1 2 3 1. Эрэк амардалан Иисус Галилея нама́н хөнтэгдэткин Тивериада буйгидагдаткин хөррин. 2. Хоя бэй Ноҥандун бодаснитан, көечэл бими Ноҥан хонив мямсилба бутэнэлнюн некэддивэн. 3. Иисус амкачандула ойчириди таду тэгрин Мэн хупкуттиҥэлнюми. 4 5 6 4. Иудеямҥал Пасхав хэбдекэдекэтэн далилрин. 5. Иисус ясали өгэрми иттин Ноҥантакин хоя бэй ҥэнэддивэн. Таракам Ноҥан Филипптэки улгэмрин: “Илэ мут килебу хараччип, ноҥарбутан улиттэвур?” 6. Иисус эчин гөнин ноҥман ярутми, хами яв некэмсии. 7 8 9 7. Филипп Ноҥантакин барагрин: “Этэн элэкэн бис дьөр- нямач динарияч харачивми, эйдудюр абалаталба-да-тит гадатан”. 8. Өмэн Ноҥан хупкуттиҥэлдукун, Андрей, Симон Петр нөн Ноҥантакин гөнни: “ 9. Элэ өмэндулэ нярикандула тунҥан ячмендук килебэл бис дьөр-дэ олракакар, тарма тарчан як бидин эрдидун хоялду?” 10 11 12 10. Иисус гөнни: “ Бэилтэки гөлилрэ дэсчисэндэтэн”. Тала хоя хайта хетлэ бисин. Дэсчисэнчэл-нен тунҥакли тисичэкли биситэн. 11.Иисус килебу гади́н, а́ниснин нян хупкуттиҥэлди боририн, хупкуттиҥэлни-дэмэр дэсчисэнчэлду бориттитан. Тачинни-та-да олрав-да адив ҥи гамсиван бориттитан. 12. Ноҥартан дялуракатан, Иисус Мэн хупкуттиҥэлтэкий гөнин: “ Чаклилра эмэпчэлбу гигнэлбэ, як-та эдэн улэптэ”. 13 14 15 13. Дептивур одчалдук хулучэвутэн тавра гигнэлбу, тунҥандук ячмендук килебэлдук, таралди мян-дьөрбу эгдер тара́пчалбу аликалбу милтэрэмкэн. 14.Таракам бэил көечэл Иисус эгдем мямсив некчэвэн, гөнитэн: “ Эрэк эливун көевун, Ирэк элэ төрлэ эмэннэ бичэ.” 15.Иисус долдариди эмэмсивутэн Ноҥман гадавур нян тэгэмэрэч илудавур, Ноҥан нян-да амкачантаки хөррин. 16 17 18 16. Хисэчин одакан, Ноҥан хупкуттиҥэлни намтаки эвритэн. 17. Момилавур тэгритэн нян тадук тавгидатки хөрритэн Капернаумтаки. Хатараладдин, Иисус-тэмэр ноҥартакитан эч эмрэ. 18. Энтэкэе хунҥэрин, нам эгден, энтэкэе отарин. 19 20 21 19. Ноҥартан дьөр-мяр тунҥам-гу, илан-мярбу-гу стадияв ҥэнридюр, Иисусу иттитэн намни гиркаддив, момиткитан дагамаддив. Ноҥартан олалдаритан. 20. Тарма Ноҥан таралтаки гөнин: “ Эрэк Би бисэм. Эдилрэ ҥэлэлкилрэ”. 21.Ноҥартан момилавур Ноҥман гамалритан – нян тарамалдут момитан ҥэнэддитэн төтэсэмкин хөлилэн иламалчин. 22 23 22. Гяла инэҥнэ бэил нам бардалан хөлидун илачиддил, як-та хөнтэ моми аччаван көеритэн, Иисус хупкуттиҥэлни хөрчэтэн , момидукутан хөнтэ, нян Иисус-тэ хупкуттиҥэлнюми эчэвэн момилатан тэгрэ, Ноҥан хупкуттиҥэлни өмэккэр момидасанчавутан. 23. Тар-да бисиклэн Тивериададук хөнтэл момил эмритэн. Эрэл момил килебу Хунҥи төрэсэнчэвэн дебэдекэтэн далилан биситэн. 24 25 24. Ҥунмен иттиди элэ Иисус-тэ, хупкуттиҥэлни-дэ аччавутан, таракам ноҥартан момилдула тэгридюр Капернаумна ҥэнритэн Иисусу гэлэтми. 