Yesus bangkit ¹ Dah ngilah ari Sabat, Maria Magdalena, Maria inai Yakobus, ngau Salome meli rempah-rempah kak ke kubur ngau ngeminyak Yesus. ² Lelam kenyung begayap ari peruba mingu yak, udah mata panas muncul, sidak angkat ke kubur. ³ Sidak banai ngau sikuk surang: "Sapa te tau nguling ke batu yak ke kita re lawang kubur?" ⁴ Tapi rama sidak medak re damping, batu te besai diak udah teguling. ⁵ Udek sidak tamak kalam kubur, sidak medak bisik urang biak ngau jubah putih duduk desepiak kanan. Sidak tekejut, ⁶ tapi urang yak banai ngau sidak: "Nang takut! Kitak ngegak Yesus urang Nazaret, te desalib. Ya dah bangkit. Ya ndai sik dituk. Pedak! Tuk me pengkerang sidak ngalai ke Ya. ⁷ Tapi pituk angkat am, padah ngau murid-murid Ya ngau Petrus ugak: Ya ngenulai kitak ke Galilea; din kitak medak Ya, upa te udah depadah Ya ngau kitak." ⁸ Udek sidak keluar ngau rari nudi ke kubur yak, empadai sidak begetar begitik. Sidak ndai madah ke nama-nama ngau sapa-sapa empadai takut. Sidak madah ke pesan yak ngau Petrus tamai bala kaban-kaban ya ngau panus. Udah yak Yesus kedirik te madah ngelalau perentara murid-murid Ya peluluk te kudus ngau te ndai tau debenasa tentang keselamatan kekal re Timur ke Barata. ⁹ Udah Yesus bangkit lelam kenyung ari pertama mingu yak, Ya peruba nampak ke dirik ngau Maria Magdalena. Yesus suah ngusir tujuh sitan re ya. ¹⁰ Udek inuk yak angkat madah ke ngau sidak te ngiring Yesus seruntik, ngau te waktu yak nyabak kedak. ¹¹ Tapi rama sidak ninga Yesus idup dah depedak ya, sidak ndai pecayak. ¹² Udah yak Ya nampak ke dirik ngau sidak alam upa bukai, rama sedua ketengah bejalai keluar kuta. ¹³ Udek sidak bekalih madah ke yak ngau kaban bukai, tapi sidak sik ndai ugak pecayak. ¹⁴ Udek Ya nampak kedirek ngau kesebelas urang te ketengah duduk makai, udek Ya ngerara (mencela) ati sidak te ndai pecayak ngau degil, te ndai pecayak ke peluluk sidak te udah medak Ya udah Ya bangkit. ¹⁵ Udek Ya banai ngau sidak: " Angkat ke seluruh denia, padah ke Injil ngau semua te idup. ¹⁶ Sapa te pecayak ngau depanik (baptis) bakal deselamat, tapi sapa te ndai pecayak bakal dukum. ¹⁷ Kecelik-kecelik tuk nyerta urang te pecayak: sidak ngusir sitan demi nama Aku, sidak numut banai ngau aanai-anai te baru bagi sidak, ¹⁸ sidak megai ular, sekalikpun sidak minum racun te nyuruh mati, sidak ndai celaka; sidak ngeletak ke jari atau urang pedih, ngau sidak semuh." ¹⁹ Udah Tuhan Yesus banai piyak ngau sidak, Ya terangkat ke Surga, udek duduk desepiak kanan Allah. ²⁰ Sidak angkat madah ke Injil ke sekamat penyuru, ngau Tuhan turut bekerja ngau neguh ke firman ngau kecelik-kecelik te nyerta yak.