1 2 1.Өмэн бэй Лазарь гэрбэ бутэнри бисин. Ноҥан Вифаниядук билэктук бисин, Мария нөдмэр-дэ Марфа тала индиддитэн. 2. Эрэк Мария, Хунҥи бөдэллөн миррач авачча, нюритэлди-дэ тэсэччэ бисин. Лазарь ноҥан аканни бисин. 3 4 3. Экэнур Иисустэки мэтунэдю гөнэвкэнитэн: “Хунҥи-Бэе! Хин ирэв аяврис бутэнрэн”. 4. Иисус тарав долдариди гөнин-дэ: “Эрэк энэк эсни көкэнмэйтэки бис, тали Хэвки эскэвэнни ичукэбдэн, тарич Хэвки Хутэн эскэвэлдэн”. 5 6 7 5. Иисус Марфав, ноҥан нөвэн Лазару-да аяврин. 6. Иисус Лазарь бутэнривэн долдариди, бисилэй дьөрбу инэҥу биддин. 7. Тарал елтэнчэлэтэн Ноҥан хупкучиҥэлтэкий гөнин: “Гэлэ, Иудеятки мучугалра”. 8 9 8. Хупкучиҥэлни Ноҥандукун улгэмритэн: “Хупкучимҥэ! Далила иудеямҥэл Хину дьолач дьолачимситан, Хи-нен нян-да тартакит-та ҥэнэсчинри?” 9. Иисус барагрин: “Эснимэн инэҥнэ мян-дьөр час бивэттэ. Ҥи инэҥ гиркаватти, тарак эсни нисэ́йкэттэ, эрэк бини ҥэримэн көеми. 10 11 10. Нян ҥи долба гиркаватти, тарак нисэйкэттэн, мэннюми ҥэрин ачча бисэкэн”. 11. Тачин гөниди, эсимэсукэн дякасни́н: “Мут гяматтит Лазарь хуклэснин, Би-нен ноҥман хөрутнэрэм”. 12 13 14 12. Хупкуттиҥэлни гөнитэн: “Хунҥи-Бэе! Хуклэсми-нюн, тарич абгар один”. 13. Иисус тарак көкэчэвэн гөнивэн, ноҥартан-нян эливэнмэе хуклэсэнмэйгэчин хуклэснивэн гөнидин гэрбэттэ. 14. Таракам Иисус ҥунэч ноҥартакитан гөнин: “Лазарь көкэн. 15 16 15. Би хундули хокаҥчирам, Би тала эчэлий бис, тарич ху тэдедэсэн, тарбач тек ноҥантакин хөргэр”. 16. Таракам Фома, Гиркэч гэрбуттитэн, хупкуттилтэки гөнин: “Муттэ хөргэр, ноҥнюнни көкэдэвур-дэ”. 17 18 19 20 17. Иисус эмми долдарин, укал дигэн инэҥу нэнмэйлэ олдусла бисивэн. 18. Вифания Иерусалимдук эти горла бис, мян-тунҥакли стадияла, 19. Тарич төми-дэ хоял иудеямҥэл Марфаятки Мариятки-да эмритэн олагаттавур акмур хоҥаддилба. 20. Марфа Иисус дагамаддиван долдариди, Ноҥман дэпки арчанарин, Мариядамар дюла эмэптин. 21 22 23 21. Таракам Марфа Иисустэки гөнин: “Хунҥи! Хи элэ бичэ бисэкэс, акму эмчи-дэ көкэр. 22. Тарма тек-тэ-тит харам: эйдувэн яв Хэвкитки гасчиснивус, Ноҥан Хинду бөдин”. 23. Иисус ноҥантакин гөнин: “Хин аканси ардин”. 24 25 26 24. Марфа Ноҥантакин гөнин: “Харам ноҥан ардин арадякла муданҥан инэҥнэ”. 25. Иисус ноҥантакин гөнин: “Би бисэм- аранмай ин-дэ. Мину тэдечэ көкэми- ноҥан ардин. 26. Инитэн-нюн ҥи Мину тэдери ок-та этэн көкэр. Эрэв тэдечинри?” 27 28 29 27. Ноҥан Ноҥантакин барагрин: “Иҥэ, Хунҥи! Тэдеттэм Хи Христос бисивус, Хэвки Хутэн, элэ төрлэ Эмэннэ бичэ”. 28. Эчин гөниди хөррин нян хипкэкэ́ч экми Марияв эририн: “Хупкучимҥэ элэ, хину эрин”. 29. Тарак долдамнин хинмамакач илриди хинмач хөрэмэлчирин Ноҥантакин. 30 31 32 30. Иисус унэт билэклэ эч ир, Марфа арчандидяклан биддин. 31. Иудеямҥал ноҥан дюлан өмэтту биддил, ноҥман олагачидди́л, иттидюр Мария хинмач илриди ньөривэн амардадун бодаснитан. Ноҥартан мэргэттитэн олдустаки́ хоҥаднаридин. 32. Мария тала Иисус бисилэн эмриди, Ноҥман иттин, Ноҥан бөдэлтэкин тикрин Ноҥантакин гөнин -дэ:“Хунҥи! Хи элэ бичэ бисэкэс эмчи-дэ мин акму көкэр”. 