1 2 1.Субботадук гяла инэҥнэ Мария Магдалина олдустаки эмрин бадич бадикар, унэт хатасси биҥсин. Тала ноҥан иттин олдус уркэвэн нипкэтлэ дьол тикукэпчэвэн. 2. Ноҥан Симон Петртэки, хөнтэтки-дэ хупкучиҥтэки, Иисус аявриткин туттин, ноҥартакитан гөнин-дэ: “Хунҥив олдустук хөруритэн, мут-нен эсэп хар илэ Ноҥман нэчэвутэн”. 3 4 5 3. Петр гя-да хупкучиҥэн таракамат ньөритэн нян олдустаки хөрэмэлчиритэн. 4. Ноҥартан өмэтту хэтэкэнитэн, тарма гя хупкучиҥэн Петрдук хинмадмарач туттин, дюллэ олдустаки эмрин. 5. Нөҥкэриди, ноҥан дэсчирив булату иттин, тарбач эч олдус долан ир. 6 7 6. Амардадун Симон Петр эмрин, олдустаки ирин-дэ. Ноҥан нэдинмэил булатал дэсчиривутэн иттин, 7. Иисус диллон хэркуччэ-дэ булат булгис хэркутиҥдукун бэкэлэч хөнтэлэ чакалутти дэсчирив. 8 9 10 8. Таракам ирин гя-да хупкучиҥэн, дюлэгэч олдустаки эмчэ. 9. Ноҥан иттин тарич тэдерин-дэ. Ноҥартанкы унэт эчил хар Дукапчадук бисив, Иисус көкэриди араннаван. 10. Хупкуттиҥэлни мэртэкивур мучуритан. 11 12 13 11. Мария-нян олдус анчиндулан илатникан хоҥаддин. Хоҥадникан олдустаки эҥэнин. 12. Дьөрбу ангелалбу иттин-дэ, ньобатич оилкарбу. Тарал Иисус булгисэн дэсчичэлэн тэгэттитэн: өмэн дилан бичэлэн, гя-нян бөдэлэн бичэлэн. 13. Ноҥартан ноҥантакин улгэмритэн: “Ася! Ями хи хоҥанри?” Ноҥан таралтаки барагрин: “Мин Хунҥиву хөруритэн, эсэм-дэ хар илэ Ноҥман нэчэвутэн”. 14 15 14. Эчин гөниди ноҥан эсэнин, иттин, Иисус илаттан. Тарма ноҥан эч тамкар Ноҥман. 15. Иисус ноҥантакин улгэмрин: “Ася! Ями хи хоҥанри? Ҥив гэлэтэнри?”. Тарак садамҥач гэрбэттин, Ноҥантакин гөнин-дэ: “Хунҥи-бэе! Хи Ноҥман нэнэсчэ бими, минтэки гөли илэ Ноҥман нэчэи, би-нен Ноҥман гадим”. 16 17 18 16. Иисус тартаки гөнин: “Мария!”. Эсэниди ноҥан Ноҥантакин гөнин: “Раввуни!” - эрэк “Хупкучимҥэ” эчин гөнни. 17. Иисус тартаки гөнин:“Эди Мину хуҥриснэ, унэт-кэ Би эчу Мэн Амантакий ойчир. Мин нөҥилтэкиву-акнилтакиву ҥэнни, ноҥартакитан гөли-дэ: “Дэгэлэддэм Мэн Амантакий хун-дэ Амантакисан, Мэн Хэвкиткий хун-дэ Хэвкиткисэн”. 18. Мария Магдалина хөррин мэтурин-дэ Ноҥан хупкуттиҥэлтэкин, Хунҥив көечэй нян эчин-дэ ноҥантакин гөнчэвэн. 19 20 19. Хисэчин эрэкэт инэҥнэн, суббота елтэнчэлэн, Иисус хупкуттиҥэлни иудеилди ҥэлрэкэтэн, дю уркэлни нипкуттилбэ, Иисус эмрин. Тарал дулакандулатан Ноҥан илрин гөнин-дэ: “Аймун хунду!” 20. Эчин гөниди, Иисус ҥалалби олдами-да ноҥардутан ичукэттин. Хупкуттиҥэлни хокаҥчилритан, Хунҥив итми. 21 22 23 21. Иисус нян-да гөнни ноҥартакитан: “Аймун хунду! Он Мину Мин Амму эвэски эмэсэмкэнчэгчинни, таргачин-да Би-дэ хуну хөрукэнэм”. 22. Эчин гөниди, ноҥартакитан хуснэн ноҥартакитан гөнин-дэ: “Алимнилра Хэрэпчэв Ханим! 23. Ҥив төнҥэкичутэн тилгадис, таду-да тилгабдин, ҥилэ төнҥэкичутэн эмэндис, тала-да эмэбдин”. 24 25 24. Иисус эмэҥсин, ноҥарнюнтан мян-дьөрдук хупкуттиҥэлдукун өмэн ачча бисин - Фома, Гиркэлкэн гэрбуттитэн. 25. Хан хупкуттиҥэлни ноҥантакин гөнитэн: “Бу Хунҥив көеривун”. Тарбач тарак гөнин: “Эдлэй Ноҥан ҥаллан типкирэлдук гоюрбан иттэ, эдлэй-дэ типкирэч гоюмчалдулан мэн хогари хинра, мэн ҥали-да Ноҥан гоюмча олдандулан эдлэй нэд, этэм тэдер”. 26 27 26. Надан инэҥ елтэнчэлэн Ноҥан хупкуттиҥэлни нян-да дюла биситэн, Фома-да ноҥарнюнтан бисин. Уркэл нипкуттилбэ, Иисус эмрин, ноҥартан дулакандулатан илрин гөнин-дэ: “Аймун хунду!”. 27. Тадук Фоматки гөнин: “Эмули мэн хогари, көетли-дэ Мин ҥалалбу. Эмули ҥали Мин олдандулаву нэли, эди-дэ эти тэдетти бикир, тэдеттидэмэр били”. 28 29 28. Фома Ноҥантакин барагрин: “Мин Хунҥиву Мин Хэвкиву-дэ!” 29. Иисус ноҥантакин гөнин: “Хи тэденри Мину итмимэк. Несэлкэр ач итчэлэч тэдерил”. 30 31 30.Хояв хөнтэлбу-дэ мямсилба хомилба Иисус некрин, хупкуттиҥэлби көеридутэн, элэ книгала эчэл дукапта. 31.Эрэк-нен дукаптин, хун тэдедэсэн Иисус- Христос-Имтэвчэ, Хэвки Нярудан Хутэн бисивэн нян Ноҥан гэрбэдин илкэр бидэсэн.