1 2 1. Эчин гөниди Иисус нянинтаки ичиснэн гөнин-дэ: “Ама! Илун эмрэн, Мэн Хути эскэвҥэн некукэли, Хин Хутэс-тэ Хину-дэ эскэвэлукэндин. 2. Хиккы Ноҥандун эҥигэн бөрис бэйтэн өйдэдун бидэн. Кубэттун яв Хи Ноҥандун бөчэдус этив мудна иҥэтэн бөдэн. 3 4 5 3. Эти мудна инмэй, таракаси Хину ха́ланмайилкан бидэн, - Өмнив Тэдекичу Хэвкив Хин эмэсэмкэнчэвус-тэ Иисусу Христосу- Имтэвчэв. 4. Би Хину төрлэ, эскэлукэниву, Хин некэнмэю Минду нектэку илкэнчэвус мудакриву. 5. Тек-нен Хи, Ама, эскэлукэли Мину, тарич эскэвунь, Бэйди Мэн эскэвунди, Нонаптукун төр эдлэн опта, Би Хиндук эскэвлэтичлэву. 6 7 8 6. Би Хин гэрбэвус бэилду аҥариву , Хин Минду элэ биньилэ бөчэлдус. Ноҥартан Хинҥил биситэн, Хи Минду ноҥарбутан бөрис, ноҥартан-нян Хин Төрэмус нэкчиритэн. 7. Тек ноҥартан унур, эйду яв Хи Минду бөрис - Хиндук бисивутэн. 8. Хин Минду бөчэлбус Төрэрбу, Би ноҥардутан бөчэ бисэку. Ноҥартан таралбу Төрэрбу гадитан нян унуритан тэдекич айдиту, Би Хиндук эмчэву, тэдеритэн-дэ Хи Мину эмэсэмкэнчэвус. 9 10 11 9. Би ноҥартан дюгулитэн гасчирам. Эсэм эйдун төр бэин дюгулин гасчир, тарбач Хинтэкэн бөчэлси дюгулитэн гасчирам, ноҥартан Хинҥил бисэкэтэн. 10. Эйду як Минҥи биси - Хинҥи нян Хинҥи-дэ як биси - Минҥи, таралдули Би эскэлукэнэм. 11. Би -нен укал эсэм элэ биньилэ бис, тарма ноҥартан элэ биньилэ эмэптэ, Би-дэ-мэр Хинтэки ҥэнэддэм.Хэрэпчэ Амму!Одяли ноҥарбутан Мэн гэрбэдукий, ирэлбу Хи Минду бөтлэлби, ноҥартан өмҥэчин бидэтэн, Муткэчин-дэ. 12 13 14 12.Би элэ ноҥарнюнтан биҥсий, Би ноҥарбутан этуриву Хин Гэрбэс балин. Хин Минду бөчэлбус, Би этуриву, ҥи -дэ ноҥардукутан эч көкэр, көкэнмэй хуттукун хөнтэ, тарак некэптин тачин Дукапча бисигчинни обдан. 13. Тек-нен Би Хинтэки хөррэм, гөнэм-дэ эрэв эртэки төр биньиткин, Мин мудаклин хокму ноҥардулатан-да бигрэдэн. 14. Би ноҥардутан Хин Төрэмус бөриву, төрлэ бисил тали ноҥарбутан тикулра, эсэкэтэн төр биньигчинни биньитэн бис, Мингэчинни этигчиму эдук төрдук бисигчин биси бисэку. 15 16 17 15. Эсэм гасчир, Хи ноҥарбутан эдук төрдук гадас, тарбач гасчирам ноҥарбутан уштук этудэс. 16. Ноҥартан эстэн эргэчин төр биньидукун бисил бис, Мингэчинни-тэ-дэ этигчиму эдук биньидук бис. 17. Хэрэли ноҥарбутан Мэн тэдекич айдитчи: Хин төрэнси- эрэк тэдекич айдит. 18 19 18. Хи Мину эртэки төр биньиткин эмэсэмкэнчэгчинси, таргачини-та-да Би-дэ ноҥарбутан хөрукэниву төргидэ биньиткин. 19. Би ноҥардулитан Мэни бөрэм, ноҥартан-да тэдекич айдитач хэрэпчэл бидэтэн. 20 21 20. Эсэм ноҥартантакан дюгулитэн гасчир, тарбач тарал-да дюгулитэн, ҥи ноҥартан тэлэҥрилитэн Мину тэдедин. 21.Эйдудюр өмҥэчин бидэтэн. Хингэчин, Ама, Миндулэ бисигчинси, Би-нен Хиндулэ бисигчиму, таргачинни ноҥартан Муттулэ өмҥэчин бидэтэн, тарич бэил тэдедэтэн, Хи Мину эмэсэмкэнчэвус. 22 23 22. Эскэвум -дэ Хи Минду бөчэвус, Би ноҥардутан бөриву: ноҥартан өмҥэчин бидэтэн Мут өмҥэчин бисигчинти. 23. Би ноҥардулатан бисэм Хи-нен Миндулэ бисэнри. Ноҥартан өмҥэчин биситэн мудаклин мудакапча бидэн, бэил хамалкадатан, Хи Мину эмэсэмкэнчэвус ноҥарбутан аявалдатан-да, Мину аявалчагчимур. 24 24. Ама! Би аяврам, тарал ҥив Хи Минду бөчэлси, Мин-нюн бидэтэн Би бисилэву, ноҥартан Мин эскэвму иттэтэн, Хин Минду бөчэвус, Мину аявалми эрэк Буг унэт эдлэн томгипта. 25 26 25. Айдитамҥа Амму! Буг эсэкэн-тит Хину хамалкар, Би хамалкарам Хину. Ноҥартан-да Хи Мину эмэсэмкэнчэвус хамалкар. 26. Би ноҥардутан Хин гэрбэвус аҥариву, унэт-тэ аҥадим, аяван Хин Мину аявалчас, ноҥардулатан бидэн Би-дэ ноҥардулатан бидэку”.