Perempama tentang pengarap-pengarap kebun anggur ¹ Udek Yesus mulai banai ngau sidak alam perempamaan: "Bisik urang mukak kebun anggur, dekelingik ngau pagar. Ya ngali lubang tempat meras anggur ngau niri ke manara jaga. Udek kebun yak desewa ke Ya ngau pengarap-pengarap, udek ya angkat ke negeri bukai. ² Rama datai musim, ya nyuruh anak buah ya ngau pengarap-pengarap, untuk nerimak bagi asil kebun yak re sidak. ³ Tapi sidak nangkap anak buah yak, depaluk sidak, suruh sidak pulai ngau jari puang. ⁴ Udek ya nyuruh anak buah te bukai ngau sidak. Nyak sik depaluk sidak sampai lukak kepalak ya, ngau depemalu ke sidak ugak. ⁵ Udek ya nyuruh anak buah te bukai agik, nyak matang debunuh sidak. Mayuh te bukai agik re yak, bisik te depaluk, bisik ugak te debunuh. ⁶ Pituk cuma tedudi sikuk agik anak ya. Udek ya nyuruh anak ya ngau sidak, jekuh ya: Anakku pesti ketakut sidak. ⁷ Tapi pengarap-pengarap yak banai sama direk: Ya yak mek ahli waris, buh kita munuh ya, isak warisan jadi empu kita. ⁸ Sidak nangkap udek munuh ya, lalu desempalung keluar kebun. ⁹ Pituk kekira nama te depulah tuan te empu kebun anggur yak? Ya datai ngemenasake pengarap-pengarap yak, udek kebun yak depecayak ke ya ngau urang bukai. ¹⁰ Ndai suah kah kitak maca nas tuk: Batu te debuai tukang, udah jadi batu penyuru: ¹¹ hal tejadi re pihak Tuhan, kecelik nyaruh (ajaib) de mata kita." ¹² Udek sidak berusaha kak nangkap Yesus, empadai sidak ketau kalau sidak mek te demaksud ke Ya ngau perempamaan yak. Tapi sidak takut ngau urang mayuh, nyak nyuruh sidak angkat ngau ngisak ke Ya. ¹³ Udek urang Farisi ngau Herodian desuruh ngau Yesus kak nyerat Ya ngau penanyak. ¹⁴ Sidak yak datai, betanyak ngau Ya: "Guru, kami ketau, Nuan urang jujur, ndai sik te ketakut, empadai Nuan ndai mintak puji, tapi jujur ngajar jalai Allah. Tau atau ndai mayar pajak ngau Kaisar? Kami kalah mayar atau ndai?" ¹⁵ Tapi Yesus ketau pengenyaik sidak, udek banai ngau sidak: "Nama kitak ncuba Aku? Baik kituk dinar ilak Kumedak!" ¹⁶ Udek debaik sidak. Maka Ya betanyak ngau sidak: "Gamar ngau tulis sapa tuk?" Saut sidak: "Gamar ngau tulis Kaisar." ¹⁷ Udek jekuh Yesus ngau sidak: "Berik ngau Kaisar nama te kalaha kitak berik kiyak, berik ngau Allah nama te kalah kitak berik ngau Ya!" Sidak matang iran ninga Ya. ¹⁸ Urang Saduki te madah ke nisik pemangkit datai ngau Yesus. Sidak nanyak Ya: ¹⁹ "Guru, Musa nulis perintah tuk untuk kita: Antik urang te bisik menyadik bakas, nudi ke bini mati tapi ndai sik anak, menyadik ya kalah jadi ngau bini ya isak bulih kenturun bagi menyadik ya. ²⁰ Bisik tujuh menyadik. Te tuai bebini, mati ndai sik nudi ke anak. ²¹ Udek te kedua, jadi ngau inuk yak ugak, mati ndai sik nudi ke anak. Piyak ugak ngau te ketiga. ²² Piyak mek bejurut sampai ketujuh