Amuk munuh Yesus ¹ Ari raya Paskah ngau ari raya Ruti Ndai Beragi mulai dua ari agik. Imam-imam kepalak ngau ahli-ahli Taurat ngegak cara kak nangkap ngau munuh Yesus ngau tipu muslihat, ² empadai sidak banai: "Nang rama raya, isak ndai timul pekelai dentara rakyat." ³ Rama Yesus de Betania, de langkau Simon te kusta, ketengah duduk makai, datai inuk ngemaik buli-buli pualam bisik minyak narwastu merni te mahal rega. Dah depecah ya rekung buli-buli yak, minyak detumpah ke ya katau kepalak Yesus. ⁴ Bisik urang te sau banai sama direk: "Nama beruak minyak narwastu tuk? ⁵ Minyak tuk tau dejual tiga ratus dinar lebih, duit e tau deberik ngau urang-urang meskin." Udek sidak ngelai inuk yak. ⁶ Tapi Yesus banai: "Isak ke ya. Nama kitak nyusah ke ya? Ya dah mulah te baik ngau Aku. ⁷ Empadai urang-urang meskin bisik seruntik entang kitak, ngau kitak tau nulung sidak sebila kitak kak, tapi Aku ndai seruntik tamai kitak. ⁸ Ya dah mulah nama te tau depulah ya. Tubuh Aku dah depanik minyak sebagai persiapan untuk pengubur Aku. ⁹ Aku madah kitak: Dini-dini Injil depadah deseluruh denia, nama te depulah ya tuk bakal detelah ugak untuk ngingat ya." ¹⁰ Udek angkat Yudas Iskariot, sikuk re duabelas murid, ngau imam-imam kepalak ngau maksud nyerahke Yesus ngau sidak. ¹¹ Sidak gaga bebenar rama ninga, sidak bejanyi kak merik ya duit. Udek ya ngegak kesempatan te baik untuk nyerah ke Yesus. ¹² Ari peruba ari raya Ruti Ndai Beragi, rama urang nyemelih domba Paskah, murid-murid Yesus banai ngau Ya: "Nuan kak kami angkat kini nyiapke Paskah untuk Nuan? ¹³ Udek Ya nyuruh dua urang murid ngau pesan: "Angkat ke kuta; din kitak betemu ngau urang te ngemaik kendi berisik aik. Petamai ya ¹⁴ padah ngau tuak rumah te depetamak ya: Pesan Guru: Dini ruai te desiap ke untuk Aku makai Paskah ngau murid-murid Aku? ¹⁵ Din urang yak nunyuk bisik ruai besai te udah lengkap desiap. Diyak kitak nyiapke gawai Paskah untuk kita!" ¹⁶ Maka angkat me sedua ngau datai de kuta, detemu sidak semua upa te depadah ke Yesus ngau sidak. Udek sidak nyiap ke Paskah. ¹⁷ Udah ari malam, datai Yesus tama kedua belas murid yak. ¹⁸ Rama sidak ketengah duduk makan, Yesus banai: "Aku madah kitak, bisik surang dentara kitak nyerah ke Aku, ya te makai tamai Aku." ¹⁹ Nyak me sedih bebenar ati sidak, surang-surang nanya ngau Ya: "Bukai aku kah Tuhan?" ²⁰ Saut Ya: "Urang yak bisik dentara kitak duabelas dituk, ya te nculup ke ruti kalam sutik pingan ngau Aku. ²¹ Anak Mensia mimang kalah angkat sesuai ngau bisik tetulis tentang Ya, tapi celaka mek urang te empadai ya Anak Mensia deserah ke. Lebih baik bagi mensia yak, sekira ya ndai delahir ke." ²² Rama Yesus ngau murid-murid Ya ketengah makai, Yesus ngamik ruti, ngucap berkat, mecah-mecah ruti udek merik ke ngau sidak