Tempat kudus de bumi ngau de surga ¹ Mimang perjanjian te peruba bisik ugak peraturan-peraturan untuk ibadah ngau untuk tempat kudus pempulah jari mensia. ² Empadai bisik desiap ke kemah, bagian palin depan, diak bisik kaki dian ngau mija bisik ruti. Bagian yak mek te detelah tempat te kudus. ³ De belakang tirai te kedua bisik sigik agik kemah te detelah tempat te palin kudus. ⁴ Diak bisik mezbah penunu ukupaan re emas, ngau tabut perjanjian, te dekumus ngau emas; alam tabut perjanjian yak bisik buli-buli emas berisik manna, tungkat Harun te suah belantang ngau loh loh batu te betulis ke perjanjian, ⁵ ngau datau yak, kedua utik kerup kemuliaan te ngelinuk (menaungi) tutup pendamaian. ⁶ Piak mek cara tempat te kudus yak datur. Maka imam-imam tamak k'alam kemah te palin depan yak untuk ibadah sidak, ⁷ tapi k'alam kemah te kedua cuma Imam Besai na te tamak setaun sekalik, ngau kalah ngau darah te ya persembahkan empadai direk ngau empadai pelangar ulih umat ya ngau ndai sengaja. ⁸ Ngau piak Roh Kudus madah, bahwa jalai ke tempat kudus yak apan tebukak, selamak kemah peruba agik bisik. ⁹ Yak bah kiasan masa tuk. Sesuai ngau yak depersembah ke kurban ngau persembahan te ndai dapat nyempurna ke sidak te mempersembah ke yak nunak ati nurani sidak, ¹⁰ empadai semua yak, bukai re makai minum ngau mayuh macam pemasuk (pembasuhan), cuma peratur-peratur untuk idup insani, te cuma belaku sampai senta waktu pemaru (pembaharuan). ¹¹ Tapi Kristus dah datai sebagai Imam Besaai untuk hal-hal te baik te kak datai: Ya dah ngelintas kemah te lebih besai ngau te lebih sempurna, te bukai depulah ulih jari mensia, - rete ndai temasuk alam pempulah tuk, - ¹² ngau Ya dah tamak sekalik untuk selamak-lamaknya k'alam tempat te kudus bukai ngemaik darah domba laki ngau darah anak lembu, tapi ngemaik darah Ya kedirek. Ngau yak Ya bulih kelepasan kekal. ¹³ Empadai antik sidak depecik ngau darah lembu ngau domba laki ngau abu untuk ngudus ke sidak te najis, sidak desuci secara lahir, ¹⁴ betapa lebih darah Kristus, ulih Roh te kekal dah mempersembahkan dirik Ya kedirik ngau Allah sebagai persembahan te ndai cacat, bakal nyuci ke ati nurani kita re pempulah-pempulah te sia-sia, isak kita tau beribadah ngau Allah te idup. ¹⁵ Nyak nyuruh Ya yak pengentara re perjanjian te baru, isak ke sidak te udah dekumai tau nerimak bagian kekal te dah dejan'yi ke, empadai Ya dah mati untuk nebus pelanggaran te dah depulah selamak perjanjian te peruba. ¹⁶ Empadai dini bisik wasiat, diak kalah depadah tentang pemati pemulah wasiat yak. ¹⁷ Empadai wasiat baruk sah kalau pemulah wasiat dah mati, empadai wasiat ndai belaku antik pemulah wasiat gik idup. ¹⁸ Nyak nyuruh, maka perjanjian peruba ndai desah ke ndai ngau darah. ¹⁹ Empadai se'udah Musa madah semua perintah ukum Taurat ngau seluruh umat, ya ngamik darah anak lembu ngau domba laki ngau aik, ngau bulu mirah ngau hisop, udek mecik kitab yak ngau seluruh umat, ²⁰ samil banai: "Tuk mek darah perjanjian te detetap ke Allah bagi kitak." ²¹ Bala kemah ngau semua alat untuk ibadah depecik ya upa yak ngau darah. ²² Ngau semua utai desuci ke menurut ukum Taurat ngau darah, ngau ndai sik pengampunan tik ndai sik tumpah darah. ²³ Jadi semua utai te nan'a (melambang ke) nama te bisik de surga kalah detahir ke upa yak, tapi alat-alat (benda-benda) surgawi ulih persembahan-persembahan te lebih baik repada yak. ²⁴ Empadai Kristus bukai tamak k'alam tempat kudus pempulah jari mensia te cuma gam'ar na re te sebenar, tapi kalam surga untuk ngadap hadirat Allah guna kepenting kita. ²⁵ Ya ndai kulang kalik tamak kiak mempersembahkan dirik, upa Imam Besai setiap taun tamak ke tempat kudus ngau darah te bukai darah dirik ya. ²⁶ Antik upa yak Ya kalah pisit sisa mulai re peruba denia depulah.Tapi pituk Ya cuma sekalik na madah ke dirik, de kebaduk zaman untuk ngapus ke dusa ulih kurban Ya. ²⁷ Ngau upa mensia detetap ke mati sekalik na, udah yak dehakimi, ²⁸ piyak ugak Kristus cuma sekalik na ngurban ke dirik untuk nangung dusa mayuh urang. Udah yak Ya bakal madah ke dirik Ya sekalik agik tampa nangung dusa untuk merik keselamatan ngau sidak te nunguk Ya.