1 2 1. Эрэк елтэнчэлэн Иисус Галелеяли хөллөчиддин. Ноҥан Иудеяли эч хөллөчимсэ, иудеямҥэл Ноҥман масчиракатан. 2. Иудеямҥэл хэбдекэдекэтэн Суккот давлилрин. 3 4 3. Иисус нөҥилни Ноҥантакин гөнитэн: “Эдук ньөли Иудеятки хөрли, Хин хупкуттиҥэлси-дэ иттэтэн Хин иррөчим некэнҥэй некэддивус. 4. Тарак, ҥи хамду бимси, эсни хипкэкэч яв-да некэддьөттэ. Хи эррөчирбэн мямсилбу некэдмиккэ, тарич Мэни бэилду ичукэли-дэ”. 5 6 7 5. Нөҥилни-дэ Ноҥман эчил-тэ-дэ тэдеттэ. 6. Тали Иисус ноҥартакитан барагрин: “Мин некэнмэю илуму унэт эсни исса, хунду-нен эрэгэр илунсэн бисни. 7. Хуну ҥунмер туркуттэн тикуҥа, Мину-нен тикунни, Би ноҥан ушач кэнелив некэнҥэвэн тэлэҥникэн ичукэттыку. 8 9 8. Ху хэбдектэки ҥэннилрэ, Би-нен унэт-сукэн элэ хэбдекэдеклэ этэм хөррэ, Мин илуму унэт эчэ эмрэ бисэкэн”. 9. Иисус тачин ноҥартакитан гөниди, Ноҥан Галилеяла эмэптин. 10 11 10. Тарбач Ноҥан нөҥилни хэбдекэдеклэ эмчэлэтэн, таракам Ноҥан-да эмрин, тарма эникэн ичукэн, дикэҥчиригчин (эдэй ичиврэ).11. Иудеямҥэл Ноҥман хэбдекэдеклэ гэлэттитэн улгимиритэн-дэ: “Илэ Иисус?” 12 13 12. Ҥунмерэл долатан хоя касагчимачак бисин Ноҥан дюгулин: өмэн гөнин Ноҥан ай бисидин, хан-дамар гөнитэн Ноҥан бэилбэ мейкэчукэнидин.13. Тарбач иудеямҥэлди ҥэлми ҥи-дэ-тит эч ичурич Ноҥан дюгулин төрэр. 14 15 16 14. Тарма хэбдекэдек дулакандулан Иисус нэҥэдек дюлан и́риди хупкучидилрин-дэ. 15. Иудеямҥэл мяҥчиритан улгимиритэн-дэ: “Он Ноҥан Дукапчав тачикан аич дяпкадин хадин, эчэ хупкуттэ биникэн?” 16. Иисус ноҥартакитан барагрин: “Мин хупкучинмэю- эсни Минҥи бис, эрэк Тарҥи, Ҥи Мину эмэсэмкэнчэҥи. 17 18 17. Ҥи Ноҥан дяллон бисигчинни некэмси, тарак унудин: Хэвкидук-ку бисивэн эрэк хупкучинмэй, тар-гу Би Мэнкэн Мэндукий гөндиддэм. 18. Ҥи мэнкэн мэндукий гөндидди - мэнди эскэвҥэй гэлэттэн, нян Ҥи-нен Ноҥман Эмэсэмкэнчэ эскэвҥэн гэлэтти - Тарак тэдекич тэдь, ач-та өлэклэ. 19 20 19. Эчмэн Моисей хунду итуҥасан бөр? Тарма, ҥи-дэ хундук итумур итуттигчинни эсни неккөттэ. Тарбач яли Мину мамсас?” 20. Ҥунмер барагран: “Эсни ариҥка Хиндулэ бис-кэ? Ҥи Хину мамсан?” 21 22 21. Иисус ноҥартакитан барагран: “ Би өмэм некэнмэю некрэм. Ху-нен кубэччур тарав мяҥчис. 22 Моисей хунду минэсэнмэю бөрин ( тарак эсэкэн-тит Моисейдук бис, амтилдукутан-тит бисэкэн), субботала-да ху бэйду минэсэнмэю некэддьөчис. 23 24 23. Тарбач субботала бэй минэсэмэддьөттэн, эдэн Моисей итунни хоипта, тарбач ями-нян Минтэки хи́ралас, тарчан-дули-бади Би бэюткэн субботала бэгдэриливу? 24. Эдилрэ, ойгичич ичурив ургэдэттэ, тарбач ургэдэнмэй айдитчин ургэдэлрэ”. 25 26 27 25. Элэ-нен хан Иерусалимна индиддил гөнитэн: “ Эрэк Бэй эсни-гэл мадавур гэлэтэддитэн бисэ? 26. Эр, Ноҥан ичурич аҥаттич төрэн нян Ноҥантакин ҥи-дэ яв-да эстэн гөн: таргу бэгэсэл унучал бидир-гу, Ноҥан эливэн Имтэпчэ- Христос бисивэн? 27. Мут харап Ноҥман идук-тэ бисивэн. Имтэпчэ-нен эмрэкэн ҥи-дэ этэн хар, авгит-та Ноҥан бисивэн”. 