Saksi-saksi iman ¹ Iman yak dasar re semua utai te kita arap ngau bukti re semua utai te ndai kita pedak. ² Empadai ulih iman me dah deberik kesaksian ngau akik inik kita. ³ Empadai iman kita nyaruk, kalau alam semesta dah dejadi ke ulih firman Allah, nyuruh nama te kita pedak dah tejadi re nama te ndai tau kita pedak. ⁴ Empadai iman Habel dah mempesembah ke ngau Allah korban te lebih baik repada kurban Kain. Ngau jalai yak ya bulih kesaksian ngau ya, bahwa ya benar, empadai Allah bekenan ngau persembahan ya yak ngau empadai iman ya yak gik banai, se'udah ya mati. ⁵ Empadai iman Henokh terangkat, isak ya ndai ngasai pemati, ngau ya ndai detemu, empadai Allah dah ngangkat ya. Empadai se'apan ya terangkat, ya bulih kesaksian, bahwa ya bekenan ngau Allah. ⁶ Tapi tik ndai sik iman ndai patut urang bekenan ngau Allah, ya kalah pecayak bahwa Allah bisik, ngau bahwa Allah merik upah ngau urang te bebenar ngegak Ya. ⁷ Empadai iman, maka Nuh - ngau penunyuk Allah tentang nama te pan kenak pedak - ngau taat nyiap ke perau untuk nyelamat ke menyanak ya; ngau empadai iman yak ya ngukum denia, ngau ya detentu ke untuk nerimak kebenar sesuai ngau iman ya. ⁸ Empadai iman Abraham taat, rama ya dekumai untuk angkat ke negeri te bakal deterimak ya jadi empu pusaka ya, udek ya angkat ngau ndai ketau tempat te ya tuju. ⁹ Empadai iman ya nugau de tanah te dejan'yi ke yak sulah-ulah de tanah nyaruh ngau diak ya nugau de kemah ngau Ishak sedua Yakub, te tamai jadi ahli waris jan'yi te sutik yak. ¹⁰ Empadai ya nunguk-nunguk kuta te bisik dasar, te derencana ke ngau depulah ulih Allah. ¹¹ Empadai iman ugak ya ngau Sarah bulih penguat untuk nurun ke anak ucuk, walaupun umur dah ngilah, empadai ya ngangap Ya, te merik jan'yi yak setia. ¹² Nyak nyuruh, maka re sikuk, malah urang te mati pucuk, tepancar kenturun besai, upa bintang de langit ngau keresik de pantai, te ndai angkil ditung. ¹³ Alam iman sidak semua tuk dah mati sebagai urang-urang te ndai bulih nama te dejan'yi ke yak, tapi te cuma medak yak re jauh ngau ngelamai ngau ya ngau ngakuk, bahwa sidak yak penatai de bumi tuk. ¹⁴ Empadai sidak te banai miak madah, bahwa sidak gauk ngegak tanah aik. ¹⁵ Ngau antik sekira alam hal yak sidak kingat tanah asal, te dah sidak dudi, maka sidak bisik kesempatan pulai kiak agik. ¹⁶ Tapi pituk sidak gauk ngau tanah aik te lebih baik, yak mek tanaah aik surgawi. Yak nyuruh Allah ndai malu depadah Allah sidak, empadai Ya dah nyiap ke sigik kota abagi sidak. ¹⁷ Empadai iman maka Abraham, rama ya decuba, mempersembah ke Ishak. Ya, te dah nerimak jan'yi yak, rela mempersembah ke anak tungal ya, ¹⁸ walaupun ngau ya dah depadah: "Kenturun te berasal re Ishak yak mek kenturun mih." ¹⁹ Empadai ya bepikir, bahwa Allah bekuasa ngemangkit ke urang-urang sekalikpun re'entara urang mati. Ngau rin ya sakan-akaan dah nerimak yak agik. ²⁰ Empadai iman maka Ishak, samil medak jauh kedepan , merik berkat ngau Yakub sedua Esau. ²¹ Empadai iman maka Yakub, rama ampir kak mati, merkat kedua anak Yusuf, lalu nyem'ah samil nyanai ngau kepalak tungkat ya. ²² Empadai iman maka Yusuf rama kak mati madah tentang keluar e urang-urang Israel ngau merik pesan tentang tulang belulang ya. ²³ Empadai iman maka Musa, se'udah ya lahir, depelabuk urangtuai ya selamak tiga bulan, empadai sidak medak mata mua ya baik ngau sidak ndai takut ngau perintah raja. ²⁴ Empadai iman maka Musa, udah ya besai ngai depadah ucuk Firaun (anak putri Firaun), ²⁵ empadai ya lebih gaga sisa tamai umat Allah repada sementara miwah re dusa. ²⁶ Ya ngangap penghinaan empadai Kristus sebagai kekaya te lebih besai repada semua reta Mesir, empadai pemedak ya d'arah ke ya ngau upah. ²⁷ Empadai iman maka ya nudi ke Mesir ngau ndai takut ke peluat raja. Ya betan upa ya medak nama te ndai kenak pedak. ²⁸ Empadai iman maka ya mulah Paskah ngau mecik darah, isak pemenasa anak-anak tuai nang neguk sidak. ²⁹ Empadai iman sidak dah ngelintas Laut Merah upa ngelintas tanah rangkai, sedang ke urang-urang Mesir te kak ngelabak ugak, tengelam. ³⁰ Empadai iman maka rubuh ti'muk-ti'muk Yerikho, se'udah kuta yak dekelingik tujuh ari pelamak. ³¹ Empadai iman maka Rahap, inuk kan'yi yak, ndai tamai benasa tamai urang-urang neraka, empadai ya dah nyamut pengintai-pengintai ngau baik. ³² Nama agik te kalah ku telah? Empadai aku bakal kurang waktu, antik ku ngisah ke Gideon, Barak, Simson, Yefta, Daud, Samuel, ngau bala nabi, ³³ te empadai iman dah naluk ke mayuh kerajaan, ngamal ke kebenaran, bulih nama te dejan'yi ke, nutup mulut-mulut singa, ³⁴ madah ke api te nyarung (dahsyat). Sidak dah libas (luput) re mata pedang, bulih kekuatan alam kelemahan, dah jadi kuat alam peperangan, ngau dah maluk mun'ur pasukan-pasukan tentara asing. ³⁵ Inai-inai dah bulih agik urang-urang ya te dah mati empadai debangkit ke. Tapi urang-urang lain bukai ngisak ke dirik desisa ngau ndai kak nerimak pembebasan, isak sidak bulih kebangkitan te lebih baik. ³⁶ Bisik ugak te depejah ngau desisa, malah kedak depetuk ngau depenyara. ³⁷ Sidak desempalung, degergaji, debunuh ngau pedang; sidak aangkat (mengembara) ngau bepengau kulit domba ngau kulit kaming sam'il sisa kekurangan, sesak ngai sisa. ³⁸ Dunia tuk ndai pantas (layak) bagi sidak. Sidak nugau (mengembara) de padang pasir ngau de bukit, alam gua-gua, ngau lebak-lebak bukit. ³⁹ Ngau sidak semua ndai bulih nama te dejan'yi ke yak, sekalikpun iman sidak dah merik ke ngau sidak kesaksian te baik. ⁴⁰ Empadai Allah dah nyiap ke utai te lebih baik bagi kita; ndai sik kita sidak ndai tau datai ngau kesempurnaan.