ndai sik kenturun. Udek pengabis, udah sidak mati semua, inuk yak mati ugak. ²³ Pada ari bangkit, antik sidak bangkit, sapa te jadi laki inuk yak? Empadai ketujuh menyadik bebini ke ya." ²⁴ Saut Yesus ngau sidak: "Kitak sesat, empadau kitak ndai nyaruk Kitab Suci ngau kuasa Allah. ²⁵ Empadai antik urang bangkit dentara urang mati, urang ndai kawin mengawin, tapi idup upa malaikat de surga. ²⁶ Udek tentang urang mati te bangkit, ndai nama kitak maca alam kitab Musa, alam gisah belayan durik, tipa ingan firman Allah ngau ya: "Aku tuk Allah Abraham, Allah Ishak ngau Allah Yakub? ²⁷ Ya bukai Allah urang mati, tapi Allah urang idup. Kitak bebenar sesat!" ²⁸ Udek bisik surang ahli Taurat te ninga Yesus numut nyaut penanyak urang Saduki, ya datai kiyak, betanyak: "Ukum ni te palin utama?" ²⁹ Saut Yesus: "Ukum te terutama yak: Urang Israel, dinga ke Tuhan Allah kita, Tuhan yak esa. ³⁰ Kasih ke Tuhan Allah ngau segenap ati, segenap jiwa, ngau segenap akal budi ngau segenap kekuatan kitak. ³¹ Ukum te kedua: Kasih ngau pangan upa kasih ke dirik. Ndai sik ukum bukai te lebih utama repada kedua ukum yak." ³² Udek jekuh Ahli Taurat yak ngau Yesus: "Saja nampal, Guru, kenak jekuh Nuan, bahwa Ya Esa, ndai sik te bukai sebali Ya. ³³ Mimang ngasih Ya ngau segenap ati, penumut, ngau penguat, ngasih pangan lagu ngasih dirik, jauh lebih utama re semua te detunu ngau desemelih." ³⁴ Yesus medak, tipa pengantus mensia yak nyaut, Ya madah: "Dirik ndai jauh re Kerajaan Allah!" Udek ndai sik urang tekik nanyak ke nama-nama ngau Yesus. ³⁵ Bisik sekalik rama Yesus ngajar de Bait Allah, Ya madah: "Tipa ahli-ahli Taurat tau madah antik Mesias anak Daud? ³⁶ Daud ulih depimpin Roh Kudus banai: Tuhan dah befirman ngau Tuanku: duduk desepiak kanan Aku, sampai munsuh-munsuh Mih Kutaruh de babah kaki Mih. ³⁷ Daud nelah Ya Tuan, ndai patut Ya anak ya ugak?" Urang mayuh ninga Ya ngau penuh penekak. ³⁸ Alam pengajar Ya, Yesus madah: "Ati-ati ngau ahli Taurat te rajin bejalai ngau jubah panyai, ngau tugam benar nerimak hurmat de pasar, ³⁹ rajin duduk de tempat palin depan de rumah ibadat, tempat tehormat de pesta, ⁴⁰ te nelan langkau janda-janda, ngelabuk urang ngau doa te panyai-panyai. Sidak yak pesti nerimak ukuman te palin berat." ⁴¹ Bisik sekalik Yesus duduk ngadap peti persembahan, ngupuk tipa urang mayuh nepuk ke duit kalam peti yak. Mayuh urang kaya merik ngau jemlah besai. ⁴² Udek datai surang janda meskin nepuk duit dua peser sutik duit. ⁴³ Maka dekumai Ya murid-murid udek banai ngau sidak: "Ku madah kitak, janda meskin yak merik palin mayuh re semua urang te nepuk ke duit kalam peti persembahan. ⁴⁴ Empadai sidak bukai merik re kelebih, sementara janda meskin yak merik re kekurang ya, semua te bisik entang ya, pengidup ya."