33 34 35 33. Иисус ноҥан хоҥриван иттиди, иудеил-дэ хоҥривутан, ноҥнюнни эмчэл, тарич Мэнкэн набучилрин ханинди хевулрин-дэ мэргэнди. 34. Ноҥан улгэмрин: “Ху илэ ноҥман нэдисэн?” Ноҥантакин барагритан: “Хунҥи! Хөргэр, көеччинри”. 35. Иисус хоҥалрин. 36 37 36. Таракам иудеил гөнитэн: “Көетли, он Ноҥан тарав аяврин”. 37. Хан-нян ноҥардукутан гөнитэн: “Туркумчимэн Тарак баликач ясаллон аҥача, эрэк-тэ эдэн көкэр некҥэ?” 38 39 40 38. Иисус доли эмдэди́ набутникан нэнмэй олдустаки эмрин. Эрэк дьолакаг төр долан нэнмэйду улэпчэ көҥгэлэ бисин, эгден дьолач ни́нэпчэ инмэин бисин. 39. Иисус гөнин: “Дьолу ослилра”. Көкэчэ нөн Марфа Ноҥантакин гөнин: “Хунҥи! Укал ҥолрин, дигэм инэҥу ноҥан олдусла бидилчэткин”. 40. Иисус тартаки барагрин: “Эчумэн Би хинтэки гөн, тэдемимэк Хэвки эскэвмэн итчинри?” 41 42 41. Таракам көкэчэ биддин инмэйдукун дьолу осситан. Иисус нянитаки ясали өгэррин нян гөнин-дэ:“Ама! Анира́м, Хи Мину долдарилис. 42. Би хариву Хин эрэгэр Мину долчиривус, тарбач Би гөнэм ҥунмер долчидан, элэ илачидди, ноҥан тэдедэн Хи Мину эмэсэмкэнчэвус.” 43 44 43. Тачин гөниди Иисус энтэкэе иркаснин: “Лазарь! Ньөли!” 44. Көкэчэ-нен ньөн-дэ.Тарак хэркуттин ҥалални бөдэлэлни-дэ көкэчэв нэнмэич булатач, итин-да булатач хэркуттин. Иисус ноҥартакитан гөнин: “Хэркуттивэн аталлилра, ноҥан ҥэндэн.” 45 46 45. Таракам хоял иудеил Мариятки эмчэл, Иисус некривэн көечэл Ноҥман тэдеритэн. 46. Хан-да таралдук фарисеилтэки хөрритэн, укчэнритэн Иисус яв некчэвэн. 47 48 47. Таракам нэҥэдюкэмҥэл бэгэрриҥэлтэ́н фарисеил-дэ синедриом чакабуканитан гөнитэн-дэ: “Яв мут некчип? Эрэк Бэй хояв хоми мямдав некрэн. 48. Ноҥман эчинтэ эмэнэкэт, тарич кубэччур Ноҥман тэдедир. Таракам-нян римляр эмридюр тедир мут билэкут, мут ҥунмеҥуттэ”. 49 50 49. Ноҥардукутан өмэн, Каиафа, тарав анҥану нэҥэдимҥэл дюлэгэч бэгэрэдди бисин, таралтаки гөнин: “Ху яв-да эсэс хар. 50.Эсэс-тэ унур: мутту аидмар өмэн бэй көкэрэкэн кубэтлин бэилдули, эйдун ҥунмер көкэдиҥэдукун”. 51 52 53 51. Тарав анҥану тарак дюлэгэч нэҥэдимҥэлдули бэгэрэдми, төми эчин гөнин, эми мэндукий гөн тарма көевуҥчин гөнин, Иисус ҥунмерли көкэннэвэн. 52. Эннэвэн эрэлдулиткэн ҥунмерэлдули көкэр, тарбач-нян эйдулин боргарилба-да Хэвки хурэлбэн өмэтту чаканнаван. 53. Эдук инэҥдукуси ноҥартан Ноҥман мадавур мулгам мулгаритан. 54 55 54. Төми-дэ Иисус эч ичурич иудеил долитан хөллөттэ. Тадук Ноҥан Ефраим городтаки хөррин, ги́ҥида анчиҥидалан бисилэ.Тала Ноҥан хупкучиҥэлнюми биддин. 55. Иудеимҥэл Пасхаҥатан далиладдин. Кубэттукутэн эрэли бисилдук төрэлдук, хоял бэил эмритэн, Пасха дюлдэлэн Иерусалимтаки хэрэбдэвур. 56 57 56. Нэҥэдеклэ биникэр, тарал Иисусу гэлэттитэн, мэр доливур улгимимэтникэр: “Он ху мэргэчис, Ноҥан хэбдекэдеклэ эмнэн эмрэ?” 57. Дюлэгэл нэҥэдюкэмҥэл бэгэсэлтэн фарисеил-дэ итуритан: ҥивул Иисус илэ бисивэн долдами мэтудэтэн, тарал Ноҥман хэпкэндэтэн.