1 2 3 1. Паскатки нюҥэн инэҥ одакан Иисус Вифанияла эмрин, таргидадук көкэчэ Лазарь, Ноҥан көкэчэдукун аруканчан бисин. 2. Тала Ноҥандун хисэргэн кимритан. Марфа хунҥивчиддин, Лазарь-нян Ноҥнюнни олдаиддилнюн дебэдеклэ бисин. 3. Мария хо эрипчи аич унҥэлкэн нарда миррэн имрэмэн гадиди, Иисус бөдэллөн хэсирин нян мэн нюритчи тарав тэссин. Миррэ унҥэн дюв милтэрэмкэнин. 4 5 6 4. Таракам өмэн хупкуттиҥэлдукун, Иуда Искариот, Симон хутэн, Ноҥман хипкэкэч бөмси, улгэмрин: 5. “Ями-нян эрэв мирров энмэй унивкэн илан нямали динарияли энмэй-дэ дьогрилду боритта?” 6. Эрэк ноҥан эсни тачикан дьогрил дюгулитэн хэкрукэтти бими гөн, мэнкэн дьорминкы бими. Ноҥандулан мэннюми ҥаллоттин худөк тамаҥалнюн бисин, ноҥан таралбу гаваттан, яв тала хинчавутан. 7 8 7. Иисус гөнин: “Эмэли ноҥман, эди нучикир некривэн. Ноҥан эрэк Мину нэдектэки инэҥтэки нэкэргэй дюлдэкиду некрэн. 8. Эрэгэркы мэннимур, дьогриҥалкар бивэчис, Минэлкэн-нен эсэс эрэгэр бивэттэ”. 9 10 11 9. Хоял иудеямҥал долдаридюр Ноҥан тала бисивэн, тартаки эмритэн, эсниткэн Иисустыкэн дюгудукун бис, тарич Лазарьу-да иттэвур, Ноҥан көкэчэдукун аручаван. 10. Дюлэгэл нэҥэдюкэмҥэл мулгаритан Лазарьу-да мадавур, 11. Ноҥандулин хоял иудеямҥал эмэвэнритэн Иисусу-дэ тэдеритэн. 12 13 12. Гяла инэҥнэ долдаритан Иисус Иерусалимтаки хөрривэн, хоял бэил хэбдектэки эмчэл. 13. Пальмал хэгтэвутэн гадидюр, Ноҥман дэпки арчанитан энтэкэе гөнитэн: “Осанна! Аич төрэсэмчэ Израиль тэгэмэрэҥэн, Хунҥи гэрбэдукун эмэдди!” 14 15 14. Иисус осел явкаман бакрин, таду урин он дукуттигчинни тарак дюгулин: 15. “Эди ҥэлкир, Сион хунадин! Эрэк хин Тэгэмэрэс эмэргэддын, нөсэгчэн оселду тэгэтникэн!” 16 16.Ноҥан хупкуттиҥэлни нонан эчил тарав унур, Иисусмэк эскэвчэлэн, таракам дьонитан: Ноҥан дюгулин он дукапчаван, тачин-да Ноҥандун некэпчэвэн. 17 18 19 17. Дюллэ Ноҥнюнни бичэ ҥунмер тэлэҥрин Ноҥан Лазарю көҥгэлэ олдустукун эрисэнчэвэн нян ноҥман көкэчэдукун аручаван-да. 18.Төми тарав хов мямсив Ноҥан некчэвэн долдача ҥунмер Ноҥман эчин арчанин. 19. Фарисеилдэмэр мэр доливур гөмэттитэн: “ Көесы, хундулэ як-та-тит эсни некэптэ? Кубэччи ҥунмер Ноҥандун боддан”. 20 21 22 20. Хан-да тикэднэдектэки хэбдеклэ эмчэл еллир биситэн. 21. Ноҥартан Филипптэки дагамритан, галилеягда Вифсаидадук биситки ноҥантакин гасчиритан-да: “Хунҥи-бэе, бу Иисусу ичимсу”. 22. Филипп хөрриди Андрейтэки тарав гөнин, тадукут-нян Андрей Филипп-тэ Иисустэки тарав гөнитэн. 23 24 23. Иисус таралтаки барагрин: “Бэй Хутэн эскэндулэй исаннан илунни эмрэн. 24. Эливэн тэдекичу тэдю гөнэм хунтэки: килеб няҥтаҥан, төрлэ тикриди этэн көкэр, тарич өмэнтэкэн эмэбдин, көкэмидэмэр, тарич хояв хевкэми эмудин. 25 26 25. Ҥи мэн хирами эгдэч аяври, - тарак-та хирами ие́лкэдин, тарбач ҥи мэн хирами тикуни элэ индулэ - тарич эрэглэ индидектэки хирами-эмдэи аич нэкчиникэн ишудин. 