^{1 2 3} 1. Иисус  амкачантаки Елеонтаки  хөррин. 2. Бадикар  нян-да  нэҥэдек дюлан  эмрин, эйдун-дэ  ҥунмен  Ноҥантакин  ҥэнрин. Ноҥан тэгриди  ноҥарбутан  хупкучидилрин-дэ. 3. Эртэки-нен книгамҥэл  фарисеилнюн  Ноҥантакин  асив  элгэритэн, хэпкэнчэвур, бэиҥдукий  хөнтэнюн  биддив бакчавур. Дулакандула  тарав  илуканидюр. ^{4 5 6} 4. Ноҥантакин гөнитэн: “ Хупкучимҥэ! Эрэв  асив  хэпкэнит, ноҥан бэиҥдукий  хөнтэнюн  биддив. 5. Моисей  мэн  итундулай итурин, эррөчилбэн  дьолачинмай  бигрэдэн, тарбач  Хи-нен яв  гөндинри?” 6. Эрэк  ноҥартан  Ноҥман  ярутасчими  эчин некрэ, Ноҥман  ушалталдивҥавур  гэлэтэсчимси. Тарбач Иисус, хэссэки  төртэки  нөҥкэтникэн,  хогарди  төрли дукаддин  эникэн-дэ  ноҥартакитан  ясакатта. ^{7 8} 7. Тачин-та тарал  Ноҥантакин  улгимиддэкэтэн, Ноҥан  дили  өгэррин гөнин-дэ: “Хундук, ҥи  ач  төнҥэкичлэ,  тарак  дюлэгэч ноҥман  дьолдадан”. 8. Тачин-та  хэргин  нөҥкэриди  төрли дукадилрин. ^{9 10 11} 9. Тарал  тачин  гөнивэн  долдаракатан, мэргэрдюр хадарим дьомкамритан, тарал-нян  улбуҥчисникэн хөрэлрэ  тадук, хагдидмаралдук  но́нникар. Өмэккэн  Иисус тарнюн  асинюн  дулакандула  илачиддинюн эмэптэ. 10. Иисус дили  өгэррин  нян  асидук  хөнтэв  ҥив-дэ  эми  иттэ, ноҥантакин  гөнни: “Ася! Илэ  хин  ушалтачимҥалси? Ҥи-дэ эсни  хину  ургэдэр-э?” 11. Тарак  барагрин: “Ҥи-дэ  эсни, Хунҥи-Бэе”. Иисус ноҥантакин  гөнни: “Би-дэ  эсэм  ургэдэр хину. Ҥэнни  нян  эдиси  төнҥэчичу  неккир”. ^{12 13} 12. Иисус  нян-да ҥунмертэки  төрэдилрин  гөнин-дэ: “Би- бини  Ҥэринни бисэм. Ҥи  Минду  бодасни,  тарак  этэн  хатассили хөллөчиддэ, тарич-тамар  инмэй  ҥэриҥэлкэн бидин”. 13. Таракам  фарисеил  Ноҥантакин  гөнитэн: “Хи Мэнкэн  Мэн  дюгулий  укчэнэнри, төми  Хин  укчэнрис  эсни тэдекич  айдит   бис”. ^{14 15 16} 14. Иисус  ноҥартакитан  барагран: “ Би Мэн  дюгулий  Мэнкэн-дэ-тит  укчэнрэку, Мин  укчэнэку тэдекит  айдит, Би  хараку  авгич  эмчэй  аваски-да ҥэнэддий, ху-нен  эсэс  хар Би  авгич  бисиву  аваски-да ҥэнэддиву. 15. Ху ойли  ичурили  ургэдэчис,  Би  ҥив-дэ  эсэм ургэдэр. 16. Нян  Би ургэдэруку-дэ-тит,  Мин  ургэдэму тэдекит тэдь,  Би  эсэку өмэккэн  бис, тарич  Би  Амму-да бисэкун, Мину эмэсэмкэнчэ. ^{17 18} 17. Тар-ка  хун-дэ  итундуласан дукуттан, дьөрдук  бэилдук  өмҥэчин  укчэнчэтэн тэдекич. 18. Би  Мэнкэн Мэн  дюгулий  укчэнрэм, нян  Амму-да Мину  эмэсэмкэнчэ,  Мин дюгуливу  укчэнрэн”. ^{19 20} 19. Тали  Ноҥман улгэмрэ  Ноҥантакин: “Илэ  Хин  Аманси?” Иисус  барагрин: “Мин  Амму-да  Мину-дэ ху  эсэс  хар. Мину  хачал  бими, Мин-дэ  Амму  хамчилсан”. 