¹ Jekuh Ya ngau sidak agik: "Aku madah kitak, dentara urang te bisik dituk, bisik te ndai mati sapan sidak medak Kerajaan Allah udah datai ngau kuasa." Yesus demulia datau bukit ² Enam ari udah yak, Yesus ngemaik Petrus, Yakobus, ngau Yohanes, Ya tamai sidak naik ke bukit te tingik. Sidak kedirik na diyak. Udek Yesus berubah rupa demua sidak, ³ pengau Ya putih mengkilat. Ndai sik surang pun mensia de denia tuk te tau ngelantang pengau upa yak. ⁴ Maka nampak ngau sidak Elia sedua Musa, sedua ketengah banai ngau Yesus. ⁵ Jekuh Petrus ngau Yesus: "Rabi, bahagia nar kami nugau dituk. Ilak kami mulah tiga kemah, sutik untuk Nuan, sutik untuk Musa, ngau sutik agik untuk Elia." ⁶ Ya banai miak, empadai ndai ketau agik nama te kalah depanai, empadai sidak takut bebenar. ⁷ Maka datai kiak awan ngelimuh sidak, re awan yak tedinga ingan" "Tuk mek Anak te Kukasih, dinga ke Ya." ⁸ Tapi rama sidak ngupuk sekamat yak, sidak ndai sik medak urang bukai tamai sidak, cuma Yesus kedirik. ⁹ Rama sidak turun re bukit, Yesus bepesan ngau sidak, isak sidak nang bekisah ngau urang nama te sidak pedak, sapan Anak Mensia bangkit rentara urang mati. ¹⁰ Sidak megai pesan tadik samil besual dentara sidak nama te demaksud ngau "bangkit dentara urang mati." ¹¹ Udek sidak betanyak ngau Ya: "Nama ahli-ahli Taurat madah, Elia kalah datai dulau? ¹² Saut Yesus: "Mimang Elia kalah datai dulau, mulih ke semua utai. Tipa ngau te bisik tetulis tentang Anak Mensia, Ya kalah mayuh sisa ngau dehina? ¹³ Tapi Aku madah kitak: Mimang Elia udah datai, tapi urang mulah ya sepenekak ati sidak, sesuai ngau nama te bisik tetulis tentang ya." ¹⁴ Rama Yesus, Petrus, Yakobus ngau Yohanes bekalih ngau murid-murid bukai, sidak medak uraang mayuh ngelingik bala murid diyak, bisik ahli Taurat ketengah besual ke utai ngau sidak. ¹⁵ Rama mensia mayuh diyak medak Yesus, sidak tebelenga ngau lansung ngusung Ya. ¹⁶ Udek Yesus betaanyak ngau sidak: "Nama te kitak pesual ke ngau sidak?" ¹⁷ Jekuh surang dentara urang mayuh diyak: "Guru, anakku kubaik ngau Nuan, empadai ya kesarung roh te nyuruh ya bisuk. ¹⁸ Setiap kalik roh yak nyerang ya, roh yak ngempas ke ya ke tanah; udek mulut ya bebusa, gigi ya engkerit, ngau tubuh ya kejang. Aku udah mintak ngau murid-murid Nuan, isak sidak ngusir roh yak, tapi sidak ndai numut." ¹⁹ Udek jekuh Yesus ngau sidak: "Kitak angkatan te ndai pecayak, kak berapa lamak gik Ku nugau dentara kitak? Berapa lamak agik Aku kalah sabar ngadap kitak? Baik nemiak yak kituk!" ²⁰ Udek debaik sidak ngau Ya. Rama roh yak medak Yesus, nemiak yak degunsar ya sampai tebelanting, begiling begalas detanah ngau mulut ya bebusa. ²¹ Udek Yesus betanyak ngau apai nemiak yak: "Dah berapa lamak ya pedih tuk?" Saut ya: "Mulai re gik mit. ²² Rajin roh yak ngirit ya kalam api atau kalam aik untuk ngemenasa ke ya. Nyak nyuruh antik Nuan tau mulah, tulung ngau kasih ke kami." ²³ Saut Yesus: "Jekuh mih: antik Nuan tau? Ndai sik te ndai tau bagi urang te pecayak!" ²⁴ Apan nemiak yak lansung mukau: "Aku pecayak. Tulung aku urang te ndai pecayak tuk!: ²⁵ Rama