Yesus dalu de Yerusalem ¹ Rama Yesus ngau murid-murid Ya dah damping Yerusalem, damping Betfage ngau Betania te teletak de bukit Zaitun, Yesus nyuruh dua urang murid Ya ² ngau pesan: "Angkat ke kampung demua kitak yak. Rama kitak tamak kiak, kitak bisik medak sikuk keledai tetamat, te pan suah detumpang urang. Lepas ke keledai yak, baik kituk. ³ Antik bisik urang ngerara kitak: Nama te depulah kitak, saut ke: Tuhan perlu. Sigat Ya mulai ke kitu agik." ⁴ Sidak angkat, nemu keledai biak tetamat de mua lawang de luar, de sisi jalai, udek ngelepas ke keledai. ⁵ Bisik dua tiga urang diyak banai ngau sidak: "Nama tujo kitak ngelepas ke keledai yak?" ⁶ Udek sidak nyaut upa te udah depadah ke Yesus. Nyak nyuruh sidak disak ke urang. ⁷ Udek sidak ngemaik keledai yak ngau Yesus, dalas ngau pengau sidak, udek Yesus numpak diyak. ⁸ Mayuh urang ngampar pengau de jalai, bisik ugak te ngampar dan mit te ijau re uma. ⁹ Urang-urang te bejalai de mua ngau sidak te tamai re belakang nyeru: "Hosana! Deberkat Ya te datai alam nama Tuhan, ¹⁰ deberkat Kerajaan te datai, Kerajaan apai kita Daud, hosana de tempat te palin tingik!" ¹¹ Datai ke Yerusalem Ya tamak kalam Bait Allah. Din Ya ngupuk-ngupuk semua utai, tapi empadai ari dah kak malam, Ya keluar ke Betania tamai kedua belas murid Ya. Yesus ngutuk pun ara ¹² Ari sutek, udah Yesus ngau kedua belas murid nudi ke Betania, Yesus ngasai lapar. ¹³ Re jauh Ya medak pun ara te udah bedaun. Depinik Ya, sapa ketau bisik nemu nama-nama de pun yak. Tapi rama Ya datai kiak, ndai sik bulih nama-nama te bukai re daun na, empadai bukai rama buah ara. ¹⁴ Maka jekuh Ya ngau pun yak: "Nang sampai bisik urang te makai buah dirik selamak-lamaknya!" Bala murid pun ninga. ¹⁵ Udek Yesus ngau murid-murid Ya datai ke Yerusalem. Udah Yesus tamak kalam Bait Allah, mulai mek Ya ngusir urang-urang te bejual de halaman Bait Allah. Mija penukar duit, ngau bangku pedagang penyual Merpati delingkap ke Ya, ¹⁶ ngau Ya ndai nyagi urang ngemaik barang ngelintas halaman Bait Allah. ¹⁷ Lalu Ya ngajar sidak, jekuh Ya: "Ndai mek bisik tetulis: "RumahKu bakal detelah rumah doa bagi semua bansa? Tapi kitak udah nyadi ke yak sarang penyamun!" ¹⁸ Imam-imam kepalak ngau ahli-ahli Taurat ninga tentang peristiwa yak, sidak berusaha kak ngemenasa ke Ya, empadai sidak takut ngau Ya, medak urang mayuh iran ngau pengajar Ya. ¹⁹ Kak malam sidak keluar agik re kuta. ²⁰ Lelam kenyung rama Yesus ngau bala murid ngelalu, sidak medak pun ara te tadik teberangkai sampai ke akar. ²¹ Maka, Petrus tekingat ke nama te udah tejadi tadik, udek ya banai ngau Yesus: "Rabi, pedak, pun ara te Nuan kutuk yak dah teberangkai." ²² Yesus nyaut sidak: "Pecayak na ngau Allah! ²³ Aku madah kitak: "Barangsapa te banai ngau bukit tuk: Angkat, tesempalung kalam laut! Asal ati ndai ragu, tapi pecayak, bahwa nama te depanai yak bakal tejadi, maka hal yak tejadi bagi ya. ²⁴ Nyak nyuruh Kumadah kitak: Nama te kitak pintak ngau doa, pecayak na kalau kitak pesti bulih yak, maka hal yak bakal deberik ngau kitak. ²⁵ Ngau antik kitak bediri untuk bedoa, ampun lau antik bisik utai de ati kita teradap urang, isak Apai te de Surga ngampun ugak kesalah kitak." ²⁶ Tapi antik kitak ndai ngampun, maka Apai kita de Surga ndai ugak ngampun kesalah-kesalah kitak. ²⁷ Udek Yesus ngau murid-murid Ya datai de Yerusalem. Ketengah Ya bejalai de halaman Bait Allah, imam-imam kepalak ngau ahli-ahli Taurat datai ngau Ya, ²⁸ ngau betaanyak: "Ngau kuasa nama Mih mulah hal-hal tuk?" ²⁹ Saut Yesus ngau sidak: "Aku kak nanyak kitak. Saut lau, maka Aku bakal madah kitak ngau kuasa nama Aku mulah hal tuk. ³⁰ Pemanik (Baptisan) Yohanes yak re surga atau re mensia" Saut Aku!" ³¹ Sidak banai sama direk: "Antik kita madah: re surga, Ya nyaut: Antik piak nama kitak ndai pecayak ngau ya? ³² Tapi, ndai em patut kita madah :re mensia!" Empadai sidak takut ngau urang mayuh, empadai urang mayuh ngangap Yohanes bebenar Nabi. ³³ Saut sidak ngau Yesus: "Kami ndai ketau." Maka saut Yesus ngau sidak: "Antik piak, aku sik ndai madah kitak ngau kuasa ni Aku mulah hal-hal tuk."