25.Таракам хөнтэлэ нам хөлилэн Ноҥман бакми, Ноҥантакин улгэмрэ: “Хупкучимҥэ! Ок Хи элэ эмрис?” 26 27 26. Иисус ноҥартакитан барагрин: “Тэдекич тэдю хунтэки гөнэм: ху Мину, эсэс мямсилба хомилба көечэл бими гэлэттэ, килебу дебэдми дялучаливур. 27.Экичич манрутникар ҥэнэсчилилрэ эникэр эгдэдин мунэннэли́ деблэли манрутта, тарбач манрутлилра Бэй Нярудан Хутэн деблэв хунду бөннэвэн, эти мудна индулэ эмэбэннэв, тарбач-ка”. 28 29 28. Амадмар Хэвки Мэн илкэми Ноҥандулан набгирин”. 29. Таракам Ноҥман улгэмрэ: “Бу яв некэннэвун, Хэвки некэнмэйөн нектэвур?” Иисус ноҥартакитан барагрин: “ Эр Хэвки некукэттин: тэделилрэ Тарав, Ҥив-кэ эмэсэмкэнчэвэн”. 30 31 30. Эли Ноҥман улгимиритэн: “Иррөчим илкум Хи ичукэмчис, бу тарав иттидюр Хину тэдемчилбун? Яв Хи некэмчис? 31. Мун амтилбун гиндула маннав дептитэн, он дукуттан: “Няниндук дебдэтэн ноҥардутан бөрин.” 32 33 34 32. Иисус ноҥартакитан гөнин: “Тэдекичу тэдю хунтэки гөнэм: Эсни Моисей хунду няниндук килебу бөчэн бис, Мин-дэмэр Амму хунду эливэн тэдю килебу няниндук бөвэттэн. 33. Тарбач-ка Хэвки Килебэҥэн- эрэк Тарак, Ҥи няниндук эмри, бэилду иҥэтэн бөри”. 34.Эли тарал Ноҥантакин гөн: “Хунҥи-Бэе! Эрэгэр эррөчим килебу мунду бөткэрэли”. 35 36 37 35. Иисус ноҥартакитан барагрин: “ Би- ин Килебэн бисэм. Ҥи Минтэки эмри, этэн ньөмэсчир, ҥивул-дэ Мину тэдери, ок-та-тит этэн калутта. 36. Би хунтэки гөнэм, ху Мину көерисэн нян эсэс тэдер. 37.Эйду яв Амму Минду бөрин, Минтэки эмдин. Нян ҥи Минтэки эмрив, Би этэм бугаски ньөвкэн. 38 39 40 38. Биккэ няниндук эвриву эдэй Мэн дялгачими некэмсий некэддэ, Аммиткан Мину эмэсэмкэнчэ дяла́н некэмсивэ́н биннэгчинни некэддэй. 39. Амму Мину эмэсэмкэнчэ дялан биси, Ноҥан Минду бөчэдукун яв-да эдэку хилгир, эйдувэн-дэмэр арукандаку муданҥан инэҥнэ. 40. Мину эмэсэмкэнчэ дялан бисни, ҥитэн Хуттөн көери нян Ноҥман тэдери-дэ эти мудна илкэн бидэн, Би-нен ноҥман арудим муданҥан инэҥнэ. 41 42 .41. Иудеямҥэл хиралритан Ноҥантакин, Ноҥан гөнилин: “Би- Килеб бисэм няниндук эвчэ”. 42. Ноҥартан гөнитэн: “Иисус эснимэн Иосиф хутэн бис-ку, Ноҥан амман эньмэн-дэ мут харилти? Тарбач онаси Ноҥан гөнни: “Би няниндук эвриву?” 43 44 45 43. Иисус ноҥартакитан барагрин: “Эдилрэ мэр доливур хянратматта. 44. Иррөчин-дэ-тит бэй Минтэки туркудин эмҥэ, эсэкэн-нюн Мину эмэсэмкэнчэ Амму тарав ҥэндэн хөрур. Би-нен тарав бэю арудим муданҥан инэҥнэ. 45.Көевурэлдулэ дукуттан: “Кубэччур Хэвкиду хупкувчэл бидир”. Ҥитэн долдача Амандукуву тарич хупкупчэ, Минтэки эмдин. 46 47 46. Эрэк эсни ичукэттэ, ҥи-дэ Амму көечэ бисивэн. Ҥиккэ Хэвкидук-тэкэн биси- Ноҥантакан Амам көечэ. 