Yesus ndai deterimak de Nazaret ¹ Udek Yesus angkat riyak depetamai bala murid Ya ke kampung asal Ya. ² Rama ari sabat Ya mulai ngajar de rumah ibadat, ngau jemaat te mayuh diyak tebelenga ninga Ya, jekuh sidak: "Reni Ya bulih semua yak? Hikmat nama te deberik ngau Ya? Ngau bala mujizat te upa yak, tipa jari Ya mulah yak? ³ Bukai mek Ya yak tukang kayu, anak Maria, menyadik Yakobuss, Yoses, Yudas ngau Simon? Ndai mek menyadik inuk Ya bisik tamai kita dituk" Udek sidak kecewa ngau ndai nerimak Ya. ⁴ Maka Yesus banai ngau sidak: "Nabi dehurmat urang dini-dini, sebali de tempat asal Ya, dentara menyanak Ya ngau de rumah Ya." ⁵ Ya ndai tau mulah mujizat sutik pun din, sebali nyembuh ke bisik te pedih ngau ngeletak ke jari atau sidak. ⁶ Ya iran ngau sidak te ndai pecayak. Yesus ngutus kedua belas rasul Udek Yesus bejalai ngeliling re desa ke desa samil ngajar. ⁷ Ya ngumai kedua belas murid yak, ngutus sidak dedua urang. Ya merik sidak kuasa atas roh-roh jaik, ⁸ bepesan ngau sidak isak nang ngemaik nama-nama selamak bejalai, cuma tungkat, ruti pun ndai tau, bekal sik ndai, duit alam ketang pungung sik ndai, ⁹ tau ngau alas kaki, tapi nang ngau dua lamar baju. ¹⁰ Jekuh Ya ngau sidak: "Antik kitak deterimak derumah urang, nugau na diak sampai kitak angkat agik. ¹¹ Antik sidak ndai kak nerimak kitak, ngau ndai kak ninga nama te depadah kitak, angkat kitak reyak, kebas ke debu dekaki kitak, sebagai peringatan ngau sidak." ¹² Udek sidak angkat, madah ngau bala urang kalah betubat, ¹³ sidak ngusir maayuh sitan, ngulai urang pedih ngau minyak, ngau nyemuh ke sidak. ¹⁴ Raja Herodes dah ninga tentang Yesus, empadai nama Ya dah tekenal, ngau urang madah: "Yohanes pemanik dah bangkit dentara urang mati, yak mek nyuruh kuasa-kuasa yak bekerja alam Ya." ¹⁵ Bisik te madah: "Ya yak Elia!" Te bukai agik madah: "Ya yak nabi, upa nabi-nabi te subak." ¹⁶ Rama Herodes ninga yak, ya banai: "Bukai, Ya Yohanes te udah ku tungkung kepalak ya, dah bangkit agik." ¹⁷ Empadai Herodes mek te dah nyuruh urang nangkap Yohanes ngau metuk ya alam penyara, empadai Herodias, bini Filipus smenyadik ya, empadai Herodias dah damik ya ke bini. ¹⁸ Empadai Yohanes suah ngerara Herodes: "Ndai tau mih ngamik bini menyadik mih!" ¹⁹ Nyak nyuruh Herodias naruh denam ngau Yohanes, bamuk kak munuh ya, tapi ndai dapat, ²⁰ empadai Herodes segan ngau Yohanes, ya ketau Yohanes yak urang benar ngau suci, jadi ya ngelinuk Yohanes. Tapi antik ya ninga ke Yohanes, ati ya ruh ndai tentu rudu, tapi ya gaga ugak ninga ke Yohanes. ²¹ Udek, datai ugak kesempatan baik bagi Herodias, rama ari ulang taaun Herodes, mulah pesta untuk bala pemesai-pemesai ya, perwira, ngau urang tekemuka de Galilea. ²² Rama yak anak inuk Herodias tampil nari, ya begaga ati Herodes ngau bala tamu-tamu ya. Raja yak banai ngau nemiak yak: "Nama te kak depintak, kuberik semua ngau dik!", ²³ lalu besumpah ngau ya: "Nama te dik pintak, kuberik ngau dik, walaupun setengah re kerajaanku!" ²⁴ Nemiak yak angkat nanyak inai ya: "Nama te kalah kupintak?" Saut ya: "Kepalak Yohanes Pemanik!" ²⁵ Udek sigat-sigat ya nguang raja, mintak: "Aku kak, sekelin tuk, nuan merik aku kepalak Yohanes Pemanik atau talam!" ²⁶ Udek raja sedih bebenar, tapi