Sarak ¹ Yesus angkat ke daerah Yudea ngau ke seberang sungai Yordan, diyak pun mayuh urang datai ngerumun Ya; upa selama Ya ngajar sidak ugak. ² Udek datai urang Farisi, ngau ncuba Yesus, sidak betanyak: "Tau ndai laki nyarak bini ya?" ³ Tapi saut Ya ngau sidak: "Nama perintah Musa ngau kitak?" ⁴ Saut sidak: "Musa nyagi nyarak ngau cara merik surat sarak." ⁵ Udek jekuh Yesus ngau sidak: "Empadai kerampak kitak yak mek nyuruh Musa nulis perintah yak untuk kitak. ⁶ Empadai peruba denia, Allah mulah bakas ngau inuk, ⁷ nyak nyuruh bakas bakal nudi ke apai inai ya, sengkalik ngau bini ya, ⁸ sedua jadi sutik. Piyak mek sedua bukai agik dua, tapi sutik. ⁹ Nyak nyuruh, nama te depesengkalik Allah, ndai tau desarak mensia." ¹⁰ Rama sidak dah de rumah, murid-murid betanyak agik ngau Yesus tentang hal yak. ¹¹ Jekuh Ya ngau sidak: "Barangsapa nyarak ke bini lalu kawin ngau inuk bukai, ya idup alam pezinahan teradap bini ya yak. ¹² Ngau antik bini nyarak ke laki ya, kawin ngau bakas bukai, ya bezinah." ¹³ Udek urang ngemaik nemiak mit ngau Yesus, isak Ya nyapai sidak; tapi murid-murid Ya ngelai sidak. ¹⁴ Rama Yesus medak, Ya luat samil banai ngau sidak: "Isak bala nemiak yak datai ngau Aku, nang kitak belaban ke sidak, empadai urang-urang te upa yak mek te mpu Kerajaan Allah. ¹⁵ Ku mdah kitak: "Barangsapa ndaai nyamut Kerajaan Allah upa bala nemiak yak, ya ndai dapat tamak kalam yak." ¹⁶ Udek Ya merekut bala nemiak yak samil ngeletak ke jari Ya atau sidak Ya merkat sidak. ¹⁷ Rama Yesus angkat riyak kak bejalai agik, bisik urang datai beguang ngusung ya, samil belutut ya betanyak: "Guru te awas, nama te kalah kupulah isak bulih idup kekal?" ¹⁸ Saut Yesus: Nama madah Ku awas? Ndai sik urang te awas repada Allah na. ¹⁹ Mih tentu ketau nama perintah Allah: Nang munuh, nang zinah, nang ncuri, nang ngemulak, nang ngurang hak urang, hurmat ngau apai inai!" ²⁰ Jekuh urang yak ngau Ya: "Guru, semua yak dah kutunak mulai re aku gik mit." ²¹ Tapi Yesus medak ke ya ngau kasih, udek banai: "Cuma sutik te gik kurang: angkat, jual semua pemisik mih, berik ngau urang-urang meskin, maka mih bulih reta de surga, udek datai kituk, tamai Aku." ²² Ninga miak ya keciwa, angkat ngau sedih, empadai mayuh pemisik ya. ²³ Udek Yesus ngupuk murid-murid desekelingik Ya: "Palin mar urang beduit tamak kalam Kerajaan Allah." ²⁴ Murid-murid Ya tebelenga ninga Ya miak. Tapi Yesus nyamung agik: "Anak-anakKu, palin mar tamang kalam Kerajaan Allah. ²⁵ Lebih mudah unta tamak lubang jarum repada urang kaya tamak kalam kerajaan Allah." ²⁶ Sidak makin ragak ngau banai sama direk: "Antik piak sapa te tau deselamat ke?" ²⁷ Yesus ngupuk ke sidak samil banai: "Bagi mensia yak mustahil, tapi ndai piyak bagi Allah. Semua utai mungkin bagi Allah." Upah tamai Yesus ²⁸ Petrus banai ngau Yesus: "Kami dah nudi ke semua utai ngau tamai Nuan!" ²⁹ Saut Yesus: Aku madah kitak, setiap urang te empadai Aku ngau Injil, nudi ke langkau, menyadik