47. Тэдекичу тэдю хунтэки гөнэм: Мину тэдетти, эти мудна илкэн биси. 48 49 48. Би бисэм - ин Килебэн. 49. Хун амтилсан гиндула маннав дептитэн көкэритэн-дэ. 50 51 50. Тарбач-нян Килеб няниндук эвчэ эррөчин: ҥи тарав депти- этэн көкэр. 51. Би- ини Килеб бисэм, няниндук эвчэ.Ҥи Эрэв Килебу депти, тарак эти мудна илкэн один. Килеб Мин бөриву- эрэк Мин Булгису, Би төр бэилни инмэитэн ба́лин Тарав бөдим”. 52 53 52.Таракам иудеимҥэл мэр доливур касагчимачидилритан: “Он Ноҥан Мэн Булгиси мут дебдэт бөмчэ?” 53. Иисустэмэр ноҥартакитан гөнин: “Тэдекичу тэдю хунтэки гөнэм: эминюн-дэ дептэ Бэй Нярудан Хутэн Булгиссөн, эти-дэ Ноҥан Хуҥэллөн колра, тарич мэндулэвур, ханиндулавур ач инэл бидис. 54 55 56 54. Ҥи Мин Булгису депти, Мин Хуҥэлу-дэ колри, тарак эти манур инилкэн бидин. Би-нен тарав арудим муданҥан инэҥнэ, 55.Минкэ Булгису- эливэн деблэ, Мин Хуҥэлу-дэ - эливун коланмай. 56.Тарак ҥи Мин Булгису депти, Мин Хуҥэлу-дэ колри, Мин Эмдэлэву биддин, Би-дэ ноҥан эмдэлэн биддим. 57 58 59 57. Он Мин ини Амму Мину эмэсэмкэнин, Би-дэ Аманди инэм, таргачинни-да Мину-дэ депти тарак-та Минэч индин. 58. Эрэклу тарак биси Килеб, няниндук эвчэ. Ноҥан эсни манна урэчин бис, ирэв хун амтилсан дебэддитэн нян көкэритэн-дэ: Эрэв-нен Килебу ҥи депти, тарак эти манур индулэ индидилдин.” 59. Эрэв Ноҥан синагогаду гөндиддин, Капернаумна хупкучидми. 60 61 60. Хоял Ноҥан хупкуттиҥэлни, тарав долдами гөнитэн: “Якавал ач мэргэнэл төрэр! Ҥи эрэв долчимнан?” 61. Тарма Иисус Мэндулэй хами, Ноҥан хупкуттиҥэлни тали хянраттивутан, ноҥартакитан гөнни: “Эрэк хуну хэчукэнни? 62 63 62. Як-нян бидин, иттэкэсэн Бэй Нярудан Хутэн өгэрэпэддивэн таргидатки, илэ өсиду бичэткий? 63. Муран Хиранни им бөри, булгис-нен айҥав эти эмуссэ. Би хунтэки гөнилбу Төрэр- муран хиран нян ин-дэ. 64 65 64.Тарма хун доласан, этил тэдеттэ бисил бис”. Иисус-кэ нонаптакун-та харин, ҥи этивэн тэдеттэ нян ҥи-дэ Ноҥман ипкэкэч тэлгэнтэки бөннэвэн. 65.Унэт-тэ Ноҥан часки гөндидилрин: “Төми-дэ Би хунтэки гөҥрэриву, ҥи-дэ-тит туркудин Минтэки эмҥэ, эчэ-нюн Мин Амандукуву эмдэн бөпчэ бис.” 66 67 68 69 66. Тараптук-та хоял Ноҥан хупкуттиҥэлни Ноҥандукун хөрритэн, эчилэси Ноҥнюнни хөллөттэ. 67. Таракам Иисус мян-дьөртэки улгэмрин: “Эсэскэ ху-дэ хөрэмсэ?” 68. Симон Петр Ноҥантакин барагрин: “Хунҥи? Ҥитки бу ҥэндиру? Хиндулэ эти мудна ин Төрэрни бис, 69. Бу-нен тэдеривун хамалкаривун-да Хи – Христос, Ини Хэвки Хутэн бисивус”. 70 71 70. Иисус ноҥартакитан барагрин: “Би эчу-мэн хуну мян-дьөрбу хинмар? Тарма хундук өмэн- ариҥка”. 71.Эрэк Ноҥан Иуда Искариот Симон хутэн дюгулин гөнчэ, мян-дьөрдук биси бичэ, нян Ноҥман хипкэкэч булэркэттилду бөмси.