Imam Besai perjanjian baru ¹ Inti re semua te kita panai: kita empu Imam Besai te piak, te duduk de sepiak kanan takhta te Palinbesai de surga, ² ngau te ngelayan ibadah de tempat kudus, alam kemah sejati, te dediri ke Tuhan bukai mensia. ³ Empadai setiap Imam Besai detetap ke untuk mempersembah ke kurban ngau persembahan, nyak nyuruh Yesus perlu bisik utai te depersembahkan. ⁴ Sekira Ya de bumi tuk, Ya sama sekalik ndai bakal jadi imam, empadai dituk dah bisik urang-urang te mempersembahkan persembahan menurut ukum Taurat. ⁵ Pelayanan sidak yak ga'mar ngau bayang nama te bisik de surga, upa te udah depadah ngau Musa, rama ya kak niri ke kemah: "Kingat ke," piak firman Ya, "mih mulah semua yak nunak cuntuh te dah detun'yuk ngau mih datau bukit yak." ⁶ Tapi pituk Ya dah bulih pelayanan te jauh lebih agung, empadai Ya jadi pengentara re perjanjian te lebih mulia, te dedasar ke atas jan'yi te lebih tingik. ⁷ Empadai, sekira perjanjian te peruba yak ndai becacat, ndai bakal degegak agik tempat untuk te kedua. ⁸ Empadai Ya ngerara sidak rama Ya banai: "Benar, bakal datai waktu yak," piaka firman Tuhan, "Aku bakal ngada ke perjanjian baru ngau kaum Israel ngau kaum Yehuda, ⁹ bukai upa perjanjian te udah Kupulah ngau akin inik sidak, rama Aku megai jari sidak, ngemaik sidak keluar re tanah Mesir. Empadai sidak ndai setia ngau perjanjian Aku, ngau Aku ndai nerimak sidak," piak me firman Tuhan. ¹⁰ "Maka tuk me perjanjian te Kupulah ngau kaum Israel se'udah waktu yak," piak me firman Tuhan. "Aku bakal naruh ukum-Ku alam akal budi sidak ngau nulis ke yak alam ati sidak, maka Aku bakal jadi Allah sidak ngau sidak bakal jadi umat-Ku. ¹¹ Ngau sidak ndai bakal ngajar agik ngai sesama sidak, atau ngau menyadik ngau madah: Kelala ke Tuhan! Empadai sidak semua, besai mit bakal ngelala Aku. ¹² Empadai Aku bakal naruh belas kasih teradap kesalah sidak ngau ndai agik ngingat dusa-dusa sidak." ¹³ Empadai Ya banai tentang perjanjian te baru, Ya madah te peruba sebagai perjanjian te udah jadi tua. Ngau nama te dah jadi tuai ngau usang, dah damping ngau kebaduk (kemusnahannya).