samil banai: "Amik, tuk tubuhKu." ²³ udah yak Ya ngamik cawan, ngucap sukur udek merik ke ngau sidak, sidak semua minum re cawan yak. ²⁴ Ya banai ngau sidak: "Tuk darah Aku, darah jan'yi, te detumpah bagi mayuh urang. ²⁵ Aku madah kitak: Aku ndai bakal minum agik asil pun anggur sampai pada ari Aku minum te baru alam Kerajaan Allah." ²⁶ Udah temuk nyanyi-nyanyi pujian, sidak angkat ke Bukit Zaitun. ²⁷ Udek Yesus banai ngau sidak: "Kitak semua bakal teguncang iman. Empadai bisik tetulis: Aku bakal maluk gembala, ngau domba-domba yak bakal perarak. ²⁸ Tapi, seudah Aku bangkit, Aku lau re kitak ke Galilea." ²⁹ Jekuh Petrus ngau Ya: "Biarpun semua urang teguncang iman, aku ndai." ³⁰ Udek jekuh Yesus ngau Ya: Aku madah mih, pada ari tuk, malam tuk ugak, sapan manuk engkukuk dua kalik, mih dah nyangkal Aku tiga kalik." ³¹ Tapi Petrus bebenar banai: Sekalikpun aku kalah mati tamai Nuan, aku ndai bakal nyangkal Nuan." Semua sidak bukai sik banai piak ugak. ³² Udek Yesus ngau bala murid datai ke tempat te benama Getsemani. Jekuh Yesus ngau murid-murid Ya: "Duduk dituk, sementara Aku kak bedoa." ³³ Ya ngemaik Petrus, Yakobus ngau Yohanes tamai Ya. Ya takut bebenar, ³⁴ udek jekuh Ya ngau sidak: "Ati Ku sedih bebenar, asai kak mati. Dudi dituk bejaga-jaga." ³⁵ Ya maju sikit, ngerebah ke dirik ke tanah ngau bedoa, isak, sekira dapat, pitok lalu re Ya. ³⁶ Jekuh Ya: "U Apai, ndai sik te ndai patut bagi Nuan, amik cawan tuk re Aku, tapi nang sampai nama te kedekak Aku, tapi penekak Nuan." ³⁷ Udah Ya datai agik, medak sidak tiga ketengah tinuk. Ya banai ngau Petrus: "Simon, tinuk nama mih? Ndai nama mih sangup bejaga sejam na? ³⁸ Bejaga-jaga ngau bedoa, isak mih ndai jatuk kalam pencobaan; roh penunak, tapi dagin lemah." ³⁹ Udek Ya angkat, nelah doa te tadik agik. ⁴⁰ Rama Ya bekalih agik, Ya nemu sidak ketengah tinuk, empadai mata sidak dah berat, ngau sidak ndai numut madah ngau Ya. ⁴¹ Udek Ya angkat ketiga kalik, samil banai ngau sidak: "Tinuk am kitak pituk. Dah senta, pedak, Anak Mensia deserah ke jari urang bedosa. ⁴² Angkat, buh kita angkat. Ya te nyerah ke Aku dah damping." ⁴³ Rama Yesus ketengah banai, muncul Yudas, sikuk re kedua belas murid, tamai segerumung urang te maik isau ngau pentung, desuruh imam-imam kepalak, ahli-ahli Taurat ngau bala tetuai. ⁴⁴ Urang te nyerah ke Ya dah merik kecelik ngau sidak: "Urang te kusium yak me Ya, tangkap Ya, baik Ya ngau selamat." ⁴⁵ Rama ya datai kiak, ya lansung maju minik Yesus ngau banai: "Rabi," udek desium ya. ⁴⁶ Sidak megai Yesus lalu nangkap Ya. ⁴⁷ Sikuk re sidak te bisik diak, mirus isau, udek netak pening anak buah Imam besai sampai putus. ⁴⁸ Jekuh Yesus ngau sidak: "Depikir kitak Aku tuk penyamun, nyuruh kitak kalah sampai ngemaik bala isau, bala pentung ngau nangkap