¹ Ngalesizatfu saloku, mine, Pawula, ngisiboshwa saKhristu Jesu ngenca yenu nine betive. ² Ngiyacabanga senivile ngemsebenti Nkulunkulu langinike wona wekuletsa umusa Wakhe kini. ³ Ngibhala ngesambulo lenginiketwe sona. Lawa maciniso lafihlakele lengake ngabhala ngawo kafishane. ⁴ Nanifundza ngaloku, nitokhona kucondzisisa kubona kwami ngalamaciniso lafihlakele ngaKhristu. ⁵ Kuletinye titukulwane lamaciniso akazange atiswe kumadvodzana ebantfu. Kodvwa nyalo sembulwe ngaMoya kubaphostoli nebaphrofethi bakhe labehlukaniselwa lomsebenti. ⁶ Lamaciniso lafihlakele ngulokutsi betive batindlalifa, kanye nemalunga kanye natsi emtimba, kantsi futsi sebabahlanganyeli besitsembiso kuKhristu Jesu ngelivangeli. ⁷ Ngoba ngaba sisebenti salelivangeli ngesipho semusa waNkulunkulu lonikwe kimi ngekusebenta kwemandla Akhe. ⁸ Kimi-noma ngabe ngingulomncane kunabo bonkhe labangcwele baNkulunkulu-lomusa nganikwa, kushumayela kubetive umcebo waKhristu longaphenyisiseki, ⁹ khona ngitoletsa ekukhanyeni kuwo wonkhe muntfu licebo-lemfihlakalo leyafihlwa emaphakadzeni kuNkulunkulu, lowadala tonkhe tintfo. ¹⁰ Lelicebo latiswa ngemabandla khona babusi kanye nalabanemandla emazulwini batokwati ngekuhlakanipha lokukhulu kwaNkulunkulu. ¹¹ Loku kwentiwe ngelicebo laphakadze lalifeza kuKhristu Jesu iNkhosi yetfu. ¹² Ngoba kuKhristu sinekuciniseka kanye nemvume lenesibindzi sekuta kuNkulunkulu ngenca yekukholwa kwetfu Kuye. ¹³ Ngako-ke ngicela ningasilahli sibindzi ngenca yekunihluphekela kwami, lokuludvumo lwenu. ¹⁴ Ngalesizatfu ngigoba emadvolo ami kuBabe, ¹⁵ leyetsiwa ngaye yonkhe imindeni ezulwini nasemhlabeni. ¹⁶ Ngiyathandaza kutsi anganinika, ngekwengcebo yeludvumo Lwakhe, kuciniseka ngemandla ngaMoya Wakhe, lokini. ¹⁷ Ngyiyathandaza kutsi Khristu angaphila etinhlitiyweni tenu ngekukholwa, kuze nisime, nisekeleke elutsandvweni Lwakhe ¹⁸ khona nitocondzisisa, kanye nabo bonkhe labangcwele baNkulunkulu, yini lokubanti, lokudze, lokuphakeme, lokushonako, ¹⁹ futsi nati lutsandvo lwaKhristu, lolwendlula lonkhe lwati, khona nitogcwaliswa kube kuphelela konkhe kwaNkulunkulu. ²⁰ Kuye lonemandla ekwenta lokukhulu kakhulu kwalesikucelako noma lesikucabangako, ngemandla Akhe lasebenta kitsi, ²¹ akube kuye ludvumo emabandleni nakuKhristu Jesu etitukulwaneni tonkhe kuze kube phakadze naphakadze. Ameni.