26. Ҥи Мину кэлмэвчири, Минду боддан, Илэ Мин бисилэву, тала-да Мин кэлмэву бидин. Ҥи Минду кэлмэвчин, тарав Мин Амму Хэрдин. 27 28 29 27. Тек Мин ханьму хираму хилусанди бисни. Яв Би гөндим? Ама! Эрэв Мин илуму агалукали! Тарбач, Би эртэки илунтэки эмривуккы. 28. Ама! Эскэлукэли Мэн гэрбэи!” Таракам няниндук дилган иснин: “Эскэвриву-дэ, унэт-тэ эскэвэлукэндим-дэ”. 29. Ҥунмер элэ илачидди долдарин-да эрэв, гөнин: “Эрэк агди” , хан-нян гөнитэн: “Ангел Ноҥантакин төрэрин”. 30 31 30. Иисус тали гөнин: “Эрэк дилган эч Минду бис, тарак ҥунмеру долдавканна дилган бисин. 31.Тек эрэк төр биньин ургэдэврэн.Тек эрэк биньи тэгэмэрэн эдук бугунукамдин бугаски. 32 33 32. Би эдук төрдук өгэрэптиди, эйдувутэн Мэнтэкий эмукэндим”. 33. Эрэв Иисус гөндиддин, унувкатми иррөччинь исмерди Ноҥан көкэннэй. 34 35 36 34. Ҥунмер Ноҥантакин барагрин: “Бу итундук долдаривун, Имтэвчэ - Христос эрэглэдун биддивэн. Он-нян Хи гөнэнри, Бэй Хутэн өгэрэбэннэдин? Эрэк Ҥи Бэй Хутэн?” 35. Таракам Иисус ноҥартакитан гөнин: “Унэт дагрит ҥэрин бидин хуннюн. Гиркаватлилра ҥэрин биҥсин, капта хатар эдлэн кулир. Ҥи каптали хатарли хөллөтти, тарак эсни хар аваски ҥэнрий. 36. Ҥэрин хуннюн биҥсин, тэделилрэ ҥэрим- тарич-нян ҥэрин хурэлни бидис”. Тачин гөниди Иисус ноҥардукутан дөнин нян гөбөрин тартаки. 37 38 37. Ирдивэн мямсилба Ноҥан некрин ноҥартан көеридутэн, тарбач тачин-та тарал Ноҥман эчил тэдер. 38. Эчин көевун Исайя гөнчэн төрэнни исшин: “Хунҥи! Ҥи муттук долдачай тэдерин? Ҥиду-нен Хунҥи ҥалан аҥаптин?” 39 40 39. Ноҥартан туркуритэн тэдеҥэ, унэт он Исайя гөнчэгчинни: “Эрэк ҥунмен мэн ясалди балича, дьолраптан-да мэн мявунди. 40. Ноҥартан ясалдюр эстэн көер, мявундюр-да этэр унур, этэр-дэ эсэнидюр дэпкэн, Би ноҥарбутан бэгдэдэку.” 41 42 43 41. Эрэк Исайя гөнин, Ноҥан эскэвэнни ҥэримэн көеми төрэдми-дэ Ноҥан дюгулин. 42. Тарбачиси тачин бисиклэн бэгэррилдук-тэ хоял Ноҥман тэдеритэн, тарма фарисеилдук дяютми эчил ичулукэмсэ тэдеривур, синагогадук эдэвур ньөвкэмрэ, 43. Тарбач бэй эскэвмэн аявалритан, Хэвкиҥидук эгдэч хулэкэдмэрэч. 44 45 44. Иисус игэч гөнин: “Ҥи Мину тэден, тарак эсни Мину тэдер, тарич Мину Эмэсэмкэнчэдмэру тэден. 45. Ҥи Мину көери, тарак Мину Эмэсэмкэнчэв көен. 46 47 46. Би- ҥэрин бисэм. Би элэ төрлэ эмриву, ҥитэн Мину тэдери эдэн хатассила эмэбуттэ. 47. Ҥиккэ Мин төрэму долдари нян этэн-дэ тэдер, Би эсэм ноҥман ургэгэттэ, Би эсэм ургэдэдэй биньи бимкэмэн элэ эмры, биньив ургидай эмриву. 48 49 50 48. Таралду ҥи Мину хиндуссан нян этиду-дэ Мин төрэму аич гамса ургэдэмҥэ бисни - Төрэн Мин гөнчэву. Тарак ноҥман ургэдэдин муданҥан инэҥнэн. 49. Биккы эчу Мэндукий төрэр, Мину Эмэсэмкэнчэ Амму итуми бөрин, яв гөндэку яв-да игэч төрэдэку. 50. Би-нен харам Ноҥан итунни- эрэк ач мудна ин. Эчинэси, Би яв гөнэм, гөнэм, яв Амми гөндэку гөнивэн.