¹ Pawula, umphostoli waKhristu Jesu ngentsandvo yaNkulunkulu, kubantfu baNkulunkulu labangcwele e-Efesu, labatsembekile kuKhristu Jesu. ² Umusa kini kanye nekuthula lokubuya ku Nkulunkulu Babe wetfu kanye neNkhosi Jesu Khristu. ³ Shangatsi Nkulunkulu kanye neYise weNkhosi yetfu Jesu Khristu angadvunyiswa, losibusise ngaso sonkhe sibususo sakamoya lesisetindzaweni temazulu kuKhristu. ⁴ Nkulunkulu wasikhetsa Kuye kusukela ekucaleni kwemhlaba, kutsi singaba ngcwele futsi sibe nasici ebusweni bakhe ngelutsandvo. ⁵ Nkulunkulu wasikhetsa nchanti kutsi sibe ngemadvodzana ngaye Jesu Khristu. ⁶ Kufakwa kwetfu esiswini kuveta indvumiso yemusa Wakhe wenkhatimulo lasinike wona mahhala Kuye loyo lamtsandzako. ⁷ KuJesu Khristu sinekuhlengwa ngayo ingati Yakhe kanye nekutsetselelwa kwetono, ngekwengcebo yemusa wakhe. ⁸ Waphuphumisa lomusa kitsi ngako konkhe kuhlakanipha nekucondzisisa. ⁹ Nkulunkulu wasenta sati inhloso yentsandvo Yakhe lefihlakele, ngako lokutfokotisa Yena, ngaloko lakubonakalisa kuKhristu, ¹⁰ akubuke ngeliso lweluhlelo lwekuphelela kwesikhatsi, kutsi aletse tonkhe tintfo kanye kanye, tonkhe tintfo ezulwini kanye nasemhlabeni, ngaphansi kwenhloko yinye, lenguKhristu. ¹¹ KuKhristu sabekwa saba tindlalifa. Sakhetfwa nchanti ngalo lisu laloyo lowenta konkhe ngenhloso yentsandvo Yakhe. ¹² Nkulunulu wasibeka njengelifa khona tsine lesibekucala kutsembela kuKhristu, singaba bekudvumisa bukhosi bakhe. ¹³ KuKhristu, nani futsi, nase nive livi leliciniso, tindzaba letimnandzi ngensindziso yenu, nakholwa kuye futsi nabekwa luphawu ngamoya loyingcwele lowetsenjiswa, ¹⁴ losiciniseko selifa site silibambe libe letfu ngalokuphelele, kube ludvumo lwebukhosi bakhe. ¹⁵ Ngalesi sizatfu, kusukela ngeva ngekukholwa kwenu eNkhosini Jesu kanye nelutsandvo lwenu ngemisebenti yalabangcwele baNkulunkulu, ¹⁶ angikayekeli kubonga Nkulunkulu ngani njengoba nginibeka nasemithantazweni yami. ¹⁷ Ngiyathantaza kutsi Nkulunkulu weNkhosi yetfu Jesu Khristu, Uyise webukhosi, aninike umoya wenhlakanipho nemibono ekwatini Ngaye. ¹⁸ Ngiyathantaza kutsi emehlo etinhlitiyo tenu akhanyiswe, kutsi nati lelitsemba lanibitele kulo kanye nengcebo yebukhosi belifa Lakhe kubo bonkhe labangcwele baNkulunkulu. ¹⁹ Emithantazweni yami ngicela kutsi nati bukhulu bemandla akhe langalinganiseki kitsi lesikholwako, ngako kusebenta kwemandla akhe lamakhulu. ²⁰ Nguwona lamandla Nkulunkulu lawasebenta kuKhristu nakamvusa kulabafile wamhlalisa ngesekudla etindzaweni telizulu. ²¹ Wahlalisa Khristu ngetulu kwako konkhe kubusa nemagunya nemandla nebukhosi nawo onkhe emagama labekiwe. Khristu utobusa, hhayi kulesikhatsi kuphela, kodvwa ngisho nakulesitako. ²² Nkulunkulu wabeka tonkhe tintfo ngaphansi kwetinyawo taKhristu, wamnikela ebandleni njengenhloko yato tonkhe tintfo. ²³ Libandla ngumtimba Wakhe, lokukuphelela Kwakhe konkhe kukubo konkhe.