1 2 1. Фарисеилдулэ өмэн бэй бисин иудеилдули бэгэрри Никодим гэрбэ. 2. Ноҥан долба Иисустэки эмрин нян Ноҥантакин гөнин: “Хупкучимҥэ! Мут харап Хи- хупкучимҥэ бисивус, Хэвкидук эмчэ, эррөчилбэн-кэ мякич мямсилба иррөчилбэн Хи некрилбус, ҥи-дэ-тит туркуттэн некҥэ, эсэкэн-нюн Хэвки ноҥнюнни бис.” 3 4 3. Иисус ноҥантакин барагрин: “Эливэнмэкэн тэдю, тэдю хинтэки гөнэм: ҥи өйгич этэн балдар, тарак туркудин Хэвки Тэгэмэрэдеккөн итҥэ”. 4. Никодим Ноҥантакин улгэмрэн: “Он бэй балдамча укал хагди биникэн-кэ? Нян-да-гу мэн эньми долан имчи-гу, гявамча балдамча?” 5 6 5. Иисус барагрин: “Эливэм тэдекич тэдю хинтэки гөнэм: ҥи мөдук Хэвки Мурандукун-да этэн балдар, тарак туркудин Хэвки Тэгэмэрэдеклэн иҥэ. 6. Булгистук як балдача- эрэк булгискэчин биси, Хэвки Мурандукун балдари-нян — эрэк муран ( Хирари Хэвки Муранни). 7 8 7. Эди мяҥчикир Мин гөниву: “Ху өйгич балданнасан”. 8. Муран хиран иду хирамсилай, дилгаман долданри, тарбач эсэнри хар авгидадук ѝсивэн, аваски-да хөрривэн. Тачин-та-да бивэттэн тартанду, ҥи Хэвки Мурандукун балдачанюн”. 9 10 11 9. Никодим Ноҥантакин улгэмрин: “Он тачин бимчэ?”.10. Иисус барагрин: “Хи - Израиль хупкучимҥэн биникэн эрэв-дэ эсэнри хар? 11. Эливэн тэдекич тэдю гөнэм хинтэки: бу харивур гөну, тэ́лэҥэтту-дэ яв көечэвур дюгулѝ нян ху-нен эсэс аич алимамса мун тэлэҥривун. 12 13 12. Би төрлэ бисив укчэнрэку ху эсэс тэдер, он-нян тэдедис нянингидав укчэнрэку? 13. Ҥи-дэ эч нянинтаки ойчикачидда, Бэй Няруддакун хөнтэ, няниндула биччэдукий нян тадук эвэснин. 14 15 14. Моисей авла́ндула ги́ндула дябдав өгэрчэгчинни. Таргачинни-та-да Бэй Нярудан-да өгэрэбэннэн бидин. 15. Ноҥман тэдеритэн эдэн көкэр, эрэгэр индидинмэйилкэн бидэн. 16 17 18 16. Хэвкиккэ тачикан хулэкэч аявалрин ҥунмеру, Мэн Өмний Хути бөкэн. Ноҥман тэдери эдэн көкэр, эрэгэр индулэ индидилэнмэйкэн одан.17. Хэвкиккэ Мэн Няруди төртэки хөрукэнин, эдэн ургэдэнэ́р, Ноҥандулин төр ҥунмерэн тилгабдан. 18. Ноҥман тэдечэ этэн ургэдэврэ, нян эчэ тэдер Ноҥман укал тарич ургэдэптэн, эчэ тэдер бими Өмнин Хэвки Нярудан Хутэн гэрбэвэн. 19 20 21 19. Ургэдэн эрэк эчин биси, бугла ҥэрин эмчэв эстэн ясакатта химҥэм ҥэриндук хулэкэдмэрэч аяврил бими, ушадмару некэддил бими. 20. Ушу некритэн бэй, ҥэрим тикунни, төми-дэ ҥэринтэки эсни ҥэнрэ, ноҥан ушу некчэлбэн ҥэрин ичулукэндиҥэдун, хавалукандиҥадун. 21. Ҥи-нен айдиту некэдди, тарак ҥэринтэки ҥэнрэн, ноҥан айдиту некэддин ичулдэн, тарал Хэвкилэ некэбэддитэн-кэ”. 22 23 24 22. Эрэк амардалан Иисус хупкуттиҥэлнюми иудеямҥал төрэҥнэтэн эмрин, тала ноҥарнюнтан индиддин хэвкилэддин-дэ. 23. Тачин-та-да Иоанн-да хэвкилэддин Енондулэ, Салим далигдалан, тала хоя мө бисэкэн. Тартаки бэил эмридюр хэвкилэвэддитэн. 24. Иоанн-ка унэт эч нипкэчэклэ нипкэврэ. 25 26 25. Таракам Иоанн хупкучиддилни иудеямҥалнюн касагчимачакатан один хэрэдек дюгулин. 26. Иоаннтаки хупкуттиҥэлни эмритэн ноҥантакин улгимир-дэ: “Хупкучимҥэ! Иордандула хиннюн бичэ Бэй, хи Ноҥан дюгулин тэлэҥэччэс- Тарак хэвкилэддэн нян кубэччур-дэ Ноҥантакин ҥэнэддэ”. 27 28 27. Иоанн барагрин: “Бэй мэнкэн мэндукий яв-да некэнҥэгэй туркудин гаҥа, эчэ-нюн няниндук ноҥандун бөвчэ бис. 28. Ху мэркэр укчэнрисэн яв мин гөнчэву: “Би эсэм Христос бис, тарбач би Ноҥан дюлдэдун хөрукэмриву”. 29 30 29. О́лданна, тарак ҥи мерэннэлкэн-асаткаҥалкан, ноҥан-нян гяматтин гян анчиндулан эрэгэр илачидди аймакан долчидникан олданна дилгаман, хокусач милтэрэндин. Эр тек би тачин-да хокусач нескэҥчирэм. 30. Ноҥан исудиннэн, би-нен көчукэн одиннаву. 31 32 33 31. Тарак, Ҥи өйгич эмри, эгдедмэр эйдудукун, нян төрдук биси - төрҥи-тэ-дэ биннэди бидин, төрэн-дэ төрҥигчин-тэ-дэ. Тарак, няниндук эмчэ, эйдудукутэн эгдедмэр. 32. Ноҥан укчэнникэн биниди-дэ ичукэттэн яв көечэй долчичай-да, нян ҥи-дэ эсни долчимса Ноҥан ичукэттивэн. 33. Нян ҥи Ноҥан ичукэтникэн төрэривэн долчири аич тарав ганикан, тарич Хэвки тэдь айдиттон а́русач ичукэ́нни. 34 35 36 34. Тарак Хэвки эмэсэмкэнчэн, Хэвки Төрэмэн төрэникэн укчэнрэн, Хэвки ач хэ́мкэнэв эҥив Мурам бөттэн. 35. Амадмар Няруди Хути аявран, эйдувэн Ноҥан ҥаллан бөрин. 36. Хуттөн тэдетти ач мануна илкэн, эти-дэмэр тэддеттэ Хуттөн им этэн иттэ, тар Хэвки хи́ррин эҥи́н ноҥандулан эмэптэн”.