Yesus ngusir roh jaik re urang Gerasa ¹ Udek sidak datai ke seberang danau, daerah urang Gerasa. ² Baruk gak Yesus turun re perau, urang te kesarung roh jaik datai ngusung Ya. ³ Mensia yaak nugau diak, ndai sik agik urang te sangup ngebat ya, biarpun ngau rantai, ⁴ empadai udah pisit ya de petuk ngau derantai, tapi rantai deputus ke ya, petuk dancur ke ya, nyak nyuruh ndai sik urang te matang kuat untuk bejinak ya. ⁵ Lawas malam ya bekeliaran de kubur ngau de bukit-bukit, samil menciak merabak maluk direk ngau batu. ⁶ Rama ya medak Yesus re jauh, ya rari ngusung Yesus lalu nyemah Ya, ⁷ ya menciak kayah benar: "Namu urus MIh ngau aku, Yesus anak Allah te paling tingik? Demi Allah nang nisa aku!" ⁸ Empadai subak Yesus madah ngau ya: "Dirik roh jaik! Keluar re mensia tuk!" ⁹ Udek Ya betanyak ngau mensia yak: "Sapa nama dirik?" Saut ya: "Legion, empadai kami mayuh." ¹⁰ Ya mintak muhun benar ngau Yesus isak ndai ngusir roh-roh yak keluar re daerah yak. ¹¹ De riring bukit bisik babi ketengah ngegak pemakai, ¹² udek roh-roh diyak mintak ngau Yesus, jekuh sidak: "Kami kak tamak kalam babi-babi yak!" ¹³ Yesus ngabul ke pemintak sidak. Udek roh-roh jaik yak keluar re yak, tamak kalam babi-babi yak. Rumung babi te kira-kira dua ribu ikuk pemayuh, terejun ke sisi jurang kalam danau ngau mati lemas diyak. ¹⁴ Udek penyaga babi yak rari ngisah ke hal yak de kuta ngau kampung sekamat yak. Udek urang datai kiak medak te nama te bisik diak. ¹⁵ Sidak datai ngau Yesus, medak mensia te kesarung tadik duduk, udah bepengau pakai, urang aantus. Mungkak sidak jadi takut. ¹⁶ Sidak te udah medak ngisah ke ngau urang tentang mensia te kesarung ngau babi-babi tadik. ¹⁷ Udek sidak nesak Yesus nudi ke daerah sidak. ¹⁸ Rama Yesus naik agik kalam perau, mensia te kesarung tadik kak tamai Yesus. ¹⁹ Yesus ndai nyagi, tapi Ya banai ngau mensia yak: "Dirik pulai kerumah, ngau urang-urang dekampung, padah sidak, nama te depulah Tuhan ngau dirik, ngau tipa Tuhan ngasih dirik!" ²⁰ Mensia yak pulai, mulai madah de daaerah Dekapolis nama te udah depulah Yesus ngau ya, ngau sidak jadi iran. ²¹ Yesus dah nyebrang agik ngau perau, mayuh urang begerumung datai ngelingik Ya. Ya nugau de sisi danau, ²² Yairus, kepalak rumah ibadat datai. Rama medak Yesus ya tesungkam de kaki Yesus ²³ mintak muhun ngau Ya: "Anak inukku pedih ampir mati, datai kin, tumpang ke jari Nuan atau ya, isak ya selamat ngau tetap idup." ²⁴ Udek Yesus angkat tamai urang yak. Urang begerumung bedesak-desak tamai Ya. ²⁵ Diyak bisik urang inuk te udah dua belas taun pedih pendarahan. ²⁶ Ya dah pisit berubat, sampai abis semua pemisik ya, bukai semuh malah tamah parah. ²⁷ Ya dah ninga berita tentang Yesus, maka detengah-tengah urang mayuh diak, ya minik Yesus re belakang, nyapai ramai jubah Yesus. ²⁸ Empadai jekuh ya: "Nang ndai nyapai jubah Ya, aku semuh." ²⁹ Sekelin yak ugak pendarahan baduk, ya ngasai tubuh ya dah semuh re pemedih. ³⁰ Rama yak ugak Yesus ketau, bisik tenaga te keluar re tubuh Ya, Ya malik detengah mensia mayuh, ngau betanyak: "Sapa te nyapai jubahKu?" ³¹ Bala murid Ya nyaut: "Nuan medak tipa urang mayuh dituk bedesak-desak minik Nuan, Nuan betanyak: Sapa te nyapai Aku?" ³² Udek Ya medak sekamat yak, ngupuk sapa te dah nyapai Ya. ³³ Inuk yak jadi takut, rama ketau nama te tejadi ngau ya, tampil lalu tesungkam de mua Yesus, samil madah bebenar nama te tejadi ngau Ya. ³⁴ Jekuh Yesus ngau inuk yak: "Anak Ku, iman dik dah nyelamak ke dik. Angkau ngau selamat ngauaaa semuh re pemedih dik!" ³⁵ Ketengah Yesus banai, datai urang re keluarga kepalak rumah ibadat yak, banai: "Anak mih dah mati, nama guna mih nyusah ke Guru?" ³⁶ Tapi Yesus ndai mening ke nama te jekuh sidak, Ya banai ngau kepalak rumah ibadat: "Nang takut, pecayak na!" ³⁷ Udek Yesus ndai nyagi sidak bukai tamai, sebali Petrus, Yakobus ngau Yohanes. ³⁸ Sidak datai de rumah kepalak ibadat, depedak Ya urang ragak, nyabak kayak bebenar, ³⁹ Udah Ya tamak, Ya banai ngau sidak diak: "Nama kitak ragak nar nyabak? Nemiak tuk ndai mati cuma tinuk!" ⁴⁰ Tapi sidak ketawak ke Ya. Maka dusir Ya semua urang yak, lalu debaik Ya apai inai nemiak yak ngau sidak te tamai Ya tamak kalam pangkin nemiak yak. ⁴¹ Depegai Ya jari nemiak yak, jekuh Ya: "Talita kum," te bereti: "Anak, Aku madah dik, angkat!" ⁴² Nemiak yak lansung aangkat ngau bejalai, empadai umur ya dah dua belas taun. Semua urang te bisik diyak, tebelenga. ⁴³ Ya bepesan ngau sidak, isak nang sampai bisik urang te ketau hal yak, udek Ya nyuruh sidak merik nemiak yak makai.