^{1 2 3} 1. Эчин  гөниди Иисус  хупкуттиҥэлнюми  Кедрон  эени  гяла  бардаткин  хөррин. Ноҥан  Мэн  хупкуттиҥэлнюми  тала  биси  садла  ирин. 2. Эрэк  бисивэн  Ноҥман  бөсчидди-дэ  харин, Иисус  эрэгэр  Мэн  хупкуттиҥэлнюми  тала  чакабгараракатан. 3. Иуда нэҥэдюкэмҥэл  бэгэсэлдукутэн  фарисеилдук-та,  кусимҥэл  отрядутан  нян  нэҥэдекли  кэлмэвчимҥэлбу-дэ  гадиди  тартаки  ҥэнрин, хявичиҥалкар, тогалкар  усэлкэр-дэ. ^{4 5} 4. Иисус  ханикан, як  Ноҥнюнни  биннэвэн, дэпки  ньөрин  ноҥартакитан  улгэмрин-дэ: “Ҥив  гэлэтэс?” 5. Ноҥантакин  барагритан: “Иисусу  Назареттук”. Иисус  ноҥартакитан  гөнин: “Эр  Би  бисэм”. Ноҥарнюнтан  бөдди  Ноҥман  Иуда  илаттин. ^{6 7} 6. Иисус  ноҥартакитан  гөнэкэн “Эр  Би  бисэм”- ноҥартан  амаскидаснидюр  төрлэ  хэткэнитэн-дэ. 7. Иисус  нян-да  таралтаки  улгэмрин: “Ҥив  гэлэтэс?” Ноҥартан  барагритан: “Иисусу  Назареттук”. ^{8 9} 8. Иисус  гөнин :“ Би  эрэк  бисий гөнэм. Мину  гэлэтми, ноҥарбутан  эмэлилрэ, хөрдэтэн”. 9. Эчин  некэптэн  Ноҥан  гөтлэгчинни: “Хин  Минду  бөчэлдукус  Би  ҥив-дэ  эсэм  көкэвкэн”. ^{10 11} 10. Симон  Петрлэ  хинҥапан  бисин. Ноҥан  нугаснан  тарав, нэҥэдимҥэл  бэгэнтэн  кэлмэн  ангидаван  кориттон  чикас  хонаснин. Кэлмэ Малх  гэрбэн  бисин. 11. Тарбач  Иисус   Петртэки  гөнин: “ Эникили  хинҥапам  эникилэн. Би  эннэвумэн  Амми  Минду  бөчэвэн  чашав  колра?” ^{12 13 14} 12. Таракам  кусимҥэл  тисичэли  бэгэррил, иудеил-дэ  нэҥэдек  дюлан  кэлмэвчириҥэлтэн  Иисусу  хэпкэнитэн  чэҥгэйритэн-дэ  Ноҥман. 13. Ноҥартан  нонан  Аннатки  ҥэнукэнитэн, нэҥэдюкэмҥэл  дюлэг  бэгэнтэн  Каиафа  эткин  бисэкэн. 14. Эрэк тарак Каиафа бисин иудеемҥэлтэки  ҥунэмкэм  бөчэ, өмэндэмэр  бэй  эйдулин  бэилдули  көкэрэкэн  элэкэдмэр  биннэвэн, эйдун-дэмэр  бэй  көкэдҥэдукутэн. ^{15 16} 15. Иисус  амардадун Симон  Петр  хөнтэ-дэ  хупкучиҥэн  ҥэнэддитэн. Тарак  хупкучиҥэн  дюлэг  нэҥэдюкэмҥэл  бэгэрриҥнюнтэн  хаматтин, төми-дэ  Иисуснюн  дюлэг  нэҥэдюкэмҥэл  бэгэнтэн  хиткин  долан  ирин, 16. Петр-нен  төлгидэлэн  уркэ  далилан  илачиддин. Тарич  хөнтэ  хупкучиҥэн, дюлэг  нэҥэдюкэмҥэл  бэгэрринюн  хаматти, ньөн, кэлмэвчири  асинюн, инмэю  уркэв  этумҥэнюн  укчэнмэчиснин, тарич-нян  Петру  ивкэнин. ^{17 18} 17. Эрэк  аси  кэлмэвчири  Петртэки  улгэмрин: “Хи-нен  эсэнри  Эрэк  Бэй  хупкучиҥэлдукун  бисы?”. Ноҥан  гөнин: “Эсэм”.18. Элэ  болал  нэҥэдеклэ-дэ  кэлмэвчирил,  гулум  гулуридюр  илгалаҥчиритан  иҥэнсэкэн  хуличидникар. Петр  тачин-да  таралнюн  илачиддин  хуличидникан. ^{19 20 21} 19. Дюлэгэтэн  нэҥэдюкэмҥэл  бэгэнтэн  Иисусу  улгимирин  Ноҥан  хупкуттилни  дюгулитэн, Ноҥан  хупкучинҥэвэн-дэ. 20. Иисус  ноҥантакин  барагрин: “Би  бэилтэки  аҥаттич,  эникэн  дикэҥчир  төрэвэттэм. Би  эрэгэр  синагогала  нэҥэдек  дюлан-да  хупкучиддьөттэм,  иудеил  чакабуттилатан,  яв-да  эчу дяютникан  төрэр. 