20 Эчин  Иисус  төрэддин  нэлдивум нэлдивэн  анчиндукун, нэҥэдек  дюдун  хупкучидникэн. Ҥи-дэ  Ноҥман  эсни  хэпкэн, Ноҥан  хэпкэмкэннэн  илунни  унэт  эсэкэн  исса. ^{21 22} 21. Иисус  ноҥартакитан  гөнни: “ Би  хөррэм. Ху  Мину  гэлэтэддис. Мэр  төнҥэкичтур-дэ  ху  көкэдис. Би  хөррэм, ху  туркуннэлэсэн  эмҥэ”. 22. Эду  иудеяҥэл  гөнитэн : “ Тар-гу  Мэни  Мэнкэн мадин-гу,  яв  гөнни: “ Аваски  Би  хөрриткиву, ху  туркудис  эмҥэ”? ^{23 24} 23. Иисус  ноҥартакитан  гөнни: “ Ху  хэргэгэлдук  бисэс, Би-нен  өйгэгэлдук  бисэм. Ху  эдук  ичуридук  бинидук  бисэс,  Би-нен  эсэм  эдук  бинидук  биси  бис. 24.Төми-дэ  Би  гөниву   ху  төнҥэкичтур  көкэдис. Эми-нюн  тэдер Эрэк  Би  бисиву,  тарич  төнҥэкичтур  көкэдис”. ^{25 26 27} 25. Таракам  Ноҥантакин  улгэмрэ: “Хи-нен  тарбач  Ҥи  бисэнри?”. Иисус  ноҥартакитан  барагран : “Тарак  нонан-та Ҥи  бисий  Мэн  гэрбэй  гөниву. 26. Хоя  хунтэки  гөннэву ургэдэннэву-дэ  бисни, тарма  Мину  Эмэсэмкэнчэ  тэдекичич  биси,  Би  яв  Ноҥандукун  долдачай  бэилтэки  төрэрэм”. 27. Ноҥартан  эстэн  унур, Ноҥан  Амми  дюгулин  ноҥартакитан  гөнивэн. ^{28 29 30} 28. Эр эчин Иисус ноҥартакитан гөнин: “Бэй Няруддон өгэрридюрмэк  таракам  унуградис, эрэк Би бисиву, яв-да Мэндукий этиву некрэ, Мэн Амми  он  хупкучэгчинни тачин-да  гөниву. 29. Мин-нюн  бисни Мину эмэсэмкэнчэ. Амму өмэккэм  Мину  эч  эмэн, Би эрэгэр Ноҥан десэҥдинтэкэн  неккөттэку”. 30. Ноҥан  эчин  гөндиддэкэн, хоял Ноҥман тэдеритэн. ^{31 32 33} 31. Таракам  Иисус  Ноҥман тэдечэлтэки иудеямҥэлтэки  гөнин: “ Мин  Төрэндулэву  бидминюн, тарич  ху  эливун Мин  хупкучиддилбу  бидис. 32. Ху эливун  тэдекичу тэдю хамалкадис, тэдь-нен  хуну дэлмисэмкэндин  чэ́ҥгэйчири төнҥэкичтукусэн”. 33. Ноҥантакин  барагритан: “ Бу- Авраам  хэсэрни  бису, ҥи-дэ  бо́лални  ок-та-тит  эчилбун  бис. Он-нян  Хи  гөнэнри: “Дэлмири́л одис?” ^{34 35 36} 34. Иисус  ноҥартакитан  барагрин: “Эливэн  тэдекичу  тэдю хунтэки  гөнэм: ҥи  төнҥэкичу некринюн- тарак  төнҥэкич  бо́лан. 35. Тарма  бол  дюла  эсни  эрэглэдун  эмэббөттэ. Нярудь  Хутэдмэр  эрэглэдун  эмэббөттэн. 36. Эрэкэси  эчин,  Нярудь  хуну  тинэкэн-нюн, ху эливэн  дэлмилдис. ^{37 38} 37. Харам  ху- Авраам  хэсэрни  бисивусэн, тарбач-нян  ху  Мину  мамсас, Мин  Төрэму хундулэ  тигэрэкэн. 38. Би  төрэрэм  яв-ка  Мэн  Амандулай  көечэй, ху-дэмэр  некэдис, яв көечэвур  мэр  амандулавур”. ^{39 40 41} 39. Ноҥантакин  барагритан: “Мун   аммун — Авраам”. Иисус  ноҥартакитан  гөнин: “Ху Авраам  хурэлни  бисэн  бимиккэ, тарбач  Авраам  некэнҥэлбэн  некэдимчилсэн. 40. Тек-нен  ху  Мину  мамсас, Бэю  хунтэки  айдит тэдекичу  тэдю  гөнчэв, Хэвкидук  долдатлай: Авраам  эрэв  эчин  эч  некрэ. 