Yesus merik makai empat ribu urang ¹ Rama yak bisik ugak urang mayuh diyak, empadai sidak ndai sik pemakai, Yesus ngumai murid-murid Ya, banai: ² "Ati Ku tegerak ngau belas kasih ngau urang mayuh tuk. Dah tiga ari sidak tamai Aku, ndai sik pemakai. ³ Antik sidak Kusuruh pulai ke langkau ngau perut lapar, sidak bakal rebah de jalai empadai bisik te datai re jauh." ⁴ Saut Murid Ya: "Tipa de tempat te sunyik tuk, urang tau merik sidak ruti sampai kenyang?" ⁵ Yesus nanyak sidak: "Berapa ruti ntang kitak?" Saut sidak: "Tujuh." ⁶ Udek Ya nyuruh urang mayuh duduk de tanah. Udah yak Ya ngamik ketujuh ruti yak, nyucap sukur, mecah-mecah ke ruti yak, merik ke ngau murid-murid Ya, isak bala murid merik ngau urang mayuh. ⁷ Sidak bisik ikan ugak, dah ngucap berkat, Ia nyuruh isak ikan yak debagi-bagi ugak. ⁸ Sidak makai sampai kenyang. Udek sidak ngumpul ke sisak ruti, bisik tujuh bakul. ⁹ Pemayuh sidak kira-kira empat ribu urang. Udek Yesus nyuruh sidak pulai. ¹⁰ Ya naik ke perau tamai bala murid, angkat ke daerah Dalmanuta. ¹¹ Udek mansut urang-urang Farisi, mensaut ngau Yesus. Untuk ngetes Yesus, sidak mintak kecelik re Surga. ¹² Ya bekeluh, banai alam ati: "Nama sidak tuk mintak kecelik? Aku madah kitak, angkataan tuk sekalik-kalik ndai bakal deberik kecelik." ¹³ Ya nudi ke sidak; Ya naik ke perau, angkat ke seberang. ¹⁴ Udek, murid-murid Yesus kelupa maik ruti, cuma sigik te bisik alam perau. ¹⁵ Udek Yesus ngingat ke sidak, jekuh Ya: "Bejaga-jaga teradap ragi urang Farisi ngau ragi Herodes." ¹⁶ Maka sidak bepikir, lalu banai sama direk: "Yak depadah Ya empadai kita ndai ngemaik ruti." ¹⁷ Rama Yesus ketau ke nama te depanai ke sidak, Ya madah: "Nama kitak banai ke bisik ruti ngau ndai? Ndai nama kitak paham? ati kitak dah degil? ¹⁸ Kitak bisik mata, ndai nama kitak medak? Kitak bisik pening, ndai nama kitak ninga? Kitak ndai gik kingat, ¹⁹ rama Aku mecah ke ruti untuk limak ribu urang, berapa bakul sisak te dekumpul kitak?" Saut sidak: "Dua belas bakul." ²⁰ "Ngau rama tujuh ruti untuk empat ribu urang, berapa bakul penuh sisak dekumpul kitak?" Saut sidak: "Tujuh bakul." ²¹ Udek, jekuh Ya ngau sidak: "Agik gak kitak pan nyaruk?" ²² Udek Yesus ngau bala murid datai de Betsaida. Diyak sidak ngemaik ngau Yesus urang te butak, sidak muhun isak Ya nyapai mensia te butak. ²³ Yesus megai jari uraang butak, ngemaik ya keluar kampung. Udek Ya ngeludah mata urang yak, ngeletak ke jari atau ya ngau banai: "Dah medak pan?" ²⁴ Urang yak ngupuk ke depan, banai: "Aku medak urang, medak sidak bejalai-jalai, tapi upa pun kayu." ²⁵ yesus ngeletak agik jari Ya de mata mensia yak, nyak nyuruh mensia yak benar-benar semuh, tau medak semua utai ngau jelas. ²⁶ Udek Yesus nyuruh ya pulai ke langkau ngau banai: "Nang tamak kampung!" ²⁷ Udek Yesus ngau bala murid angkat ke kampung-kampung de sekitar Kaisarea Filipi. De tengah jalai Ya betaanyak ngau bala murid, jekuh Ya: "Jekuh urang, aku tuk sapa?" ²⁸ Saut sidak: "Bisik te madah: Yohanes Pemanik, bisik ugak te madah: Elia, bisik ugak te madah: urang re bala nabi." ²⁹ Ya betanyak ngau sidak: "Tapi nama jekuh kitak, sapa Aku tuk?" Saut Petrus: "Nuan Mesias!" ³⁰ Udek Yesus ndai nyagi sidak madah sapa-sapa, tentang Ya. ³¹ Udek Yesus mulai ngajar sidak, Anak Mensia kalah nangung mayuh penisa ngau ndai deterimak bala tuai-tuai, imam-imam kepalak ngau ahli-ahli Taurat, udek debunuh ngau bangkit udah ari ketiga. ³² Hal tuk depadah Ya terus terang. Tapi Petrus ngentun Yesus ke sisi, ngerara Ya. ³³ Maka Yesus melingung samil ngupuk murid-murid Ya ngelai Petrus, jekuh Ya: "Tungkal kau Iblis, empadai mih bukai mikir nama te depikir Allah, tapi nama te depikir mensia." ³⁴ Udek Yesus ngumai urang mayuh ngau murid-murid Ya banai ngau sidak: "Setiap urang te kak tamai Aku, ya kalah nyangkal dirik, mikul salib ya ngau tamai Aku. ³⁵ Empadai sapa te kak nyelamat ke nyawa, nyawa ya ayap; tapi barangsapa ayap nyawa empadai Aku ngau Injil, ya nyelamat ke. ³⁶ Nama guna urang bulih seluruh denia, tapi ayap nyawa. ³⁷ Nama te tau deberik ke ya sebagai ganti nyawa? ³⁸ Barangsapa malu empadai Aku ngau anai Aku detengah-tengah angkatan te ndai setia ngau bedusa tuk, Anak Mensia pun malu empadai urang yak antik Ya datai page lusak alam kemuliaan Apai-Ya, diring malaikat-malaikat kudus."