¹ Nani, nanifile ngetimphambuko kanye netono tenu. ² Kwakukukito letimphambuko kanye netono tenu kutsi nake naphila ngetindlela talomhlaba. Naniphila, ngekwembusi wemandla emkatsi, umoya losasebenta kumadvodzana ekungalaleli. ³ Sake sonkhe saphila emkhatsini walabantfu, sifeza tinkhanuko letimbi ngekwemvelo yetfu yesono, siphumelelisa tinkhanuko temitimba kanye netengcondvo. Ngekwemvelo sasibantfwana sifanelwe lulaka lwaNkulunkulu njengabo bonkhe bantfu. ⁴ Kodvwa Nkulunkulu ucebile ngemusa ngenca yelutsandvo Lwakhe lolukhulu lasitsandza ngalo. ⁵ Kwatsi sifile ngetimphambuko, wasenta saphila kanye naKhristu-ngemusa nisindzisiwe. ⁶ Nkulunkulu wasivusa kanye naKhristu wasenta sahlala kanye naye emazulwini kuKhristu Jesu, ⁷ khona ngesikhatsi lesitako angasikhombisa umcebo Wakhe lomkhulu longalinganiseki wemusa lokhonjiswe kitsi ekulungeni Kwakhe kuKhristu Jesu. ⁸ Ngoba ngemusa nisindzisiwe ngekukholwa, futsi loku akukaveli kini, sipho nje saNkulunkulu, ⁹ hhayi emisebentini, khona kutobabete lotibongako. ¹⁰ Ngoba tsine singumsebenti waNkulunkulu, sidalelwe kuKhristu Jesu kutsi sente tento letinhle Nkulunkulu latihlelela tsine kadzeni, khona sitohamba ngato. ¹¹ Ngako-ke khumbulani kutsi nake naba betive ngekwenyama. Nibitwa ''labangakasoki'' ngalokubitwa nge ''kusoka'' ngenyama leyentiwe ngetandla tebantfu. ¹² Ngaleso sikhatsi nanihlukanisiwe naKhristu, tihambi ebantfwini baka-Israyeli, labangatiwa esivumelwaneni sesitsembiso, nite litsemba futsi ningenaNkulunkulu emhlabeni. ¹³ Kodwa nyalo kuKhristu Jesu nine lebenikhashane naNkulunkulu nisondzetwe dvutane ngengati yaKhristu. ¹⁴ Ngoba Nguye kuthula kwetfu. Wenta lababili baba munye. Ngenyama yakhe wabhubhisa lubondza lwekwenyanyana lebelusihlukanisa. ¹⁵ Wacitsa umtsetfo wemiyalo kanye nemisimeto khona atodala umuntfu lomusha Kuye, kube kuthula. ¹⁶ Khristu uhlanganisa bantfu bobabili emtimbeni munye kuNkulunkulu ngaso siphambano, akubulala konkhe lokwenyanyana. ¹⁷ Jesu weta wamemetela kuthula kini nine lebenikhashane kanye nekuthula kulabo labebadvutane. ¹⁸ Ngoba ngaJesu sonkhe sinekungena ngaMoya muye kuYise. ¹⁹ Ngako ke, nine betive anisasibo labangatiwa kanye netihambi. Kodvwa senibembuso kanye nalabangcwele baNkulunkulu futsi ningemalunga emndeni waNkulunkulu. ²⁰ Nakhelwe esisekelweni sebaphostoli kanye nebaprofethi, Khristu Jesu Yena ulitje lelisimisile. ²¹ Kuye sonkhe lesakhiwo siyahlangana futsi siyakhula njengelithemeli leNkhosi. ²² Kukuye futsi kutsi nakhiwe kanyekanye njengendzawo yekuhlala yaNkulunkulu ngaMoya.