¹ Nyak nyuruh buk kita dudi ke asas-asas peruba re ajaran tentang Kristus, beralih ke perkembangan te penuh. Nanag agik kita ngeletak ke dasar petobatan re pempulah-pempulah te sia-sia, ngau dasar kepercayaan ngau Allah, ² yak me ajaran tentang mayuh pemanik (pembaptisan), penumpangan jari, kebangkitan urang-urang mati ngau ukuman kekal. ³ Yak me kita pulah, antik Allah ngijin. ⁴ Empadai sidak te ati e dah deterang, te suah ngasai karunia surgawi, ngau te suah bulih bagian alam Roh Kudus, ⁵ ngau te ngecap firman te baik re Allah ngau karunia-karunia denia te kak datai, ⁶ tapi te murtad agik, ndak patut depebaru sekalik agik bebenar (sedemikian), isak sidak betubat, empadai sidak nyalib ke agik Anak Allah bagi dirik sidak ngau ngehina-Ya demua urang mayuh. ⁷ Empadai tanah te ngisap aik ujan te rajin jatuk katau ya, ngau ngasil ke pentanam te beguna bagi sidak te ngerja ke yak, bulih berkat re Allah; ⁸ tapi antik tanah yak ngasil ke rampuk durik, ya ndai beguna ngau dah damping ngau kutuk, te bekebaduk ngau penunu (pembakaran). ⁹ Tapi, bala menyadik ku te dekasih, sekalikpun kami banai piyak tentang kitak, kami yakin, kalau kitak bisik ngempu utai te lebih baik, te ngarung keselamatan. ¹⁰ Empadai Allah bukai ndai adil, sampai ngelupa ke pempulah ngau kasih kitak te kitak padah teradap nama Ya ulih pelayanan kitak ngau urang-urang kudus, te agik kitak pulah sampai pituk. ¹¹ Tapi kami kak, isak kitak masing-masing madah nunyuk ke kesang'up te sama untuk nyadi ke pengarapan kitak utai te pesti, sampai ngau kabaduk, ¹² isak nang kitak jadi lungau, tapi nunak sidak te ulih iman ngau penyabar bulih bage alam nama te de jan'yi ke Allah. ¹³ Empadai rama Allah merik ke jan'yi-jan'yi Ya ngau Abraham, Ya besumpah demi dirik Ya, empadai ndai sik urang te lebih tingik repada Ya, ¹⁴ Jekuh Ya: "Aku merik berkat ngau mih belimpah-limpah ngau jadi ke mih mayuh." ¹⁵ Abraham nunguk ngau sabar, nyak nyuruk ya bulih nama te de jan'yi ke ngau ya. ¹⁶ Empadai mensia besumpah demi urang te lebih tingik, ngau sumpah yak jadi pengukuh bagi ya, te bebaduk semua bantah. ¹⁷ Nyak nyuruh, untuk lebih meyakinkan sidak te be'hak nerimak jan'yi kepesti putusan-Ya, Allah dah ngebat dirik-Ya ngau sumpah, ¹⁸ isak ulih dua kenyata te ndai berubah, tentang Allah te ndai patut ngemulak, kita te ngegak pelin'uk, bulih durungan te kuat untuk dapat nyengkau pengarapan te teletak dadap mua kita. ¹⁹ Pengarapan yak me sauh te kuat ngau aman bagi jiwa kita, te delabuh sampai ke belakang langit, ²⁰ diyak Yesus dah tamak sebagai Perintis bagi kita, rama Ya, menurut peraturan Melkisedek, jadi Imam Besai sampai selamak-lamaknya.