzawo kulinye lemadolobha akho lakhona laveni, kutsi ngihlale khona. Sikhona yini sidzingo sekutsi sisebenti sakho sihlale nawe edolobheni linye?'' 6 Ngakoke ngalelo langa Akhishi wamunika iZikilage; kungakoke nanamuhla iZIikilage solo yemakhosi akaJuda. 7 Davide wahlala endzaweni yemaFilisti sikhatsi lesingange munyaka munye netinyanga letine. 8 Davide nelibutfo lakhe beselihlasele tindzawo letahlukahlukene, batsatsa tintfo eGeshumi, temaGezame, nema-Amalekhi; ngoba letive leto ngito betihlala kelendzawo, nawusahamba uya eShur, khashane njenge Gibhithe. Besetihlale sikhatsi lesidze kulendzawo kusukela kadzeni. 9 Davide bekahlasela letindzawo abulale konkhe yindvodza nobe ngumfati. Atsatse wena timvu netinkhomo, timbhongolo, emakamela, netimphahla. Wabese uyajika ubuyela ku-Akhishi. 10 Ngasosonkhe sikhatsi Akhishi bekambuta, ''Ubuya kuyohlasela bani ke namuhla?'' Davide bekaphendvula atsi, ''Eningizimu yakaJuda,'' nobe ''Eningizimu yaseJerameli,'' nobe ''Eningizimu yemaKheni.'' 11 Davide bekangashiyi wena ndvodza nobe umfati aphila latokumikisa eGathi, bekatsi, ''Kute kubebete bufakazi, 'Kutsi Davide bekenta lokwa nalokwa.''' Loku ngulebekakwenta ngasosonkhe sikhatsi asahlala eveni lemaFilisti. 12 Akhishi bekametsemba Davide, atsi, ''Davide sowente sive sami sangenyanya; ngakoke uyohlala angisebentela ingunaphakadze.''