Aku? ⁴⁹ Padahal tetiap ari Aku nugau detengah-tengah kitak, ngajar de Bait Allah, kitak ndai nangkap Aku. Tapi kalah degenap nama te tetulis alam Kitab Suci." ⁵⁰ Udek semua murid rari nudi ke Ya. ⁵¹ Bisik urang biyak te cuma ngau kain lenan untuk nutup tubuh ya, nurut Yesus. Sidak kak nangkap ya, ⁵² tapi ya ngelecut kait yak, rari ngau telan'yang. ⁵³ Udek Yesus debaik, ngadap Imam Besai. Udek semua imam kepalak, tuai-tuai ngau ahli Taurat bekumpul diyak. ⁵⁴ Petrus nurut Ya re jauh, sampai ke tanah kelang Imam Besai, din ya duduk dentara pengawal-pengawal samil engkinuk minik api. ⁵⁵ Imam-imam kepalak, malah semua Mahkamah Agama ngegak kesaksian teradap Yesus isak Ya tau dukum mati, tapi sidak ndai sik bulih. ⁵⁶ Mayuh ugak urang madah ke kesaksian bulak teradap Ya, tapi ndai sik setampung kesaksian yak. ⁵⁷ Udek bisik ugak urang besaksi pelsu ngelawan Ya, ngau sangkak: ⁵⁸ "Kami dah ninga urang tuk banai: Aku bakal ngerubuh ke Bait Suci pempulah mensia, dalam waktu tiga ari bakal Ku diri ke te bukai, te bukai pempulah mensia." ⁵⁹ Dalam hal tuk, kesaksian sidak sik ndai betampung ngau sikuk surang. ⁶⁰ Maka Imam Besar bediri detengah-tengah sidang, betanyak ngau Yesus, jekuh ya: "Ndai nama Dirik nyaut sangkak sidak ngau Mih?" ⁶¹ Tapi Ya sik mansih sunyik, ndai sik nyaut nama-nama. Imam Besai betanyak ngau Ya sekalik agik, jekuh ya: "Nama Mih tuk Mesias, Anak re te tepuji?" ⁶² Saut Yesus: "Aku me Ya, ngau kitak bakal medak Anak Mensia duduk desepiak kanan te Palin Bekuasa, datai detengah-tengah awan de langit." ⁶³ Maka Imam Besai ngeridang pengau direk samil banai: "Kak kenama kita saksi agik? ⁶⁴ Kitak dah ninga Ya ngehujat Allah. Tipa penapat kitak?" Udek ngau sutik anai (suara bulat) mutus ke kalau Ya kalah dukum mati. ⁶⁵ Udek mulai kedak sidak ngeludah Ya, nutup mua Ya, ngucuh Ya samil banai: "Ui nabi, labak tabak!" Bala pengawal maluk Ya. ⁶⁶ Rama yak Petrus gik de babah, de tanah kelang. Udek datai anak buah inuk Imam Besai, ⁶⁷ rama inuk yak medak Petrus ketengah engkinuk, ya medak mua Petrus samil banai: "Mih te rajin tamai Yesus urang Nazaret yak." ⁶⁸ Tapi desangkal ya ngau banai: "Aku ndai ketau, ndai nyaruk nama te jekuh dik." Udek ya angkat ke seramik mua. (Manuk engkukuk). ⁶⁹ Rama inuk yak medak Petrus agik, ya banai ngau sidak te diak: "Urang tuk bah salah sikuk re sidak." ⁷⁰ Tapi Petrus nyangkal ugak. Ndai lamak udek urang-urang te diak banai ugak ngau Petrus: "Mih tuk pesti salah sikuk re sidak, apalagik mih urang Galilea!" ⁷¹ Mulai mek Petrus ngutuk ngau besumpah: "Aku ndai ngelala urang te kitak telah yak!" ⁷² Rama yak engkukuk manuk kedua kalik. Nyuruh Petrus tekingat ke nama te jekuh Yesus ngau ya: "Apan manuk engkukuk dua kalik, mih dah nyangkal Aku tiga kalik." Udek ya nyabak pengayah-ngayah.