ya, inai apai ya, anak ngau uma, ³⁰ urang yak pituk, sekelin tuk bakal bulih seratus kalik lipat: lanaagkau, menyadik inuk, menyadik bakas, inai, anak ngau uma, biarpun deserta ngau penisa, udek page lusak ya bakal nerimak idup kekal. ³¹ Tapi mayuh urang te dulau jadi pengabis, ngau te penudi jadi penulau." ³² Yesus ngau murid-murid Ya ketengah dejalai ke Yerusalem, Yesus bejalai de depan. Murid-murid gaduh, ngau urang-urang te tamai ya re belakang berasai takut. Sekalik agik Yesus ngumai kedua belas murid Ya, ngau Ya mulai madah ngau sidak nama te bakal tejadi ngau Ya, ³³ jekuh Ya: "Pituk kita ke Yerusalem, Anak Mensia bakal deserah ke ngau imam-imam kepalak ngau ahli Taurat, sidak merik ukum mati. Udek sidak nyerah ke Ya ngau bansa-bansa te ndai ngelala Allah, ³⁴ ya bakal dekeluluk-uluk , delecui, desesah ngau debunuh, tiga ari udah yak Ya bangkit." ³⁵ Lalu Yakobus ngau Yohanes, anak-anak Zebedeus, minik Yesus lalu banai: "Guru, kami ngarap isak Nuan ngabul ke pemintak kami!" ³⁶ Saut Ya ngau sidak: "Nama te kedekak kitak kupulah untuk kitak?" ³⁷ Saut sedua: "Suruh kami duduk alam kemuliaan Nuan page lusak, surang desepiak kanan, surang desepiak kibak." ³⁸ Tapi saut Yesus ngau sedua: "Kitak ndai ketau nama te kitak pintak. Tau nama kitak minum cawan te kalah kupinum, ngau depanik ngau pemanik te kalah kuterimak?" ³⁹ Saut sidak: "Kami tau." Jekuh Yesus: "Mimang, kitak bakal minum cawan te kalah depinum Aku, ngau bakal depanik ngau pemanik te Kuterimak. ⁴⁰ Tapi hal duduk desepiak kibak atau kanan, Aku ndai sik hak merik ke yak. Yak deberik ke ngau urang te dah desiap ke." ⁴¹ Ninga miak, luat kesepuluh murid bukai ngau Yakobus sedua Yohanes. ⁴² Tapi Yesus ngumai sidak lalu banai: "Kitak ketau, sidak te detelah pemerintah bansa-bansa, merintah rakyat ngau jari besi, ngau sidak nyalaike kuasa ngau pengeras ke sidak. ⁴³ Ndai piak dentara kitak. Sapa te kak besai dentara kitak, ya kalah jadi pelayan, ⁴⁴ Sapa te kak tekemuka dentara kitak, ya kalah jadi anak buah untuk semua. ⁴⁵ Empadai Anak Mensia datai bukai untuk delayan tapi ngelayan ngau merik ke nyawa jadi tebusan untuk urang maayuh." ⁴⁶ Udek Yesus ngau murid-murid Ya de Yerikho. Rama Yesus keluar re Yerikho, tamai bala murid ngau urang mayuh te begerumung, bisik pengemis te butak, benama Bartimeas anak Timeus, duduk de sisi jalai. ⁴⁷ Rama dedinga ya kalau Yesus urang Nazaret, ya mulai nyeru: "Yesus, Anak Daud, kasih ke aku!" ⁴⁸ Mayuh urang ngerara ya isak ya sunyik. Tapi makin kayah ya bingan: "Anak Daud, kasih ke aku!" ⁴⁹ Udek Yesus betegak lalu banai: "Kumai ya!" Sidak ngumai urang te butak, banai ngau ya: "Kuat ke ati mih, bediri, Ya ngumai mih." ⁵⁰ Udek ya ngelecut ke jubah ya, bediri lalu angkat ngau Yesus. ⁵¹ Tanyak Yesus ngau ya: "Mih kak Aku mulah nama untuk mih?" Saut urang butak yak: "Rabuni, isak aku tau medak!" ⁵² Jekuh Yesus ngau ya: "Angkat am, iman mih nyelamat ke mih!" Rama yak ugak ya medak, udek ya tamai Yesus.