¹ Yesus dadap mua Pilatus Lelam kenyung begayap imam-imam kepalak tamai tuai-tuai ngau ahli-ahli Taurat ngau seluruh Maahkamah Agama udah sutik pekat. Sidak masung Yesus, udek ngemaik Ya, nyerah ke Ya ngau Pilatus. ² Pilatus betanyak ngau Ya: "Mih raja urang Yahudi?" Saut Yesus: "Mih kedirik madah ke yak." ³ Udek imam-imam kepalak ngaju ke mayuh sangkak ngau Ya. ⁴ Pilatus betanyak ugak ngau Ya: "Ndai Dirik nyaut? Pedak mayuh benar sangkak sidak ngau Mih!" ⁵ Tapi Yesus sama sekalik ndai sik nyaut, nyuruh Pilatus iran. ⁶ Dah jadi kebiasa ngelepas ke urang te dukum rama tiap-tiap ari raya sesuai ngau pemintak urang mayuh. ⁷ Rama yak bisik urang te benama Barabas ketengah depenyara tamai pemeruntak bukai. Sidak yak dah munuh rama meruntak. ⁸ Maka datai urang mayuh mintak, isak kebiasaan yak detunak ugak. ⁹ Pilatus Nyaut sidak samil nanyak: "Kitak kak kalau kulepas ke raja urang Yahudi tuk?" ¹⁰ Ya ketau kalau imam-imam kepalak nyerah ke Yesus empadai dengki. ¹¹ Tapi imam-imam kepalak ngasut urang mayuh untuk mintak isak Barabas te delepas ke bagi sidak. ¹² Sekalik agik Pilatuss nyaut samil betanyak ngau sidak: "Antik piyak nama te kalah kupulah ngau Mensia te kitak telah raja urang Yahudi tuk?" ¹³ Maka sidak besurak agik: "Salib ke Ya!" ¹⁴ Udek Pilatus banai ngau sidak: "Tapi pengenyaik nama te depulah Ya?" Tapi sidak makin kayah besurak: "Salib ke Ya!" ¹⁵ Empadai Pilatus kak muas ke ati urang mayuh, delepas ya Barabas bagi sidak. Tapi Yesus desesah ya udek deserah ke ya isak desalib. ¹⁶ Udek Serdadu ngemaik Yesus kalam istana, gedung pengadilan, ngumai semua pasukan bekumpul. ¹⁷ Sidak nyaruk ke jubah ungu ngau Ya, nganyam mahkota durik detaruh de kepalak Ya. ¹⁸ Udek sidak mulai merik hormat ngau Ya: "Salam, raja urang Yahudi!" ¹⁹ Sidak maluk kepalak Ya ngau buluh, ngeludah Ya ngau belutut nyemah Ya. ²⁰ Udah nguluk-uluk Ya, sidak ngelecut ke jubah ungu re Ya, ngau ngenak ke pengau Ya ngau Ya. Yesus desalib Udek Yesus debaik keluar untuk desalib. ²¹ Rama yak ngelalu urang te benama Simon, urang Kirene, apai Aleksander sedua Rufus, te baruk datai re luar kuta, urang yak depaksa sidak untuk nangkun salib Yesus. ²² Sidak ngemaik Yesus ke tempat te benama Golgota, te bereti: Tempat Tengkurak. ²³ Udek sidak merik Ya anggur becampur mur, tapi Ya ngai. ²⁴ Udek sidak nyalib ke Ya, udek sidak magi pengau Ya, ncabut undi ngetau ke bagi masing-masing. ²⁵ Jam semilan, rama Ya desalib. ²⁶ Alasan Ya dukum bisik detelah entang tulis te tepasang diak: "Raja urang Yahudi". ²⁷ Tamai Ya desalib dua urang penyamun, sikuk sepiak kibak, sikuk sepiak kanan. ²⁸ (Genap nas Alkitab te bingan: "Ya teritung dentara urang-urang neraka (durhaka).") ²⁹ Urang-urang te ngelalu yak, ngehujat Ya samil ngilik ke kepalak sidak banai: "Mih te kak ngerubuh ke Bait Suci, ngau kak niri ke agik alam tiga ari, ³⁰ turun re salib yak, selamat ke dirik!" ³¹ Piak ugak imam-imam kepalak tamai ahli Taurat nguluk-uluk Ya dentara sidak, samil banai: "Urang bukai deselamat ke Ya, tapi Ya ndai mampu nyelamat ke direk! ³² Baik mek Mesias, Raja Israel yak, turun re salib yak, isak kita medak ngau pecayak." Sampai Sedua te desalib tamai Ya ncela Ya ugak. ³³ Jam dua belas, sekamat yak keleman sampai jam tiga. ³⁴ Pas jam tiga, Yesus banai ngau ingan kayah: "Eloi, Eloi, lama sabakhtani?" Te bereti: AllahKu, AlahKu, nama Nuan nudi ke Aku? ³⁵ ninga miak, urang te bediri diak madah: "Pedak, Ya ngumai Elia." ³⁶ Udek datai urang ngau bunga kerang, deculup ke ya kalam anggur masam, udek decucuk ke ya ngau buluh, merik Yesus minum samil banai: "Kita tunguk ngau pedak, datai ndai Elia nurun ke Ya." ³⁷ Udek Yesus banai ngau ingan kayak, nyerah ke nyawa Ya. ³⁸ Rama yak tabir Bait Suci tebelah dua ratau sampai kebabah. ³⁹ Kepalak pasukan te bediri ngadap Ya medak pemati Ya piak, banai: "Benar me urang tuk Anak Allah!" ⁴⁰ Bisik ugak bala inuk te medak re jauh, Maria Magdalena, Maria inai Yakobus, Yoses, ngau Salome. ⁴¹ Sidak yak dah tamai Yesus ngau ngelayan Ya rama Ya de Galilea. Ngau bisik ugak mayuh inuk bukai te dah datai ke Yerusalem tamai Yesus. ⁴² Sementara yak ari dah kak malam, ari yak, ari pesiapan nyamut Sabat. ⁴³ Nyak nyuruh Yusuf, urang Arimatea, anggota Majelis Besai te tekemuka, te nunguk-nunguk Kerajaan Allah, merani ke dirik ngadap Pilatus ngau mintak mayat Yesus. ⁴⁴ Pilatus iran ninga Yesus dah mati. ⁴⁵ Udah dedinga Ya peluluk kepalak pasukan, deberik ya mayat ngau Yusuf. ⁴⁶ Yusuf meli kain lenan, udek ya nurun mayat Yesus re salib, debalut ya ngau kain lenan. Udek depegalai ya alam kubur te dekali alam bukit batu. Udek batu besai depegiling ke ya ke mua kubur. ⁴⁷ Maria Magdalena ngau Maria inai Yoses medak dini Yesus depegalai.