1 2 3 1. Иисус долдариди фарисеилдула иг исчаван, Ноҥан хупкучилдивэргэй, Иоанндук эгдыдмыру чакриван нян эгдэдмэру-дэ хэвкилэддивэн-дэ. 2. Эсэкэн-тит Мэнкэн Иисус хэвкилэддэ Ноҥан хупкуттиҥэлниткэн. 3. Тарич Иисус Иудеяв эмэнин нян-да Галилеятки хөррин. 4 5 4. Иисусту Самарияли ҥэнэннэн бисин. 5. Самарияла Ноҥан Сихарь гэрбэ городла эмрин. Город Иаков мэн хутти Иосифту төрэҥгэн бөчэн далилан бисин. 6 7 8 6. Тала улытлэ Иаков мөлимкинни бисин. Хоттукий хэтчэ Иисус мөлимкин анчиндун тэгэснин. Нюҥэн час далилракан. 7. Самариядук аси мөв хукудай эмрин, Иисус ноҥантакин гөнин: “Минду коласандаку мөв бөли”. 8. Ноҥан хупкуттиҥэлни городтаки деблэв харатнаритан. 9 10 9. Самариямҥа аси Ноҥантакин улгэмрин: “ Он хи, иудей биникэн, минтэки, самариямҥатки колдай гасчинри? Иудеямҥал-ка эстэн самариямҥалнюн дэлмэччөттэ”.10. Иисус ноҥантакин барагрин: “ Хэвки аниддьон хача бимиккы, Ҥи-дэ хинтэки гөнивэн-дэ: “ Колдаку бөли”, таракам хи мэнкэн Ноҥантакин гасчимчис, Ноҥан-нян хинду инив мөв бөмчэ”. 11 12 11. Аси Ноҥантакин гөнни: “ Хунҥи- бэй-э! Ядук Хиндулэ ини мө бидин? Хиндулэ яч-та хукусаннас-та-тит ачча, мөлимкин-нен хунта.12. Химэн мун ча́гандукувун амандукувун эгдедмэр бисэнри, мунду эрэв мөлимким бөрин, мэнкэн-дэ эдук колрин, хурэлни-дэ, делгэнкэҥэлни-дэ?” 13 14 13. Иисус ноҥантакин барагрин: “Колритан эрэв мөв, нян-да коламалдин.14. Тарак-нян, ҥи Мин бөчэву колдин этэн ок-та калра. Мин ноҥандун бөчэву мө ноҥандулан мө дэрэ́нни один, ач мудна интэки эесни.” 15 16 15. Аси Ноҥантакин гөнни : “Хунҥи- бэе! Минду бөли таррочим мөв, эдэку калам ок-та амтатта, эдэку-дэ эртэки хөллөттэ мөлидэй”. 16. Иисус ноҥантакин гөнин: “ Хөрли, мэн бэиҥи ҥатли, эвэски эмни-дэ”. 17 18 17. Аси барагрин: “Миндулэ бэиҥу ачча”. Иисус ноҥантакин гөнни: “ Хи айдит гөнис бэиҥи аччаван.18. Хиндулэккы тунҥар бэиҥэлси биситэн, тек-нен ҥинюн бисис эсни бэиҥэс бис. Эрэв хи айдит гөнис”. 19 20 19. Аси Ноҥантакин гөнин: “ Хунҥи- Бэе, би көерэм Хи көевун бисивус. 20. Мун амтилбун эду амкачанду нэҥэдидгэрэр, ху-нен гөвэчис нэҥэдидинмэй биннэн билэк Иерусалимна бисивэн”. 21 22 21. Иисус ноҥантакин гөнни: “ Тэдели Мину, эррөчин бини эмэддэн, этэс эдуткэн амкачанду тикэтнэддэ, этэс-тэ Иерусалимнаткан-да тикэтнэддэ Амантаки. 22. Ху эсэс хар ятки-да тикэтнэддивур, бу-нен хару ятки тикэтнэддивур, уранма́й-ка - иудеилдук. 23 24 23. Тарбач бини один, укал-да-лу бисич эмрин, эливэн тэдекичич нэҥрил, Амантаки тикэтнэддир доли эмдэвур мурандукун эливэн-дэ тэдекич айдитач, Аман таррочилбан тикэтнэрилбэ Мэнди гэлэттэн-кэ. 24. Хэвки- эрэк ай Муран, Ноҥантакин нэҥрил, доли эмдэвур мурандукун тэдекит-тэ айдитач тикэтнэдиннэтэн”. 25 26 25. Аси Ноҥантакин гөнни: “ Харам, Мессия-Имтэвчэ́ эмэннэвэн, Христосач гэрбуттитэн. Ноҥан эмриди, эйдувэн дяпкадин мунду унувкандин”. 26. Иисус ноҥантакин гөнин : “ Эрэк Би - Тарак бисэм, хин-нюн төрэдди”. 27 27. Эркэнду Ноҥан хупкуттиҥэлни эмритэн нян мяҥчиритан Ноҥан асинюн укчэнривэн. Тарбач, өмэн-дэ-тит ноҥардукутан эчил улгэмрэ: “Яв Хи некэмсэнри?” тарул : “Як дюгулин тарнюн төрэнри?” 