1 2 1. Пасха далилракан, Иисус Амантакий эдук биньидук хөрэннэй илунни одиван хами, төми ичукэнин элэ бисилбэ Мэнҥилби аявалми, ноҥарбутан эрэглэдун мудаклан аявалран. 2. Хисэрудек одакан укал ариҥка Иуда Искариот, Симон хутэн мявундулан Иисусу хипкэкич бөдэн мулгаҥан ивкэнин. 3 4 5 3. Иисустэмэр Амми эйдувэн Ноҥан ҥаллан бөчэвэн ханикан, Хэвкидук эмчэй, Хэвкитки-дэ хөрэддий, 4. Хисэрудектук илрин, оиги ойи нукрин нян калбаладай аваку гадин. 5. Тадук-нян авадинмайла аликла мөв өҥкэрин нян хупкуттиҥэлби бөдэлэлбутэн авадилрин, калбалачади авакач илэҥэруникэн. 6 7 8 9 6. Иисус Симон Петртэки дагамракан тарак гөнин: “ Хунҥи-Бэе! Хи-мэн мин бөдэлэлбу аваннас?” 7. Иисус Ноҥантакин барагрин: “Би яв некэддиву тек хи эсэнри унур, амарламак унудинри”. 8. Петр Ноҥантакин гөнин: “Ок-та-тит мин бөдэлэлбу этэнри авра!”. Иисус барагрин: “Эсэку хин бөдэлэлбус авра, Мин-нюн эти га́саматта бидинри”. 9. Таракам Симон Петр гөнин: “Хунҥи-Бэе! Эди бөдэлэлбуткэн авкир, тарбач ҥалалбу-да, дилу-да авли!” 10 11 10. Иисус ноҥантакин гөнни: “Авапчав бөдэлэлбэн-тэкэн аванмай, бумҥади ноҥан гелбэти. Ху-дэ гелбэтил бисэс, тарма эсэс эйдудюр гелбэтил бис”. 11. Ноҥан харин Мэн хипкэкэч бөмҥэй, төми-дэ гөнин: “Ху эсэс эйдудюр гелбэтил бис”. 12 13 14 15 12. Иисус бөдэлэлбутэн аваддиди, Мэн оилби-да тэттин, тарич нян-да талат-та дебэдеклэ олдапкиҥчидилрин нян ноҥартакитан гөнин-дэ: “Ху унус-та яв Би хунду некриву? 13. Ху Мину Хупкучимҥэч Хунҥич-та гэрбуччөчис, эрэк-нен айдит тачин, таргачинни Би-ккы - айдитчин гөнигчинсэн Ноҥан бисэм. 14. Эрэкэси эчин, Би, Хунҥи Хупкучимҥэ-дэ биникэн, хун бөдэлэлбусэн аврам, таргачин ху-дэ мэр доливур, гя гянур бөдэлэлбур авмачиннасан.15. Биккы некэнмэйгэсэн илуҥэсэн бөрэм, ху-дэ неккэрэдэсэн он Би хунду некчэгчиму. 16 17 18 16. Эливун тэдекичу тэдю гөнэм хунтэки: кэлмэ мэн хунҥидукий эсни эгдедмэр бис, таргачинни-та-да хөрукэмчэ-дэ ноҥман хөрукэнчэдук эсни эгдедмэр бис. 17. Тарав харил-нюн бими, тарбач тарич ху несэлкэр бисэс, таргачинни некэдми. 18. Эсэм хун эйдусэн дюгулисэн гөн. Би харам ҥив хи́нматлай. Тарбач Дукундула Дукапча бисигчинни некэбдэн “Миннюн килебу дебэдди, Минтэки мэн халгами өгэррэн”. 19 20 19. Тек дюлдэкиду хунтэки гөнэм, тачин некэлэптэкэн ху тэдедэсэн , эрэк Би бисиву. 20. Эливун тэдекичу тэдю гөнэм хунтэки: “Би ҥив эмэсэмкэниву аич арчани - тарак Мину-дэ аич арчанни, тарак-нян ҥи Мину аич арчани- тарак аич арчанни Мину Эмэсэмкэнчэв-дэ”. 21 22 21. Эчин гөниди Иисус ханинди мэргэрулрин укчэнрин-дэ: “Эливун тэдекичу тэдю гөнэм хунтэки, хундук өмэн Мину хипкэкэч бөдин”. 22. Таракам хупкучиҥэлни мэр доливур ичимэлдэмэчилритэн, эми унур ҥи дюгулин Ноҥан гөнивэн. 23 24 25 23. Өмэн Иисус хупкучиҥэлдукун, Ноҥан аяврин, тиҥэндун дэсчирин. 24. Симон Петр тартаки унувкаттин, улгэмдэн, ҥи дюгулин Иисус гөнивэн. 25. Тарак Иисус тиҥэнтэкин набганиди, Ноҥантакин улгэмрин-дэ: “Хунҥи! Ҥи эрэк?” 26 27 26. Иисус барагрин: “Би тарак ҥиду килеб гигнэвэн умисниди бөриву”. Нян килебу умисниди Иудаду Искариотту, Симон хуттун бөн. 27. Иуда тарав килебу гадакан, сатана ноҥандулан ирин. Тарич Иисус ноҥантакин гөнин: “Яв некэддий хинмамакан некли”. 28 29 30 28. Тарма ҥи-дэ дебэдеклэ олдаиддилдук эч унур, ятки Иисус ноҥантакин эчин гөнивэн. 29. Иудала худөк бисэкэн, хан мэргэттитэн, Иисус явул хэбдектэки некэнмэю тарак унидэн гөнидин, тарул явул хилрилду бөдэн. 30. Иуда Искариот, гигнэв гамнин, таракамат ньөмэлчирин.Эрэк долба бисин. 31 32 33 31. Тарак ньөчэлэн Иисус гөнин: “Тек эскэвэлрэн Бэй Хутэн, Хэвки-дэ Ноҥандулан эскэвэлрэн. 32. Хэвки Ноҥандулан эскэвэлмиккэ, тарич Хэвки-дэ Мэндулэй Ноҥман эскэдин, эрэк-нен далила эчин бидин. 33. Куҥал-а! Би эннэвуси гору хун-нюн биддэ.Мину гэлэтэддис.Тарбач, иудеямҥалтаки Би гөнчэгчими, хөрэддиткиву ху туркудис эмҥэ, тек хунтэки-дэ гөнэм. 34 35 34. Хунду Анҥамтав итум бөрэм, ху мэр доливур гя гянур аявматтасан. Онакан Би хуну аявалчагчикму, тачин-да ху-дэ гя гянур аявматлилра. 35. Тали кубэччур хадатан, ху Мин хупкуттиҥэлбу бисивусэн, мэр доли ху аявматтилкар бисэкэсэн”. 36 37 38 36. Симон Петр Ноҥантакин улгэмрин: “Хунҥи! Аваски Хи хөрэдинри?”. Иисус ноҥантакин барагрин: “ Би хөрэддиткиву хи тек туркудинри Миннюн хөрҥэ, тарбач амарла Минду бодасандинри”. 37. Петр Ноҥантакин гөнин: “Хунҥи! Ями би тек туркудим Хинду бодасҥа? Би Хиндули мэн ими бөдим”. 38. Иисус ноҥантакин барагрин: “Хи ими Миндули бөдинри? Эливун тэдекичу тэдю гөнэм хинтэки: эдлэн-дэ петух иркалра, хи илракан Миндук я́нуникан аталабдинри́”.