28 29 28. Таракам Иисус нэҥэдек дюлан хупкучидникэн, игэч гөнни: “ Мину-дэ хас, авгич-та Би бисиву-дэ. Би эчу Мэнкэн Мэндукий эмрэ, тарма бисни Тэдекич айдитач биси - Мину Эмэсэмкэнчэ, Этисэн ху хар. 29. Би Ноҥман харам, Би Ноҥандукун бими, Ноҥан-да Мину эмэсэмкэнин”. 30 31 32 30. Иисусу хэпкэмситэн , тарма ҥи-дэ эч Ноҥман хэпкэн, тарак Ноҥан (хэпкэмэннэн) илунни унэт эчэ эмрэ. 31. Хоял ҥунмердук Ноҥман тэдеритэн гөнитэн-дэ: “ Эливэн, Имтэпчэ-Христос эмми, Эрэк Бэй ичукэттидукун унэт-тэ эгдэч хоядмару ичукэттилбу илкурбу ичукэмчимэн?” 32. Фарисеил ҥунмер Ноҥан дюгулин таргачин укчэнривэн долдаридюр, тарич дюлэгэл нэҥэдюкэмҥэл-нюн өмэтту одидюр кэлмэвчириҥэлбур Ноҥман хэпкэнэвкэнитэн. 33 34 33. Иисус ноҥартакитан гөнни: “Би хуннюн эннэву гору бис эмэптэн, нян хөрдим Тартаки, Ҥи Мину эмэсэмкэнчэтки. 34. Мину гэлэтчис этэс-тэ бакра, илэ Би бисилэву-дэ, ху туркудис эмҥэ”. 35 36 35. Тарав долдаридюр иудеимҥэл мэр доливур улгимимэттитэн: “ Аваски Ноҥан хөрэсчин, мут эннэлэт Ноҥман бакра? Эсни-гэл боргарил еллиргидэтки хөрдэй некры, еллирбу хупкучиддэй-дэ? 36. Яв ичукэнив эрэк төрэм Ноҥан гөнни: “Мину гэлэтчис, этэс-тэ бакра, илэ Би бисилэву, ху туркудис эмҥэ”? 37 38 37. Эгден хэбдекэдек муданҥанни инэҥнэн, Иисус илрин нян игэч гөснэн: “Ҥи калутти, Минтэки эмни колли-да. 38 Ҥи Мину тэдеттэн, ноҥандукун ини мө эелдин, Дукундула гөпчэгчинни”. 39 39. Эрэк Ноҥан гөнни Хэвки Хэрэпчэ Муранни дюгулин, Ноҥман тэдерилдулэ габаннав: таркы, унэт ачча бисин таралдула Хэрэпчэ Муран, Иисус унэт эч эскэнду имтэ́врэ. 40 41 42 40. Бэилдук хоял долдаритан эчин төрэривэн тали гөнитэн-дэ: “Ноҥан айдитчин эливун көевун”. 41. Хан гөнитэн: “Эрэк Хэрэпчэ- Христос”. Хан-да-мар гөнитэн: “ Хэрэпчэ-Христос Галилеядук-мэн эмдин? 42. Дукундула эчмэн гөптэ Христос-Хэрэпчэ Давид хэсэндукун биннэвэн Вифлеемдук, Давид бисидукун билэктукун?” 43 44 43. Тар тачин бэил дэлкэптэ Ноҥан дюгулин касагчимачакливур. 44. Таралдук хан-да Иисусу хэпкэсчилритэн, нян тарма ҥи-дэ Ноҥман эч хуҥриснэ. 45 46 45. Төми-дэ кэлмэвчиддил дюлэгэл нэҥэдюкэмҥэлтэки фарисеилтэки-дэ уйритан, таравыл-нян ноҥартакитан улгэмрэ: “ Ху ями Ноҥман эсэс элгэр?”.46. Кэлмэвчирил барагритан: “Ок-та, ирэк-тэ бэй эрэклэ унэт Ноҥгачинни эч төрэр”. 47 48 49 47. Фарисеил таралтаки гөнитэн: “Тар-гу ху-дэ-гу өлэкчивчэл бисэс-ку? 48. Тарбач ҥи-дэ бэгэсэлдук, тарул фарисеилдук Ноҥман тэдер? 49. Таркалаки́ эрэк ҥунмен эсни Итум хар, төми ноҥан ниҥивчэ”. 50 51 52 50. Өмэн ноҥардукутан биси, Никодим, Иисустэки долба хөллөччэ, ноҥартакитан улгэмрэн : “Тарбач-нян мут Итунти бэю ургэдэннэнмэн, ноҥман ач долчичалач, ач хачалач яв ноҥан некчэвэн?” 52. Тали ноҥартан барагритан: “ Тар-гу хи-дэ-вул Галилеядук бичэс бидин-гу? Аич тарав удитли эливэн тэмрэкэ́н, Галилеядук көевун этивэн эммөттэ”. 53 53. Нян тарич кубэччур дютантакивур боргаснитан.