Persembahan te sempurna ¹ Dalam ukum Taurat, cuma kemayang na re keselamatan te kak datai, bukai hakekat re keselamatan yak kedirik. Nyak nyuruh ngau kurban te sama, te setiap taun ngau seruntik depersembahkan, ukum Taurat ndai dapat nyempurna ke sidak te datai ngamik bage alam yak. ² Antik sekira mungkin, pesti urang ndai mempersembah ke kurban agik, empadai sidak te mulah ibadah yak ndai sadar agik ke dusa se'udah desuci ke sekalik selamak-selamaknya. ³ Tapi malah ulih kurban-kurban yak setiap taun urang dekingat ke bisik dusa. ⁴ Empadai darah lembu ngau domba jantan ndai patut tau ngaapaus dusa. ⁵ Nyak nyuruh rama Ya tamak ke denia, Ya banai: "Korban ngau persembahan ndai kedekak kitak - tapi kitak dah nyiap ke tubuh bagiku -. ⁶ Ngau korban tunu ngau korban pengapus dusa kitak ndai bekenan. ⁷ Udek Aku banai: Benar, Aku datai; alam gulungan kitab bisik detulis tentang Aku untuk mulah penekak Nuan, ya Allah-Ku." ⁸ Datau Ya banai: "Korban ngau persembahan, korban tunu ngau korban pengapus dosa ndai Nuan kedekak ngau Nuan ndai bekenan ngau yak" - biarpun depersembah ke menurut ukum Taurat -. ⁹ Udek jekuh Ya: "Benar, Aku datai untuk ngereja penekak Nuan." Te peruba dapus Ya, isak negak te kedua. ¹⁰ Ngau empadai penekak Ya tuk me kita dah dekudus ke sekalik untuk selamaknya ulih persembahan tubuh Yesus Kristus. ¹¹ Udek setiap imam mulah tetiap ari pelayanan ngau ngulang-ngulang mempersembah ke korban te sama, te sama sekalik ndai dapat ngapus dusa. ¹² Tapi Ya, se'udah mempersembah ke cuma sekalik kurban na empadai dusa, Ya duduk desepiak kanan Allah untuk selamak-lamaknya, ¹³ ngau pituk Ya cuma nunguk senta, dini munsuh-munsuh Ya bakal dejadi ke penumpu kaki Ya. ¹⁴ Emmpadai ulih sutik kurban na Ya dah nyempurna ke untuk selamak-lamaknya sidak te Ya kudus ke. ¹⁵ Tentang hal yak Roh Kudus merik kesaksian ngau kita, ¹⁶ empadai se'udah Ya befirman: "Tuk me perjanjian te kak Kupulah ngau sidak se'udah waktu yak," Ya befirman ugak: "Aku bakal naruh ukum Ku alam ati sidak, ngau nulis ske yak alam akal budi sidak, ¹⁷ ngau Aku ndai agik ngingat dusa-dusa sidak." ¹⁸ Jadi antik untuk semua yak bisik pengampun, ndaai perlu agik depersembah ke korban empadai dosa. ¹⁹ Jadi, bala menyadik, ulih darah Yesus kita pituk penuh pemerani tau tamak kalam tempat kudus, ²⁰ empadai Ya dah mukak jalai te baru ngau te idup bagi kita ngelalu pancak (tabir), yak Ya, ²¹ ngau kita bisik Imam Besai sebagai kepalak rumah Allah. ²² Nyak nyuruh buh kita ngadap Allah ngau ati te tulus iklas ngau keyakinan iman te teguh, ulih empadai ati kita dah debersih re ati nurani te jaik ngau tubuh kita dah debasuk ngau aik te murni. ²³ Buh kita bepegai teguh ngau pengakuk tentang pengarap kita, empadai Ya te nya'nyi ke yak, setia. ²⁴ Ngau buh kita saling merati ke pangan, isak kita saling nukung alam kasih ngau alam pekerja te baik. ²⁵ Nang kita nyauh ke dirik re petemuan-petemuan ibadah kita, upa te udah depejama sidak, tapi buh kita saling nasehat pangan, ngau semakin giat mulah piak rama dah damping ari Tuhan te kak damping. ²⁶ Empadai antik kita sengaja mulah dusa, se'udah bulih pemenau tentang kebenaran, maka ndai sik agik kurban untuk ngapus dusa yak. ²⁷ Tapi te bisik yak pemati te ngerik re pengukum (penghakiman) ngau api te dahsyat te bakal nunu semua urang neraka. ²⁸ Antik bisik urang te nulak ukum Musa, ya dukum Mati tampa belas kasih atas keterang dua atau tiga urang saksi. ²⁹ Berat bebenar ukum te kalah dejatuk ngau ya, te dah nijak-nijak Anak Allah, te ngangap najis darah perjanjian te ngudus ke ya, ngau te ngehina Roh kasih karunia? ³⁰ Empadai kita ngelala Ya te banai: "Malas yak hak Aku. Aku mek te bakal nuntut pemalasan." Ngau agik: "Tuhan bakal ngakim umatYa." ³¹ Ngerik nar, kalau jatuk kalam jari Allah te idup. ³² Kingat ke masa lalu, udah kitak nerimak terang, kitak mayuh sisa ulih empadai kitak betan alam pejuangan te berat, ³³ baik rama kitak dejadi ke tuntunan ulih cerca ngau penisa, maukpun rama kitak ngamik bage alam penisa sidak te depulah piak ugak. ³⁴ Mimang kitak dah tamai ngamik bage alam penisa urang-urang ukuman ngau rama reta kitak derampas, kitak nerimak hal yak ngau gaga, empadai kitak ketau, kitak bisik reta te lebih baik ngau lebih tetap. ³⁵ Nyak nyuruh nang ngelepas ke kepecayak kitak, empadai besai upah te nunguk yak. ³⁶ Empadai kitak merlu ke ketekunan, isak se'udah kitak mulah penekak Allah, kitak bulih nama te de jan'yi ke yak. ³⁷ "Empadai sikit, sikit nar waktu gik, ngau Ya kak datai, udah kak bisik, ndai ngetan penataiYa. ³⁸ Tapi urang Ku te benar bakal idup ulih iman, ngau antik ya ngun'ur ke dirik, maka Aku ndai bekenan ngau ya." ³⁹ Tapi kita bukai urang-urang te ngun'ur ke dirik ngau benasa, tapi urang-urang te pecayak ngau te bulih idup.