Nasihat isak betekun alam iman ¹ Empadai kita bisik mayuh bala saksi, upa awan te ngelingik kita, buh kita nangal ke semua beban ngau dosa te ngerintang kita, kita serumak ngau tekun alam lomba te kalah (wajib) bagi kita. ² Buh kita mulah yak ngau mata te tetuju ngau Yesus, te mimpin kita alam iman, ngau te ngemaik iman kita k'alam kesempurnaan, te ngabai ke kehinaan tekun mikul salib ganti pengaga (sukacita) te desiap ke bagi Ya, te pituk duduk desepiak kanan tahta Allah. ³ Kingat ke seruntik Ya te tekun nangung bantah te hebat teradap Ya re pihak urang-urang bedusa, isak nang kitak jadi lemah ngau putus asa. ⁴ Alam pergumulan kitak ngelawan dosa, pan sampai ncucur ke darah. ⁵ Dah kelupa nama kitak nasihat te banai ngau kitak upa banai ngau nemiak: "Ui anakku, nang angap enteng didikan Tuhan, ngau nang putus asa antik kitak dekingat ke Ya; ⁶ empadai Tuhan ngajar urang te dekasih Ya, ngau Ya nyesah urang te dakuk Ya sebagai anak." ⁷ Antik kitak kalah nangung ganjaran; Allah mulah kitak upa anak. Dini bisik anak te ndai dajar ulih apai? ⁸ Tapi antik kitak bibas re ganjaran, te kalah dasai setiap orang, maka kitak bukai anak, tapi anak-anak gampang. ⁹ Udek: re apai kita te sebenar kita bulih ganjaran, ngau sidak kita hurmat; antik piak ndai mek kita kalah lebih taat ngau Apai segala roh, isak kita bulih idup? ¹⁰ Empadai sidak nidik kita alam waktu te panus sesuai ngau upa te sidak angap baik, tapi Ya ngajar kita untuk kebaikan kita, isak kita bulih bage alam kekudusan-Ya. ¹¹ Mimang tiap-tiap ganjaran rama yak deberik ndai natai ke penga'ga tapi penyedih. Tapi udek ya ngasil ke buah kebenaran te merik damai ngau sidak te delatih ulih yak. ¹² Nyak nyuruh kuat ke jari te lemah ngau peletut te guyah; ¹³ ngau gitik ke jalai bagi kaki kitak, isak te jungkak nang teberesuk, tapi jadi semuh. ¹⁴ Berusaha ke idup damai ngau semua urang ngau kejar ke kekudusan, empadai antik ndai kudus, ndai sik urang tau medak Tuhan. ¹⁵ Jaga isak nang sampai bisik urang te nyauh ke dirik re kasih Allah, isak nang tum'uh akar te pait te nim'ul ke rusuh ngau ncemar ke urang mayuh. ¹⁶ Nang sampai bisik urang te jadi cabul atau benafsu upa Esau, te nyual hak anak tuai ya untuk sepingan nasi. ¹⁷ Empadai kitak ketau, bahwa udek, rama ya kak nerimak berkat yak, ya ndai deterimak, empadai ya ndai bulih kesempatan untuk nyemaik kesalah, sekalikpun ya ngegak ngau ncucur ke aik mata. ¹⁸ Empadai kitak ndai datai ngau bukit te tau deteguk, ngau api te bededaur, ngau keleman kajit ngau ribut kayah, ¹⁹ ngau ingan sangkakala ngau ingan te nyuruh sidak te ninga muhun, isak nang agik berauh ngau sidak, ²⁰ empadai sidak ndai tan ninga perintah tuk: "Biar benatang te neguk bukit, ya kalah desempalung ngau batu." ²¹ Ngerik benar pemedak yak, nyuruh Musa banai: "Aku takut bebenar, begetar begitik." ²² Tapi kitak dah datai ke bukit Sion, kuta Allah te idup, Yerusalem surgawi ngau beribu-ribu malaikat, kumpulan te ramai, ²³ ngau jemaat anak-anak tuai, te nama bisik tedaftar de surga, ngau Allah, te ngakim semua urang, ngau roh-roh urang-urang benar te dah jadi sempurna, ²⁴ ngau Yesus, pengentara perjanjian baru, ngau darah pemecik, te banai lebih kayah re darah Habel. ²⁵ Jaga, nang sampai kitak ndai nerimak Ya te befirman. empadai antik sidak, te ndai nerimak Ya te nyampai ke firman Allah de bumi, ndai lepas, apalagik kita, aantik kita bebalik re Ya te banai re surga? ²⁶ Rama yak ingan Ya nguncang ke bumi, tapi pituk Ya merik ke jan'yi: "Sekalik agik, aku bukai cuma nguncang ke bumi na, tapi ngau langit ugak." ²⁷ Ungkapan "Sekalik agik" nunyuk ke perubahan te tau deguncang, empadai yak dejadi ke isak tetap dudi nama te ndai mampu deguncang. ²⁸ Jadi, empadai kita nerimak kerajaan te ndai teguncang ke, buh kita ngucap sukur ngau beribadah ngau Allah menurut cara te bekenan ngau Ya, ngau hormat ngau takut. ²⁹ Empadai Allah kita api te nunu alak (menghaanguskan).