1 2 3 1.Таракам Пилат Иисусу гадин нян Ноҥман хяттадатан итурин. 2. Кусимҥэл Ноҥан диллан дөнҥэпҥэн габардук хяттук утчав тэтуритэн, ҥулэнев мантияв (тэгэмэрэл тэтитэн урэччөн) ойган тэтуритэн. 3. Гөнитэн-дэ: “Хокаҥчили, Иудеил Тэгэмэрэтэн!”. Ноҥартан Ноҥан хячиндулан пасакритан. 4 5 6 4. Пилат нян-да ньөрин гөнин-дэ: “Би Ноҥман хунтэки ньөвкэнэм, ху хадасан, би Ноҥан як-та урэччөн ушкан этиву бакра”. 5. Таракам Иисус габардук хяттук утчач дөнҥэпэлкэн, ҥулэнеч-тэ мантияч оилкан ньөрин. Пилат ноҥартакитан гөнин: “Эр, Эрэк Бэй!” 6. Дюлэгэл нэҥэдюкэмҥэл бэгэсэлтэн кэлмэвчирил-дэ Ноҥман иттитэн, тарич иркалра: “Дарамкали, дарамкали Ноҥман!” Пилат ноҥартакитан гөнин: “Ху галилра, дарамкалилралу Ноҥман, би-ккы Ноҥан ушкан яв-да эсэм бакра”. 7 8 9 7. Иудеил ноҥантакин барагритан: “Муттулэ итун бисни тарич-нян мун итуҥчимун Ноҥан көкэннэн, Мэни Хэвки Хутэн бисиди гөникэн ичукэттилий”. 8. Таракам Пилат эчин төрэривутэн долдариди, ходмарач энтэкэе ҥэлэлрин. 9. Пилат нян-да преторияла ирин, Иисустэки улгэмрин: “Авгич Хи бисэнри?” Тарма Иисус ноҥантакин эч барагра. 10 11 10. Пилат ноҥантакин гөнин: “Минтэкимэн эсэнри баргутта-гу? Эсэнримэн Хи хар, би италкан бисиву Хину дарамкандай, таргачинни-да италкан бисиву мултудай-да Хину?” 11. Иисус барагрин: “Хи Миндулэ ач иррөчинни-дэ итла бимчис, эчэ Өйгич бөврэ бими, тарич эгдэч эгдедмэр төнҥэкич тала, ҥи хинду Мину бөчэлэ”. 12 13 12. Тачин гөнилин, Пилат гэлэтэсчирин онанирач Ноҥман мултусчидай. Тарма иудеил иркаритан: “Ноҥман мултуми-нюн, хи эсэнри кесарь гяматтин харакан бис. Ҥитэн мэни тэгэмэр бидэй некэсчири - тарак кесарь булэнни”. 13. Тарав төрэм долдариди, Пилат тадук Иисусу ньөвкэнин нян ургэдэмҥэ тэгэнмэйлэн тэгэснин Лифостротон еврейдич-нен Гаввафа гэрбэлэ. 14 15 16 14. Эрэк пятницала бисин, Пасха дюлдэлэн, нюҥэн час далилан. Пилат иудеилтэки гөнин: “Эр хун Тэгэмэрэсэн!” 15. Тарич тарал иркалритан: “Гали, гали, дарамкали Ноҥман!” Пилат таралтаки улгэмрин: “Дарамканмай хун Тэгэмэрусэн?” Дюлэгэл нэҥэдюкэмҥэл барагритан: “Муттулэ тэгэмэрэт ачча кесарьдук хөнтэ”. 16. Таракам ноҥан таралду Иисусу бөрин, Ноҥман тарал дарамкандатан. Ноҥартан Ноҥман гадидюр элгэснитэн-дэ. 17 18 17. Иисус Мэн креси төкникэн хопкэчэнтэки Лобное, еврейдич Голгофа гэрбэлэ ньөрин. 18. Тала-нян Ноҥман гөлиритэн креслэ дарамканикан. Ноҥнюнни тэриндулэн, ангидалан дегэндэлэн-дэ дьөрбу хөнтэлбу дарамканитан. Иисус дулакандула бисин. 19 20 19. Пилат дукум некрин креслэн типкэрин. Дукуттин: “ИИСУС НАЗАРЕТТУК, ИУДЕЯЛ ТЭГЭМЭРЭТЭН”. 20. Эрэв дукуттив хоял иудеил таҥритан, Иисус дарамкамчан төр городдук далила бисэкэн. Дукапча бисин еврейдич, гректич, римдич-тэ төрэрди. 21 22 21. Иудеямҥал дюлэгэл нэҥэдюкэмҥэл бэгэсэлтэн Пилаттаки гөнитэн: “Эди дуккир: “Иудеямҥэл Тэгэмэрэтэн”, дуклидамар “Ноҥан гөнин: “Би - Иудея Тэгэмэрэн бисэм”. 