¹ Ngako ke, mine, njenge siboshwa seNkhosi, ngiyanincenga kutsi nihambe ngalokufanele lubito lenabitwa ngalo. ² Ngiyanincenga kutsi niphile ngekutfobeka lokukhulu nebumnene nekubeketelelana, nibeketelelane ngelutsandvo. ³ Yentani konkhe lokusemandleni kugcina bunye baMoya ngesibopho sekuthula. ⁴ Kunemtimba munye naMoya munye, njengoba futsi nabitelwa etsembeni linye ekubitweni kwenu. ⁵ Futsi kuneNkhosi yinye, lukholo lunye, umbhabhatiso munye, ⁶ futsi Nkulunkulu munye naBabe wabo bonkhe muntfu, losetikwako konkhe futsi kuko konkhe nakubo bonkhe. ⁷ Kumunye nangamunye wetfu kunikiwe umusa ngekwesilinganiso sesipho saKhristu. ⁸ Kunjengoba umbhalo utsi: ''Watsi nakenyukela etulu, watfumba titfunjwa, futsi wanika bantfu tipho.'' ⁹ Kuchazani kutsi ''wenyuka,'' ngaphandle kwekutsi wehlela futsi ematfunjini ngaphasi kwemhlaba? ¹⁰ Loyo lowehla nguye loyo lowenyuka futsi waya ngetulu kwawo onkhe emazulu, kute kutsi agcwalise tonkhe tintfo. ¹¹ Khristu wapha labanye kutsi babe baphostoli, labanye babe baphrofethi, labanye babe bavangeli, nalabanye babe belusi nalabanye babe bafundzisi. ¹² Wabanika lemisebenti lena kutohlomisa bantfu labangcwele baNkulunkulu emsebentini wekukhonta, kuze kwakhekhe umtimba waKhristu. ¹³ UYachubeka nekwakha umtimba size sifinyelele ebunyeni bekukholwa nelwati lweNdvodzana yaNkulunkulu, nekutsi sikhule futsi sifinyelele kulesilinganiso nekugcwala kwaKhristu. ¹⁴ Khristu uyasakha khona singetuba bantfwana labayishaya emuva naphambili futsi sigujuteliswe magagasi, sipheshulwe ngimimoya yonkhe yetimfundziso tekukhohlisa kwebantfu ebucilini bekwedukisa. ¹⁵ Esikhundleni, khulumani liciniso elutsandvweni, sitokhula ngayo yonkhe indlela kuye loyinhloko, lokungu, Khristu. ¹⁶ Khristu wakha umtimba wonkhe, futsi kuhlanganiswe kwabanjwa kanye kanye ngekwelekelelana kwawo onkhe emalunga, futsi uma lelo nalelo lunga lisebenta kanye kanye, loko kwenta lomtimba ukhule khona utawutakha wona elutsandvweni. ¹⁷ Ngako ke, ngiyasho futsi ngiyacinisa kuloku eNkhosini, kutsi ningasachubeki niphile njengebetive, emicabangweni yabo lelite. ¹⁸ Bahlwelwe ekucondzeni kwabo, bakhashane nemphilo yaNkulunkulu ngenca yekungati lokukubo, ngenca yekucinisa tinhlitiyo tabo. ¹⁹ Bete lihlazo futsi batinikele emanyaleni, futsi bayachubeka benta lonkhe luhlobo lwekungcola. ²⁰ Kepha loko akusiko lenakufundza nga Khristu. ²¹ Ngiyacabanga kutsi nivile ngaye, futsi nafundziswa kuye, njengoba liciniso likuJesu. ²² Nifundzisiwe kukhumula imphilo yakucala, kukhumula umuntfu lomdzala. Ngumuntfu lomdzala lokhohlakele ngenca yetinkhanuko letimbi. ²³ Nifundzisiwe kutsi nivusetelwe kabusha emoyeni yetingcondvo tenu, ²⁴ bese nigcoka umuntfu lomusha lodalwe emfanekisweni waNkulunkulu-ngekulunga lokuliciniso nebungcwele. ²⁵ Ngako ke, yekelani emanga, futsi akutsi nguloyo akhulume liciniso namakhelwane wakhe, ngoba simalunga alomunye nalomunye. ²⁶ Tfukutsela ungoni. Ungalivumeli lilanga lishone usakwatile kwakho. ²⁷ Ungamniki sathane litfuba. ²⁸ Lona bekasolo eba kumele angasebi. Akakhutsale, ente umsebenti lomcokwa ngetandla takhe, khona atoba nelutfo lwekwabelana nalabo labadzingile. ²⁹ Ungavumeli nome nguyiphi inkhulumo lengcolile iphume emlonyeni wakho. Sebentisa emavi lalusito ekwakheni labanye, ngendlela yetidzingo tabo, kute emavi akho atoba lusito kulabo labakuvako. ³⁰ Futsi ningamdzabukisi Moya Longcwele waNkulunkulu, ngoba nabekwa luphawu ngaye kute kube lilanga lekuhlengwa. ³¹ Lahlani yonkhe inzondo, lulaka, intfukutselo, nemsindvo, nekuhlambalata, nalo lonkhe luhlobo lalokubi. ³² Esikhundleni phatsanani ngebumnene, nihawukelane, nicolelane, njengobe Nkulunkulu kuKhristu wanicolela.