KHOTBAH TENTANG AKHIR ZAMAN Bait Allah derubuh ¹ Rama Yesus keluar re Bait Allah, bisik murid banai ngau Ya: "Guru, pedak batu-batu yak, kukuh benar, gedung-gedung sik baik (megah)!" ² Udek Yesus banai ngau ya: "Mih medak gedung-gedung te baik (megah) yak? Ndai sik sigikpun batu tesusun datau pangan, semua bakal derubuh." ³ Rama Yesus duduk datau bukit Zaitun, beradap ngau Bait Allah, Petrus, Yakobus, Yohanes,, ngau Andreas betanyak kedirik ngau Ya: ⁴ "Padah ngau kami sebila maya yak, nama kecelik, antik semua yak dah datai kesudah." ⁵ Udek Yesus mulai banai ngau sidak: "Waspada nang sampai bisik urang nyesat ke kitak! ⁶ Mayuh urang datai mengau namaKu ngau banai: Aku tuk me Ya, sidak nyesat ke mayuh urang. ⁷ Antik kitak ninga auh perang, peluluk-peluluk tentang perang, nang kitak gaduh. Yak kalah tejadi, tapi apan kebaduk. ⁸ Empadai Bansa banagkit ngelawan bansa, kerajaan ngelawan kerajaan. Bisik gempa bumi de mayuh tempat, bisik lapar. Semua yak baruk peruba penisa kak datai zaman baru. ⁹ Tapi kitak tuk, ati-ati! Kitak bakal deserah ke mejelis agama, kitak depaluk derumah ibadat, kitak dadap ke mua penguasa-penguasa ngau raja-raja empadai Aku, sebagai kesaksian bagi sidak. ¹⁰ Tapi Injil kalah depadah lau ngau semua bansa. ¹¹ Antik kitak diring ngau deserah, ndai sah gaduh nama te kitak panai, tapi padah na nama te dah dekarunia ke ngau kitak rama yak ugak, empadai bukai kitak te banai tapi Roh Kudus. ¹² Menyadik bakal nyerah ke menyadik ya untuk debunuh, piyak ugak apai teradap anak ya. Anak meruntak ngau urang tuai udek munuh sidak. ¹³ Kitak debencik semua urang empadai nama Aku. Tapi urang te tan sampai kesudah bakal selamat." ¹⁴ Antik kitak medak urang benasa te kejam bediri de tempat ndai patut - bala pemaca kalah merati yak - maka urang-urang de Yudea kalah rari ke bukit. ¹⁵ Urang te ketengah beribut datau atap langkau nang turun ngau tamak ngamik kebutai ralam langkau ya, ¹⁶ ngau urang te duma nang bekalih ngamik pengau ya. ¹⁷ Celaka mek ibuk-ibuk te ketengah nganung ngau nusu kanak rama yak. ¹⁸ Bedoa, isak semua tuk nang tejadi rama musim celap. ¹⁹ Empadai rama yak bakal tejadi penisa te pan suah mulai re peruba denia bisik, te depulah Allah, sampai pituk ngau te ndai bakal tejadi agik. ²⁰ Ngau sekira Tuhan ndai mpegesak waktu yak, maka re semua te idup ndai sik te selamat; tapi empadai urang-urang pilihan te dah depilih Ya, Tuhan mpegesak waktu yak. ²¹ Rama yak antik bisik urang banai ngau kitak: Pedak, Mesias bisik dituk, atau: Pedak, Mesias bisik din, nang kitak pecayak. ²² Empadai Mesias-mesias pelsu, ngau nabi-nabi pelsu bakal muncul ngau sidak mayuh mulah mujizat, ngau maksud, sekira dapat kak nyesat ke urang-urang pilihan. ²³ Ati-ati kitak! Aku dah dulau madah semua tuk ngau kitak." ²⁴ "Tapi rama yak, udah temuk penisa yak, mata panas jadi keleman, bulan ndai bepenang ²⁵ bintang-bintang jatuk re langit, ngau kuasa langit beguncang. ²⁶ Rama yak urang medak Anak Mensia datai alam awan ngau segala kekuasaan ngau kemuliaan Ya. ²⁷ Rama yak ugak Ya nyuruh malaikat-malaikat keluar, ngumpul urang-urang pilihan re keempat penyuru tanah aik (bumi), re ujung bumi sampai ke ujung langit. ²⁸ Amik pelajar re perempamaan pun ara. Antik dan dan mit mulai lemah ngau betaruk (betunas), kitak ketau, musim panas dah damping. ²⁹ Piyak ugak, antik kitak medak hal-hal tajadi, berete dah damping. ³⁰ Aku madah kitak: Angkatan tuk ndai dekelalu sapan semua tuk tejadi. ³¹ Langit ngau bumi belalu, tapi anaiKu ndai belalu. ³² Tapi tentang ati atau saat yak, ndai sik urang te ketau, malaikat-malaikat de surga sik ndai, Anak sik ndai, hanya Apai na." ³³ "Ati-ati ngau bejaga-jaga! Empadai kitak ndai ketau sebila pengari datai. ³⁴ Sama halnya upa urang te angkat, nudi ke langkau ngau nyerah ke tangung jawab ngau anak buah, masing-masing bisik tugas, merintah ke penunguk lawang isak bejaga-jaga. ³⁵ Nyak nyuruh kalah bejaga-jaga, empadai kitak ndai ketau sebila tuak langkau pulai, kak malam, atau tengah malam, atau ujung malam, atau lelam kenyung begayap, ³⁶ isak nang sampai ya datai, nemu kitak ketengah tinuk. ³⁷ Nama te Kupadah ngau kitak, padah ke ngau semua uraang: bejaga-jaga!"