22. Пилат барагрин: “Яв би дукриву, тарав дукриву”. 23 24 23. Кусимҥэл Иисусу типкэридюр, таракам Ноҥан оилбан гадитан, дигэрмэн дэлкэритэн - кусимҥэтэнду өмэтэлди бориптин. Ноҥан ойон хитом-да гадитан, этив хаҥанапча бис, калратач илчапча бисин. 24. Ноҥартан мэр доли гөмэттитэн: “Эгэлрэ эрэв тадна, улунь улугэр ҥилэккэ хэндин, тарҥи-да бидиҥэвэн”, - эрэк тачин некэптин Дукундула гөпчэгчинни: “Мин ою мэр доливур боритматтитан, Мин-дэ тэтиливу уливэм усиҥэчиддитэн”. Тачин кусимҥэл некритэн. 25 26 27 25. Иисус кресэн хатлан Ноҥан энинни, Ноҥан энинни нөн Мария, Клеопа асиҥан, Мария Магдалина-да илаттитан. 26. Иисус эньми иттиди, дарань ноҥнюнни илаттив-да аяврии хупкучиҥи, энинтэкий гөнин: “Ася! Эр хин нярудас хутэс”.27. Тадук хупкуттиҥтэкий гөнин: “Эр хин энинси!”. Эдукут тарак хупкучиҥэн мэнтэкий эньмэн гадин. 28 29 30 28. Эрэк амардалан Иисус хами эйду биннэгчинни некэптивэн, Дукапча милтэрэнивэн, гөнин: “Коламсам!” 29. Далила екэ илаттин, милтэрэ дюисси виноч. Кусимҥэл губкав тарич виноч уласнидюр, иссоплэ набгиридюр Ноҥан хэмэнтэкин өгэрритэн. 30. Иисус дюиссив винов амтариди, гөнин: “Мудакаптан!” - дили ҥөҥкэрин тарбач көкэрин-дэ. 31 32 33 31.Тарак пятница бисэкэн, иудеимҥэл субботала эдэвур кресэлдулэ булгисэлбу эмэн - тарак суббота эгдень таҥабутти инэҥ бисэкэн- Пилаттаки гасчиритан таралбу көнчэрбутэн кабактавур, тарич-нян аталдавур кресэлдукутэн. 32. Кусимҥэл эмридюр көнчэрбутэн кабакритан дьөриҥивутэн Иисуснюн нокуттилҥилба. 33. Тарбач Иисустэки дагамми көкэчэвэн иттитэн. Ноҥартан эчил көнчэрбэн кабакра. 34 35 34. Тарбач ноҥардукутан өмэн кусимҥэ Ноҥан олдаман гидди хучиснин- таракамат-нян хуҥэл мөнюн өҥкэлбэснитэн. 35. Тарав көечэ эрэк дюгулин ичукэтникэн тэлэҥрин, тарак-нян тэдекич айдиту тэлэҥрин. Ноҥан хан, тэдекичу айдиту укчэнрий, ху тэдедэсэн. 36 37 36. Эчин некэптин Дукапча тачин милтэрэбдэн: “Ноҥан икирин этэн-дэ тимрэкэптэ.” 37. Таргачинни-да хөнтэлэ-дэ Дукун гөнин: “Ҥив хучисэнчэвур, Тарав көеччир”. 38 39 38. Тадук, эрэк амардалан Иосиф Аримафеядук - Иисус хупкучиҥэн, тарма тарав дяютти иудеилди ҥэлми- Пилаттаки гасчирин Иисус булгиссөн аталдай, Пилат дьокрин-да. Ноҥан (Иосиф) Иисус булгиссөн аталнассин-да. 39. Никодим-дэ эмрин, дюллэ долба Иисустэки хөллөччэ, смирнадук алоэдук-та хэсинмэю очав эмуникэн, нямакли литрав. 40 41 42 40. Ноҥартан Иисус булгиссөн гадитан, нэдинмэй булатач унҥэгдич имрэнь хэсиридюр хэркэритэн, иудеил иткачинтан нэдеку некэдми. 41. Иисусу нокадяклатан төрлэ сад бисин. Тала садла анҥамта (көкэчэв) нэлдивун олдус улыпчэ бисин, унэт ҥив-дэ эчэ нэптэ, энтэрэн. 42. Иудеил пятницаҥатан бисэкэн нян тарак олдус тадук дали бисэкэн, тала Иисусу нэдитэн.