Perintah Allah ngau adat istiadat Yahudi ¹ Bisik sekalik segerumung urang Farisi ngau ahli Taurat re Yerusalem datai ngau Yesus. ² Empadai sidak medak bisik murid Ya makai ngau jari te ndai debasuk. ³ Empadai urang Farisi sama ngau urang Yahudi bukai, ndai makai antik ndai dulau masuk jari, empadai sidak bepegai ngau adat istiadat akik inik sidak; ⁴ ngau antik pulai re pasar, sidak ndai makai kalau pan masuk dirik lau. Mayuh warisan bukai agik te sidak pegai, upa masuk cawan, tepayan, ngau pekakas temaga. ⁵ Nyak nyuruh urang Farisi ngaau ahli Taurat betanyak ngau Ya: "Nama murid-murid Mih ndai idup nunak adat istiadat akik inik kita, makai ngau jari najis?" ⁶ Saut Ya ngau sidak: "Benar nubuat Yesaya tentang kitak, urang-urang munafik, empadai bisik tetulis: Bansa tuk memulia ke Aku ngau mulut na, padahal ati sidak jauh re Aku. ⁷ Pecuma sidak semayang ngau Aku, ajaran te dengau sidak berasal re perintah mensia. ⁸ Perintah Allah kitak ayu untuk bepegai ngau adat istiadat mensia." ⁹ Yesus banai ugak ngau sidak: "Numut nar kitak ngesamping ke perintah Allah, isak kitak tau nyaga adat istiadat kitak. ¹⁰ Empadai Musa dah banai: Hurmat ngau apai inai! Sapa te ngutuk apai ngau inai ya kalah mati. ¹¹ Tapi kitak madah: Antik urang banai ngau apai inai ya: Nama te bisik ntang aku te tau ngau ngidup kitak, dah kuguna untuk kurban persembahan ngau Allah-, ¹² maka kitak ndai lagi nyuruh sidak mulah bala nama-nama untuk apai inai sidak. ¹³ Ngau piak berete firman Allah kitak padah ndai belaku demi adat istiadat te kitak tunak. Mayuh te upa yak, kitak pulah." ¹⁴ Udek Yesus ngumai urang mayuh agik, banai ngau sidak: "Kitak semua dinga ke Aku bebuti. ¹⁵ Nama-nama te re luar, te tamak kalam urang, ndai najis ke urang, tapi nama te keluar re urang, yak te najis ke Ya." ¹⁶ Sapa te bepening, kalaah ninga! ¹⁷ Udah Ya tamak ke sigik langkau nangkis ke urang mayuh, murid-murid Ya nanyak nama rete perempama tadik. ¹⁸ Saut Ya: "Nama kitak ndai ugak nyaruk? Ndai ketau nama kitak, te datai re luar te tamak kalam urang ndai tau najis ke, ¹⁹ empadai bukai tamak kalam ati, tapi kalam perut ya, udek debuai de jaman?" Ngau piyak Ya madah semua pemakai halal. ²⁰ Jekuh Ya agik: "Nama te keluar re urang, yak te najis ke, ²¹ empadai re dalam, re ati urang, timul semua pemikir jaik, cabuk, ncuri, munuh, ²² jinah, pengangkang, jaik, licik, hawa nafsu, iri ati, hujat, sumung, bebal. ²³ Semua utai jaik yak timbul re dalam, yak te najis ke urang." ²⁴ Udek Yesus angkat riyak ke daerah Tirus. Ya tamak ke sebuah langkau, ngai deketau urang, tapi penatai Ya ndai alah depelabuk. ²⁵ Bisik surang ibuk te anak inuk ya kesarung roh jaik, ninga Ya lalu tesungkam de kaki Ya. ²⁶ Ibuk yak urang Yunani bansa Siro-Fenisia. Ya muhun Yesus ngusir sitan re anak ya. ²⁷ Udek Yesus banai ngau Ya: "Isak nemiak kenyang dulau, empadai ndai patut ngamik ruti te desiap ke bagi nemiak, nyempalung ke ya ngau ukui." ²⁸ Tapi ibuk yak nyaut: "Benar, Tuhan. Tapi ukui debabah mija mutik keredak ruti te dejatuk ke nemiak." ²⁹ Jekuh Yesus ngau ibuk yak: "Empadai anai dik, pituk angkat kin, empadai sitan dah keluar re anak dik." ³⁰ Ibuk yak pulai ke langkau direk, detemu ya anak ya galai de peninuk, semantara sitan dah keluar. ³¹ Udah yak Yesus nudi ke daerah Tirus ugak, ngelalu Sidon Ya angkat ke daerah Galilea, detengah-tengah daerah Dekapolis. ³² Diak urang urang mensia te tulik ngau gagap datai ngau Yesus, isak Ya ngeletak ke jari Ya datau mensia yak. ³³ Dah Yesus merarak ke direk re urang mayuh, Ya nyucuk ke jari ke pening mensia yak, udek Ya ngeludah, nyapai dilah mensia yak. ³⁴ Samil nengadah ke langit, Yesus nyintak penyuan, banai ngau ya: "Efata!", te bereti: Tebukak me! ³⁵ Udek pening mensia yak tebukak, te ngebat dilah ya telepas sekelin yak ugak, udek ya banai baik buti. ³⁶ Yesus bepesan ngau urang diak, nang sampai madah sapa-sapa. Tapi makin ndai sagi, makin nguman sidak madah kiak-kian. ³⁷ Sidak iran, samil banai: "Ya nyadi ke semua utai baik, te tulik jadi ninga, te bisuk numut banai."