41. Ху мэр  аммур некэнҥэвэн некэдис”. Эли  Ноҥантакин гөнитэн: “Бу эсу  хөлгэдук балдачал  бис. Өмэнтэкэн амалкар  бису- Хэвкич”. ^{42 43 44} 42. Иисус ноҥартакитан гөнин: “Хэвки  хун Амансан  бисэкэн  ху Мину  аявамчилсан, Би  Хэвкидук  ньөриди  эмчэ  бисэку. Би-нен  эчу Мэндукий   Мэнкэн  эмрэ, Ноҥан  Мину  эмэсэмкэнин. 43. Ями ху Мин  төрэриву эсэс  унур? Эрэкэси  туркутми долчиҥа  Мин  төрэму. 44. Хун  амансан- арисаг, ху-нен  мэр  аммур  некэмсивэн  манрутникар милтэрэмкэсчис. Ноҥан  нонаптукун-та  бэю  мамаган  бисин, нян  туркурин киҥкич  айдитач тэдекичи́ч илҥа́, ноҥандулан-ка  тэдеки́т  айдитаҥан  эрэглэдукунни  ачча  бичэ  бисэкэн. Ноҥан өлэку  гөми, мэнтэки  мэнҥий гөнни, ноҥанка- өлэк, өлэк-тэ  аманни. ^{45 46 47} 45. Би-нен  тэдекич  тэдю гөнэку, тарав-тит  Мину эсэс тэдер. 46. Ҥи хундук  Мину этиливу  айдиту  некрэ  усалтадин? Би-нен  тэдю  гөнэку  ями  эсэс  Мину  тэдемсэ? 47. Ҥи  Хэвкидук  биси, тарак-та  Хэвки  төрэмэн  долчин. Ху  эсэс долчир  эми  Хэвкидук  бис. ^{48 49} 48. Эли  Иудеямҥэл Ноҥантакин  гөнитэн: “Бу  эсумэн  айдиту  гөн Хи- самариядук  бисидис нян  Хиндулэ  ариҥка  бисидин?”. 49. Иисус  барагрин: “Миндулэ  ариҥка ачча, Би Мэн  Амми  хэррэм, ху-нен  Мину ач битунэ́ч  усалтачис. ^{50 51} 50. Тарбач, Би Мэн эскэвҥэй эсэм  гэлэттэ: Гэлэтэдимҥэ  Ургэдэмҥэ-дэ  бисни. 51.Эливэн тэдекичу тэдю хунтэки гөнэм: Ҥи  Мин төрэму гөнигчинни некэнмэю некэдди, тарак ок-та этэн көкэм иткэрэр”. ^{52 53} 52. Иудеямҥэл Ноҥантакин гөнитэн: “Тек бу харусил Хиндулэ арисаг  бисивэн. Авраам көевур-дэ көкэритэн, Хи-нен гөнэнри: “ Ҥи Мин төрэму гөнигчинни некэдди, тарак ок-та-тит этэн көкэм иттэ”. 53. Як Хи мун көкэчэдук амандукувун Авраамдук эгдедмэр бисэнри-мэн, көкэчэлдук  көевурдук-тэ? Хи Ҥич Мэни мэргэндулэй таҥачиланри?” ^{54 55 56} 54. Иисус,барагрин: “Би Мэнкэн-нюн Мэни  эскэддыку, тарич Мин эскэвму як-та эсни бис. Мину Мин Амму эскэн, Тарак  Ноҥман ху  мэр Хэвкидюр гөндиддисэн. 55.Ху эчилсэн  Ноҥман  хамалкар, Би-нен Ноҥман харам. Ноҥман этиди хар гөми-нен, хунгэчин өлэкчимэгэн бидим. Тарбач Би Ноҥман харам  нян Ноҥан Төрэмэн бисигчинни неккөттэм. 56. Авраам хун амансан, хокнин Мин инэҥэҥу иттэй. Нян ноҥан иттин-дэ тарич  хокнин-да.” ^{57 58 59} 57. Эли Иудеямҥэл Ноҥантакин улгэмрэ: “ Хинду унэт тунҥан-мяр-да анҥанаҥас ачча, Хи-нен Аврааму көерис-ку?” 58. Иисус ноҥартакитан гөнин: “Эливэн тэдекичу тэдю гөнэм хунтэки: Авраам бичэн дюлдэлэн, Би  эсипчи  бисиву”. 59 Таракам тарал дьолу наҥтилра, Ноҥман дьолаттавур, тарма  Иисус гөбөрин ноҥардукутан. Ноҥан таралбу табдас елтэҥчирин, нэҥэдек дюдукун ньөрин, часки-да  хөррин.