Yesus medak urang mangkin mayuh datai begerumung, Ya ngerara roh yak, jekuh Ya: "Dirik roh te nyuruh urang bisuk ngau tulik, Aku merintah dirik, keluar re nemiak tuk, ngau nang tamak kiak agik!" ²⁶ Udek roh yak keluar samil menciak nguyu ngunsar tubuh nemiak yak. Nemiak yak sentak upa urang te udah mati, nyuruh urang mayuh banai: "Ya dah mati." ²⁷ Tapi Yesus megai jari nemiak yak, neguk ya, udek ya angkat kedirek. ²⁸ Rama Yesus dah de langkau, Ya tamai bala murid Ya kedirik, sidak betanyak: "Nama kami ndai dapat ngusir roh yak?" ²⁹ Saut Ya ngau sidak: "Jenis tuk ndai dapat dusir, sebali cuma ngau doa." ³⁰ Yesus ngau bala murid angkat riyak ngelalu Galilea, Yesus ngai pejalai sidak deketau urang; ³¹ empadai Ya ketengah ngajar murid-murid Ya. Ya banai ngau sidak: "Anak Mensia kak deserah ke jari mensia, sidak munuh Ya, ari ketiga debunuh, Ya bangkit." ³² Sidak ndai nyaruk te jekuh Ya tapi ndai mangah gak nanyak. ³³ Udek Yesus ngau bala murid datai ke Kapernaum. Rama Yesus dah derumah, Ya betanyak ngau sidak: "Nama te depanai ke kitak detengah jalai?" ³⁴ Tapi sidak sunyik, empadai detengah jalai tadik sidak bepadu ke sapa te palin besar dentara sidak. ³⁵ Udek Yesus duduk, ngumai kedua belas murid ya. Jekuh Ya ngau sidak: "Sapa te kak jadi penulai, ya kalah jadi te palin pengabis, ngau jadi pelayan re semua." ³⁶ Udek Yesus naruh nemiak mit, dengkah Ya detengah-tengah sidak, udek Ya merekut nemiak yak, banai ngau sidak: ³⁷ "Barangsapa nyamut nemiak upa tuk alam namaKu, ya nyamut Aku. Barangsapa nyamut Aku, bukai Aku te ya samut, tapi Ya te ngutus Aku." ³⁸ Jekuh Yohanes ngau Yesus: "Guru, kami medak urang te bukai penamai kita ngusir sitan demi nama Nuan, lalu kami ndai nyagi ya, empadai ya bukai penamai kita." ³⁹ Tapi jekuh Yesus: "Nang kitak belaban ke ya! Empadai ndai sik surang pun te udah mulah mujizat demi nama Aku, tau sekelin yak ngumpat Aku. ⁴⁰ Sapa te ndai ngelawan kita, ya depihak kita. ⁴¹ Aku madah kitak: barangsapa merik kitak minum segelas aik empadai kitak penamai Kristus, upah ya ndai bakal ayap." ⁴² "Barangsapa nyesat ke sikuk na re nemiak te pecayak tuk, lebih baik baagi ya kalau batu kilangan dekebat ke rekung ya udek desempalung kalam laut. ⁴³ Antik jari kitak nyesat ke kitak, tungkung, lebih baik kitak tamak kalam idup ngau jari kudung, repada ngau jari dua sepiak sama bisik debuai kalam neraka, kalam api te ndai mampu depadam; ⁴⁴ Diyak ulat ndai mati, api ndai padam. ⁴⁵ Antik kaki kitak nyesat ke kitak, tungkung, lebih baik tamak kalam idup ngau kaki timpang, repada kaki dua sepiak utuh desempalung kalam neraka; ⁴⁶ diyak ulat ndai mati, api ndai padam. ⁴⁷ Antik mata kitak nyesat ke kitak, cukit, empadai lebih baik tamak kalam Kerajaan Allah ngau mata sepiak repada ngau mata dua desempalung kalam neraka, ⁴⁸ diyak ulat bangkai ndai mati ngau api ndai padam. ⁴⁹ Empadai setiap urang bakal degaram ngau api. ⁵⁰ Garam mimang baik, tapi antik garam dah tabar, ngau nama agik ngemasin ke? Kitak kalah bisik seruntik garam alam dirik kitak, ngau kalah idup damai ngau semua urang bukai."