21. Ями  Мину  улгиминри? Улгэмни  ҥи  долдачалтаки, яв  Би  ноҥартакитан  төрэриву. Ноҥартан  хар  яв  Би  төрэчэву.” ^{22 23 24} 22. Ноҥан  тачин  гөнчэлэн, өмэн  нэҥэдеклэ  кэлмэвчимҥэ, далилан  илатти, Иисус  хячиндулан  пасакларин  гөнин-дэ: “Он  Хи  баргучинри  дюлэг  нэҥэдюкэмҥэл  бэгэнтэкитэн?” 23. Иисус  ноҥантакин  барагрин: “Би  кэнелич  бараграку, гөли  як  тарак  кэнеливэн. Аич-нян  бараграку,  тарбач  яли хи  Мину  пасакланри?” 24. Анна  чэҥгэюттив  Иисусу  нэҥэдюкэмҥэл  дюлэгэтэн  бэгэнтэкитэн  Каиафатки  хөрукэнин. ^{25 26 27} 25. Симон  Петр  илатникан  хуличиддитки улгэмритэн: “Хи  эсэнринир  Ноҥан  хупкучиҥэлдукун  биси  бисы?” Ноҥан  янурин  гөнин-дэ: “Эсэм”. 26. Өмэн  нэҥэдюкэмҥэл  дюлэг  бэгэнтэн  кэлмэн, Петр  өтэл  бол  кориттон  хонасанчан  ханин, гөнин: “Эчу  хинуккы  би  көеры  Ноҥнюнни  садла?” 27. Петр  нян-да  янулрин,  тарбач  тарканду  петух  иркалрин. ^{28 29 30} 28. Каиафадук  Иисусу преториятки  ҥэнукэнитэн. Бадикар  бисин. Ноҥартан  преторияла  эчил  ир, хагами́  эдэвур  төнҥэкичту дававра, пасхав  дебэнмэюр  дебдэвур. 29. Пилат  ноҥартакитан  ньөрин  гөнин-дэ: “Яли  ху  Эрэв  бэю  ушалтачис?” 30. Ноҥартан  барагритан: “Ноҥан  эсэкэн  ушалкан  бис, бу  эмчилбун  хинду  бөр”. ^{31 32} 31. Пилат  ноҥартакитан  гөнин: “Ху  Ноҥман  галилра,  мэр  итуҥчимур  ургэдэлилрэ  Ноҥман”. Иудеил  Ноҥантакин  гөнитэн: “Мунду  ҥив-дэ  көкэнтэки  ургэдэнмэйгэкун  эч  илупта”. 32. Эчин  Иисус  Төрэнни  милтэрэнни, унувкатми  гөтлэн  иррөччин  исмерэч  Ноҥан  көкэннэй. ^{33 34 35} 33. Таракам  Пилат  нян-да  преторияла  ирин,  Иисусу  эририн  Ноҥантакин  улгэмрин-дэ: “Хи  Иудеял  Тэгэмэрэтэн   бисэнри?” 34. Иисус  гөнин: “Хи  мэндукий  эрэв  гөнэнри  таргу  ҥи-дэ  хөнтэл  Мин  дюгуливу  хинтэки  тэлэҥритэн?” 35. Пилат  барагрин: “Би  иудеймэн  бисэм? Хин  ҥунмерэҥэс  нян  дюлэгэл-дэ  нэҥэдюкэмҥэл  бэгэсэлтэн   Хину  минду  бөритэн.  Хи  яв  некрис?” ^{36 37} 36. Иисус  барагрин: “ Мин  Тэгэмэрэдеку  эсни  элэ  биньилэ  биси  бис. Мин  Тэгэмэрэдеку  элэ  биньилэ  биси  бисэкэн,  Мин  кэлмэлбу  Миндули  кусикэчимчил,  Би  эдэку  иудеилду  бөврэ,  тарма  Мин  Тэгэмэрэдеку  эсни  эдук  биси  бис.” 37. Пилат  Ноҥантакин  улгэмрин : “Тарбач  эчин  Хи  Тэгэмэр  бисэнри?” Иисус  барагрин: “Хи  гөнэнри  Би  Тэгэмэр  бисидиву. Би  элэ  төр  биньилэн  балдариву  эвэски-дэ  биньитки  эмриву  тэлэҥдэй  тэдекич  айдит  дюгулин. ^{38 39 40} Тартан, ҥи  тэдекич  айдиттук  биси   Мин  дилгаму  долчин”. 38.  Пилат  ноҥантакин  гөнин: “Як  гэрбэн  тэдекич  айдит?” Эчин  гөниди,  нян-да  иудеилтэки  ньөрин  ноҥартакитан  гөнни: “Иррөчим-дэ-тит  Ноҥан  ушкан  эсэм  бакра.” 39. Хун  некэвундулэсэн  итасан  бисни,  би  Пасхасан  балин  өмэм  хунду  тинмэйгэку. Хунду  Иудеил  Тэгэмэрутэн  тиндэку  некэсы?” 40. Таракам   кубэччур  иркалра: “Эди  Ноҥман , Вараввадмару!”. Варавва  теникэн  мамаган  бисин.