¹ Ngako ke yibani balingisi baNkulunkulu, njengebantfwana bakhe labatsandzekako. ² Futsi nihambe ngelutsandvo, njengobe Khristu asitsandza watinikelela tsine, liphunga lelimnandzi lemnikelo nekutinikela kuNkulunkulu. ³ Kepha akumele kube ngisho nekucabanga nje ngekuphinga kini nome nguliphi luhlobo lekungcola nome umhobholo, ngoba loku akukafaneli kubantfu labangcwele baNkulunkulu. ⁴ Akubete kungcola, kubete kukhuluma bulima, futsi kubete nekwedzelela- konkhe nje lokungakalungi. Esikhundleni kumele kube nekubonga. ⁵ Ngoba ningaba nesicineko ngaloku, kutsi kute ingwadla, kungahlanteki, nome umuntfu longcolile, nome lonemhobholo-longaba nelifa embusweni waKhristu naNkulunkulu. ⁶ Akungabikho namunye lotonikhohlisa ngemavi lalite, ngenca yaletintfo leti lulaka lwaNkulunkulu lwehlela etikwemadvodzana ekungalaleli. ⁷ Ngako ke, ningahlanganyeli nabo. ⁸ Ngoba nake naba bumnyama, kepha nyalo nikukhanya eNkhosini. Hambani njengebantfwana bekukhanya ⁹ (ngoba letitselo tekukhanya ticuketse konkhe lokuhle, kulunga, lokulungile, neliciniso), ¹⁰ bese niyatfola kutsi yini lokutfokotisa iNkhosi. ¹¹ Ningatimbandzakanyi nemisebenti yebumnyama lete titselo, kepha ningamane nitidalule ebaleni. ¹² Ngoba kulihlazo ngisho kutibala letintfo labatenta emasitseleni. ¹³ Kepha uma nome yini lekhanyiswa kukhanya, ibese iyabonakala. ¹⁴ Ngoba nome yini intfo levele ibonakale ikukhanya. Ngako ke kutsiwa, ''Vukani, nine lenilele, nivuke kulabafile, bese Khristu utawukhanya kini.'' ¹⁵ Bukani nicaphelisise kutsi niphila njani-hhayi njengetilima kepha njengalabahlakaniphile. ¹⁶ Nibambisise sikhatsi ngobe emalanga mabi. ¹⁷ Ngako ke, ningabi tilima, kepha condzani kutsi iyini intsandvo yeNkhosi. ¹⁸ Futsi ningadzakwa liwayini, ngoba loko kukuholela ekutiphatseni kabi. Esikhundleni, gcwaliswani ngaMoya Longcwele, ¹⁹ nikhulume nodvwa ngetihlabelelo netingoma tamoya, nihlabele nente umsindvo lomnandzi eNkhosini ngenhlitiyo yenu yonkhe, ²⁰ niletse tibongo ngako konkhe, ngelibito leNkhosi yetfu Jesu Khristu kuNkulunkulu Babe, ²¹ nitfobelane munye ngamunye ngenhlonipho ngenca yaKhristu. ²² Bafati, tfobelani emadvodza enu, njengaseNkhosini. ²³ Ngoba indvodza iyinhloko yemfati njengoba Khristu naye ayinhloko yelibandla, naKhristu cobo lwakhe nguMhlengi walo. ²⁴ Kepha njengelibandla lititfoba kuKhristu, ngalokunjalo ke bafati kumele batfobele emadvodza abo kuko konkhe. ²⁵ Madvodza, tsandzani bafati benu, njengoba Khristu walitsandza libandla futsi watinikelela lona. ²⁶ Khristu watinikela ngenca yelibandla, khona angalenta libe ngcwele, alihlambulule ngesigezo semanti kanye nelivi, ²⁷ khona angahle atetfule yena cobo lwakhe njenge bukhosi, ngaphandle kwelibala nome sici nome nganguyiphi intfo lenjalo, kepha bungcwele futsi ngaphandle kwenkinga. ²⁸ Ngendlela lefanako madvodza afanele kutsandza bafati bawo njengemitimba yawo. Loyo lotsandza umkakhe utitsandza yena. ²⁹ Ngoba kute lonyanya umtimba wakhe, kepha uyawondla bese uwunakekela kahle, ³⁰ ngoba singumtimba wakhe. ³¹ ''Ngenca yalesizatfu lesi indvodza utawushiya uyise nenina bese utawuhlanganiswa nemkayo, futsi laba lababili batawuba nyamanye.'' ³² Leliciniso leli lelifihlakele likhulu-kepha ngikhuluma ngaKhristu nelibandla. ³³ Noko ke, ngamunye wenu futsi kumele atsandze umkakhe njengoba atitsandza yena, futsi nemfati kumele ahloniphe akhe.