1 2 1. Тадук илилан инэҥнэ галилеегдэ городла Ка́нала о́лдадяк бисин, тала Иисус энинни-дэ бисин. 2.Таргачинни-та-да Иисус-тэ хупкуттилнюми о́лдадяктаки э́ривчэ бисин. 3 4 5 3. Ви ноҥатан манудакан, Иисус энинни Ноҥантакин гөнин: “Ноҥардулатан виноҥатан ачча”. 4. Иисус ноҥантакин барагрин: “Тарбач Минду як-аси таракла, ася? Мин некэннэву илунни унэт эч эмрэ”. 5. Ноҥан энинни кэлмэвчирилтэки гөнин: “Ноҥан яв гөнигчинни неклилрэ”. 6 7 8 6. Элэ нюҥэн дьолал екэл илаттитан, дьөр илан-да тэрэмкэр довулкар-өҥкувэнтэн, иудеемҥэл аргадюр авадилдивантан. 7. Иисус ноҥартакитан гөнин: “Екэлбу мөч милтэрэмкэлилрэ!”.Тарал дялкамканакатан, 8. Иисус ноҥартакитан гөнин: “Тек-нен хукуснидюр коланадяку нюҥэрэмҥэтки ҥэнулрэ”. Ноҥартан таралбу төкэснитэн. 9 10 9. Нюҥэрэмҥэ эч хар авгич-та вино бисивэн, тарав мөв хуккуччал-такан кэлмэл харитан. Төми-дэ коланадяку нюҥэрэмҥэ амтаттин эмучэвутэн мөв вино очав, ноҥан олдаддив эририн 10. Нян гөнин: “Бэйтэн нонанкана аидмару виноҥи итагготтан, нян харулракатан-мак- кэнелидмэру, хи-дэмэр эрэклэ аю винов дяючиддис”. 11 11. Эчин дюлэги мямсив хонии Иисус галилеямҥал городаҥнатан ичукэнин, Мэн ҥэрим эскэвми-дэ. Ноҥман хупкучиддилни-дэ тэдич тэдеритэн. 12 12. Эрэк елтэнчэлэн Ноҥан, Энидмэр, нөҥилни хупкуттиҥэлни-дэ Капернаумна эмритэн, тала адив-да инэҥу биситэн. 13 14 13. Иудеямҥал Пасхаҥатан далилрин. Иисус Иерусалимтаки эмрин 14. Иттин-нен нэҥэдек дюлан унимэчэдеку волалбу, овцалбу гираварбу-да, таргачинни-та-да иттин-дэ бэилбу, тэгэчиддилбу тамаҥалбур гаймачиддилбу. 15 16 15. Иисус хятталдивум хет усидук орин, нян эйдувутэн бэилбу, овцалбу волалбу-да ньөвкэнин. Ноҥан тамам гаймачиддилбу эйдувутэн көҥкиникэн истолалбутан кумтэйкэттин. 16. Гираварбу унивкэчиддилтэки Иисус гөнин: “Галилра эдук эрэлбу. Мин Амму дюван эдилрэ харачакач овкан”. 17 18 19 17. Таракам Ноҥан хупкуттиҥэлни дьон он (Дукундула дукуттиван): “Хин Дюлис Мин урлиму Мину манран”. 18. Тали иудеямҥал гөнитэн: “ Иррөчим хамагчав илкуру мунду ичукэндинри, Хи тачимур некэннэлкэн италкан бисии?” 19. Иисус барагрин : “Хаюлра эрэв дюв, Би-нен иландули инэҥэлдули эрэв бичэгчинни илукандим.” 20 21 22 20. Тали иудеямҥал улгимир : “Эрэк нэҥэдек дюн дыгын-мяр нюҥэм анҥанив илубаддин, Хи-нен эрэв иландули инэҥэлдули бичэгчинни илудинри?” 21. Эрэкэси Иисус Мэн булгиси дюгулин гөнчэ. 22. Ноҥан көкэчэдукий арчалан, Ноҥан хупкуттиҥэлни дьонитан Иисус эрэв гөтлэвэн, тарич Дукатлав тэдеритэн нян төрэм-дэ Ноҥан гөнчэвэн. 23 24 25 23. Иисус Иерусалимна биҥсин Пасхав хэбдекэдеклэ, хоял бэил көечэл Ноҥан хояв мякичу мямсилбу ичукэнчэвэн, Ноҥан гэрбэвэн тэдеритэн. 24. Тарма Иисус Бэйди эч тэдеҥтэр ноҥарбутан, (кубэчутэн доли хами иррөчирни мэргэлкэр) мявурбутан хами. 25. Ноҥантакин ҥи-дэ эннэн укчэнэддэ, бэй дюгулин иррөчин бисивэн, Мэнкэн Иисус хари бисэкэн.