1 2 1. “Эрэк эчин гөнэм хунтэки, ху эдэсэн халдя́ҥрур. 2. Хуну синагогадук эрэсчир. Эррөчин инмэй биньин оддан, ҥитэн хуну мадди, тарак тарич тачин Хэвкиду кэлмэвчиддиди гэрбэтчин. 3 4 3. Тачин хуннюн неккэрэдир, эчэл Амму-да, Мину-дэ хамалкар бими. 4. Тарбач Би хунтэки эрэв гөнэм, эрэк биньи илунни эмрэкэн, ху дьоҥрадасан эрэк дюгулин Мин гөҥрэчэву. Эрэв Би нонаптукун хунтэки эчу гөҥрэр, хуннюн өмэтту бими. 5 6 7 5. Тек-нен Би Мину Эмэсэмкэнчэтки хөрэддэм, нян ҥи-дэ хундук эсни Минтэки улгимир:“Аваски хөрэдинри?” 6. Тарма Тачин Мин хунтэки гөнидукуву, хун мявунсан набусач милтэрэнни. 7. Тарбач, Би хунтэки тэдекичу гөнэм: хунду аидмар бидин Би хөррэкудэмэр, Би эсэку хөррэ Олагачимҥа этэн хунтэки эмрэ, хөрми-дэмэр хунтэки Ноҥман эмэсэмкэндим. 8 9 10 11 8. Ноҥан эмриди, төр ҥунмердун төнҥэкичитэн, айдит нян ургэдэдек-тэ дюгулитэн аҥадин: 9. Мину эми тэдер төнҥэкичутэн. 10. Айдит дюгулин- Би Мэн Амантакий хөрриву, эннэвусэн-дэ Мину иттэси. 11. Ургэдэн дюгулин- эрэк төр тэгэмэрэн ургэдэвчэвэн. 12 13 14 12. Унэт-тэ хунтэки гөннэву хоя бисни, тарма ху тек туркудис унэт унуҥа. 13.Ноҥан, тэдекич Ханинни эмдин, таракам хунду гэрбэтэҥтэки тэдекич айдиталтаки ҥунэмкэччин, эмиккы Мэндукий гөни бис, тарбач төрэдин яв долдарий, хунтэки тэлэҥдин дюлэски-дэ як биннэвэн. 14.Ноҥан Мин эскэвҥэку некчин, Миндук гачай бисэкэн, тэлэҥдин-дэ хунтэки. 15 16 15. Эйду як Амандулаву биси, Миндулэ бисни, төми Би гөниву, Миндук ганнаван нян хунтэки тэлэҥэннэвэн-дэ. 16. Укал далила Мину этэс иттэ тадук-нян далила нян-да Мину итчис, Биккы Амантакий ҥэнэддэм”. 17 18 17. Эрич эду, хан Ноҥан хупкуттиҥэлни мэр доливур улгимимэчилрэ: “Эрэк яв Ноҥан муттэки гөнни: “Укал далила Мину этэсэси иттэ, нян далила-да Мину итчис-тэ нян-да” нян “Би Амантакий ҥэнэддэм”? 18. Эр эчин ноҥартан гөндиддитэн: “Як дюгулин Ноҥан гөнни “укал далила”? Эсэп унур як дюгулин гөнивэн” 19 20 21 19. Иисус Ноҥантакин улгимимсивутэн унуриди, ноҥартакитан гөнин: “Би гөнчэву-гу дюгулин ху мэр доливур улгимимэчис: “Укал далила Мину этэс иттэ, тар-нян далила нян-да итчис Мину”? 20. Тэдекич тэдю хунтэки гөнэм: ху хоҥаддис этэрэддис-тэ, төр ҥунмерэн-дэмэр хокаҥчидин. Ху набучиддис, тарбач хун набучинсан өрустэки хукэсэбдин. 21. Аси хути балдавкандидми, хиладдьоттан, илуми эмрэкэн, тарбач хулиҥгай балдавканиди, тарамалдут хилаччай омҥаваттан, өрэлдэридукий, бугла бэй балдаракан. 22 23 24 22. Таргачинни-да ху-дэ тек набучис, тарбач Би нян-да хуну итчим, хун-дэ мявурсан өрусэч милтэрэндир, ҥи-дэ этэн тер хундук хун өрусэҥусэн. 23. Тарав инэҥу ху Минтэки як-та дюгулин этэс улгимир. Тэдекит тэдекичу хунтэки гөнэм: явул Амандукуву Мин гэрбэдукуву гасчиракасан- хунду бөдин. 24. Элэ истала ху яв-да эчилсэн Мин гэрбэдукуву гасчир. Гасчилилра гадиста, хун өрусэҥэсэн милтэрэ бидэн. 25 25. Элэ истала хунтэки унувкачин төрэгрэрэм, тарбач тек илун эмрэн этэмэси хунтэки унувкачин төрэгрэр, тарич ҥунэч хунтэки укчэндим Амми дюгулин. 26 27 28 26. Тарав инэҥу Мин гэрбэдукуву гасчидис. Би эсэм-дэ гөн, Амантакий гасчиннади хун дюгулисэн: 27. Аммукка Мэнкэн хуну аявран, ху Мину аявалрилисан, тэдерилисэн-дэ Би Амандукий эмчэ бисиву. 28. Би Амандукий ньөриву, эртэки төр биньиткин эмриву. Тек эрэв төр биньивэн эмэнэм нян Амантакий ҥэнэддэм. 29 30 31 29. Ноҥан хупкуттиҥэлни Ноҥантакин гөнитэн: “Эр тек Хи ҥунэч төрэнри, як-та урэччөн унувкачим эсэнри тэлэҥэнрэ. 30. Тек көеру, Хи кубэччөн харивус, этивус яв-да ҥив-дэ улгимидюкэн Хинтэки. Тарич төми тэдеру Хи Хэвкидук эмчэвус”. 31. Иисуc ноҥартакитан барагрин: “Тек тэдесы? 32 33 32. Эр тек илун дагамаддан, укал-да-лу одни, ху ҥитэн бисил мэркэтэкэр мэнгидэткивур боргасандис Мину-дэ өмэккэм эмэндис. Нян Би эсэм өмэккэн бис, Амму Миннюн бисэкэн. 33. Эрэк Би хунтэки гөнэм, Миндулэ ху аймулкар бигрэдэсэн. Биньилэ хун инсэн хилусалкан, набусалкан бигрэдин, тарбач киҥкич бэйкэҥчилрэ: Би төр бинивэн дабдавканам”.