empadai ya dah besumpah ngau ndai nyaman ke bala tamu-tamu ya, ya ndai kak nolak. ²⁷ Sekelin yak raja merintah pengawal isak nungkung kepalak Yohanes. Urang yak angkat nungkung kepalak Yohanes depenyara. ²⁸ Ya ngemaik kepalak Yohanes de talam, deberik ya ngau nemiak yak, nemiak yak merik ngau inai ya. ²⁹ Rama murid-murid Yohanes ninga yak, sidak datai ngamik mayat ya, dekubur ke sidak. ³⁰ Udek bala rasul bekalih bekumpul ngau Yesus, ngisah ke ngau Ya nama te depulah ngau te dajar sidak. ³¹ Udek Ya banai ngau sidak: "Buh kituk ke tempat te sunyik, isak kita kedirik, taua betegak sekejap!" Empadai urang mayuh bebenar te pulai, datai, nyuruh sidak ndai sempat makai. ³² Udek sidak angkat ngau perau ke tempat te sunyik. ³³ Tapi rama sidak angkat, mayuh urang medak sidak, nyuruh sidak ketau kini tuju. Lalu sidak mintas ngamik jalai darat, nyuruh sidak dulau re sidak datai. ³⁴ Rama Yesus naik ke darat, Ya medak urang mayuh bebenar, nyuruh Ya kasih ngau sidak, sidak upa domba te ndai sik gembala. Udek Ya mulai ngajar mayuh hal ngau sidak. ³⁵ Rama yak ari dah kak malam, murid-murid datai ngau Ya, jekuh sidak: "Tempat tuk sunyik, ari dah kak malam." ³⁶ Suruh sidak angkat, isak sidak tau meli pemakai de desa-desa dekampung sekamat tuk." ³⁷ Tapi saut Ya: "KItak kalah merik sidak makai!" Saut sidak: "Jadi kamai kalah meli ruti serega dua ratus dinar untuk merik sidak makai?" ³⁸ Jekuh Ya ngau sidak: "Apa mayuh ruti te bisik entang kitak? Bak peresa!" Dah deperesa, sidak banai: "Limak ruti ngau dua ikan." ³⁹ Udek Ya nyuruh sidak duduk bekelumpuk datau rumput. ⁴⁰ Udek sidak duduk bekelumpuk, bisik te seratus urang, bissik te limak puluh sekelumpuk. ⁴¹ Udah yak Ya ngamik ruti kedua utik ruti ngau dua ikuk ikan, Ya nengadah ke langit, ngucap berkat, mecah ke ruti, deberik ngau murid-murid untuk debagi ngau urang mayuh tadik. ⁴² Udek sidak semua makai sampai kenyang. ⁴³ Selain re sisak ikan, dekumpul sidak sisak ruti, dua belas bakul penuh. ⁴⁴ Te makai diak limak ribu urang bakas. ⁴⁵ Udah yak Yesus nyuruh bala murid Ya dulau naik ke perau angkat ke seberang, ke Betsaida, sementara Ya nyuruh urang mayuh pulai. ⁴⁶ Udak Ya perarak re sidak, Ya angkat ke bukit, bedoa. ⁴⁷ Tengah malam, perau sidak dah nugau detengah, semtara Ya nugau kedirik de darat. ⁴⁸ Rama Ya medak sidak puas nar bekaayuh empadaai ribut kayah, kekira jam tiga malam Ya datai ngau sidak bejalai datau aik, bamuk kak ngelih sidak. ⁴⁹ Rama sidak medak Ya bejalai datau aik, dekira sidak Ya antu, udek sidak mukau ngangau, ⁵⁰ empadai sidak tekejut semua medak Ya. Tapi sigat-sigat Ya madah sidak: "Tenang! Tuk Aku, nang takut!" ⁵¹ Udek Ya naik ke perau ngau sidak, ribut lalu baduk. Sidak iran, ⁵² empadai udah kasus ruti yak, apan ugak sidak nsaruk, ati sidak tetap degil. ⁵³ Sepenatai de seberang, Yesus ngau bala murid bedarat de Genesaret ngau betan diak. ⁵⁴ Rama sidak keluar re perau, urang lansung ngelala Yesus. ⁵⁵ Maka bala urang beguang ngusung sidak, ngemaik urang te pedih atau tilam ngau Yesus, dini-dini Ya nugau. ⁵⁶ Kini-kini Ya angkat, de desa, kuta, kampung, urang ngengkah ke bala te pedih de pasar, muhun ngau Ya isak sidak tau nyapai Jubah Ya. Semua urang te nyapai jubah Ya jadi semuh.