1 2 1. “Би- тэдекич виноград эн бисэм, Мин Амму-нян – виноградамҥа. 2. Миндук хечэв хэгтэв, этив айҥав хевкэн, тарав Ноҥан гараваттан. Тарбач айҥав хевкэнитэм хэгтэв, Ноҥан аич гелбэккөттэн, унэт тадук хоядмару айҥав эмулдэн. 3 4 3. Ху укал гелбэкэвчэл бисэс Төрэндули, Мин хунду тэлэҥчэливу. 4. Бипкэч Миндулэ (Мин долаву) бидлилрэ, Би-нен хундулэ-дэ бидим. Хэктэ бэйди мэнкэн эвэттигчинни яв-да айҥав хевкэн, эникэн хопкандулай бипкэдун набгаҥчир, таргачинни-та-да ху-дэ эми Миндулэ набгаҥчиникан бис. 5 6 7 5. Би-лоза (хопкан) бисэм, ху-нен- хэгтэл, хопкан хэгтэлни бисэс. Ҥи Миндулэ бидди, Би-дэ ноҥандулан, тарак хояв айҥав хевкэвэттэн, таракаси эчин, ху ач Миннэч яв-да туркудис некҥэ. 6. Ҥи Миндулэ эти биддэ, тарак-та мукэсэмдин, хэгтэгчин, нян котиндин-да. Таррочилбан хэгтэмиелбэ чаккотта нян тогла улэвэттэ, тарал дуррөттэ-дэ. 7. Миндулэнюн бими, Мин төрэрбу-дэ хундулэ бипкэ бисэкэтэн, тарич яв гасчимсивур гасчилилра, хунду бидин (бөбдин). 8 9 8. Мин Амму эскэвдин, хун хояв айҥав хевкэнилисэн, Мин хупкуттиҥэлбу-дэ бидис. 9. Он Мину Амму аявалрин, таргачинни-та-да Би-дэ хуну аявалриву. Мин аявандулаву бидлилрэ. 10 11 10. Мин Итуҥчиму аич одяникан некэддэкэсэн, тарич Мин аявундуву бидис, он Би Мэн Амми Итуҥчинни некриливу, тарич Ноҥан аявундун бисигчиму. 11. Эрэк Би хунтэки гөнэм, Мин өрэҥчиму хундулэ бидэн, хун өрусэҥэсэн милтэрэ бидэн. 12 13 12. Эр Мин Итуму: мэр доливур гя гянур аявматлилра, он Би хуну аявалчагчиму. 13. Хулэк эгдедмэр аявун ачча, тадук аявундук, ҥи мэн гянилдулий мэн ими бөридукун. 14 15 14. Ху- Мин гяматтилбу гянилбу бисэс, Мин Итуму милтэрэч некрил-нюн бими. 15. Би хуну болалди эсэмэсил гэрбуттэ, бол эсни хаватта мэн хунҥии яв некэддивэн. Би хуну гянилди гэрбурэм, кубэччөн яв Мэн Амандукий долдачай хунтэки тэлэҥчэ бими. 16 17 16. Эчилсэн ху Мину хинмар, тардамар Би-дэ-мэр хуну хинмариву, хуну илуриву ҥэнникэр айҥав оттасан, хун айҥав отчасан ичурич эмэбдэн, Амму-да эйдувэн явул Мин гэрбэдукуву Ноҥандукун гасчиснивусан, бөгрэдэн. 17. Хунду Итурам: аявматлилра гя гявур. 18 19 18. Эрэк төр ҥунмерэн хуну тикунакан-нюн, тарбач-нян халилра, Минэдмэру тикулритан дюлэгэч хуну тикулридукур.19. Ху эрэк төр ҥунмерэлни бисил бисэкэсэн, эрэк төр ҥунмерэн аявамча хуну ноҥҥин бисэкэсэн, тарбач-нян ху эсэкэсэн эрэк буг ҥунмерэн бис, Биккы хуну эдук бугдук хинмариву, тарич төми эрэк буг хуну тикунни. 20 21 22 20. Дьоҥчилилра Мин гөнчэву Төрэм: кэлмэ мэн хунҥидукий эсни эгдедмэр бис.Мину тасачча́л бими, хуну-дэ тасаччир. Мин Төрэму одяникар нэкчичэл бими, хунҥив-дэ одяникар нэкчидир. 21. Таракаси эйдувэн тачин некчир хунду Мин гэрбэливу, Мину эмэсэмкэнчэв эми хар. 22. Би эчэ эмрэ бисэку, эчэ-дэ ноҥартакитан укчэнрэ бисэку, эмчил-дэ төнҥэкичилкэр бис, тек-тэ-мэр тарбач мэр төнҥэкичлэвур эннэтэн айдиткавур бакра. 23 24 25 23. Тарак ҥи Мину тикуни, тикунни Мин Амму-да. 24. Би эчэ ноҥартан дулакандутан некэнҥэв некрэ, ҥи-дэ хөнтэ эчэвэн некрэ, тарич эмчил-дэ төнҥэкичилкэр бис.Тек-нен иттитэн нян тикулритан Мину-дэ, Мин Амму-да. 25. Тарбач, яданул төрэсэпчэ төрэн истиҥаван, ноҥартан итундулатан дукапча: “Экичич як-та бис Мину тикулра”. 26 27 26. Олагачимҥа эмриди, Би Амандукий эмэсэмкэнэку- Тэдекич Тэдь Ханьман, Амандукуву эмри, Ноҥан Мин дюгуливу ичукэтникэн укчэндин. 27. Таргачинни-да ху-дэ ичукэтникэр укчэнгэрэдис, дюллэттэ нонаптукун Мин-нюн ху бичэл бими”.