28 29 30 28. Таракам аси екэй эмэнни нян городтаки хөррин, Ноҥан бэилтэки гөнин: 29. “Хөрлилрэ, итнэлилрэ, Бэю, минтэки гөнчэв, эйду яв некэтлэву: эснигэл Ноҥан Христос-Хэрэпчэ бис-э?” 30. Бэил городдук ньөридюр Ноҥантакин хөррэ. 31 32 33 31.Эркэндун хупкучиҥэлни Ноҥман дебдэн бөтникэр гасчир:“Хупкучимҥэ! Дебэсли!” 32. Тарма Ноҥан ноҥартакитан гөнин: “Миндулэ дебэҥу хун этисэн хар бисни”. 33. Төми хупкучиҥэлни мэр доливур улгимимэттитэн: “Эрэк Ноҥандун ҥи-дэ-вул дебэсэндэн эмусчэвул бидин?” 34 35 36 34. Иисус ноҥартакитан гөнни: “Мин дебэҥу- эрэк Мину, Ҥиккэ некнэвкэнчэ дялгачинни милтэрэмкэникэн, Ноҥан некэннэлбэн биннэгчинни-дэ некэддэку. 35. Ху гөвэчис, унэт дигэн бяг елтэндин нян хусадяк один. Би-нен хунтэки гөнэм: ясалалбур өгэрлилрэ, ичислилрэ хевкэчэкэлбэ, тарал онакан гилтаргаривута́н нян ирривутэн хусадяктаки кимапчал. 36. Ҥи хусадди, тарак дьолдаммо́ттан нян хечэв чаккоттан ач мудна интэки, төми ҥи хеннэл няҥталбу усиҥэчиччэ, таралдук хечэв-дэ хуссиди чакачичча-да, өмэтту өрэҥчиддьөттэ. 37 38 37. Эчин бисэкэн, айдитадмарач гөпчэ бигрэн: “Өмэн няҥтав усиҥэчиддэн, гядамар тавран”. 38. Би хуну хусникан чактасан хөрукэниву, тарав ху эчэвусэн гургэвчир. Хөнтэл гургэвчиритэн, ху-нен чакадис ноҥартан гургэдукутэн хечэвэн”. 39 40 39. Хоял самариямҥал тадук городдук Ноҥман тэдеритэн, аси төрэндукун, укчэнчэдукун, Ноҥан (Иисус) тэлэҥчэвэн эйду яв ноҥан некэтлэвэн.40. Төми-дэ самариямҥал Иисустэки эмридюр, гасчиритан Ноҥан ноҥардулатан эмэбдэн. Иисус таду дьөрбу инэҥу бисин. 41 42 41. Унэт-тэ хоя бэй Ноҥан төрэндукун тэдеритэн. 42. Тартаки-нян аситки гөнитэн: “Эсуси хинтэкэн төрэндукус тэдер, мэркэр-дэмэр долдаридюр нян хамалкарап-та Ноҥан Хэрэпчэ-Христос - эливун буг Ургимҥа́н бисивэн”. 43 44 45 43.Дьөр инэҥэл елтэнэкэтэн Ноҥан тадук ньөрин, Галилеятки хөррин. 44. Иисус Мэнкэн ичурич гөнин, көевун мэн буглай этивэн таҥучибботта. 45. Иисус Галилеятки эмрэкэн, галилеямҥал, хэбдекэдеклэ хөллөчиччэл, аич алимникан Ноҥман гадитан, Иерусалимна эйду яв мямсив некэддивэн көечэл бими. 46 47 46.Таракам Иисус нян-да галилеямда городла Канала эмрин, мөв вино овкандидяклай. Капернаумна тэгэмэр нюҥэрэмҥэ́н индиддин, нярудан хутэн бутэнри бисин. 47.Тарак долдариди Иисус Иудеядук Галилеятки эмчэвэн, Ноҥантакин эмрин нян гасчирин эмдэн, бэгдэдэн-дэ ноҥан няруддо́н хуттөн, көкэклий бутэну. 48 49 50 48. Иисус ноҥантакин гөнин: “Ху этэс тэдер, эми-нюн хомилкар мя́мдалбу илутиҥэлбэ́-дэ иттэ”. 49. Тэгэмэр нюҥэрэмҥэн Ноҥантакин гөнни: “Хунҥи-Бэйе! Эмни, эдлэн хуту көкэр”.50. Иисус тартаки гөнни: “Ҥэнни, хин хутэс абгар!” Тарак Иисус гөнивэн тэден, хөррэн. 51 52 51. Ҥэнэдникэн ноҥан кэлмэлби арчилдан, гөнилбэ: “Хин хутэс абгар”. 52. Ноҥан таралтаки улгэмрэн: “Адила часла ноҥандун эюмкуснин?” Ноҥартан ноҥантакин барагра: “Хөксий оддин надантаки час оддакан, тинив хисэчин”. 53 54 53. Амадмар унун, Иисус ноҥантакин гөҥсин-тэ:“Хин хутэс абгар” тарак тарамалду́т абгар очаван. Ноҥан бэйди тэден, таргачинни-та-да эйдудюр-дэ дюн дон. 54. Эрэк Иисус гяҥан мямсив хомив некчэн, Иудеядук Галилеятки уйриди.