¹ Empadai setiap imam besai, te depilih de'ntara mensia, detetap ke bagi mensia alam hubungan sidak ngau Allah, isa ya merik persembahan ngau kurban empadai dusa. ² Ya kalah numut nyaruk urang-urang te jahil ngau urang-urang sesat, empadai ya penuh ngau kelemahan ugak, ³ te kalah merik kurban empadai dusa, bukai cuma bagi umat, tapi bagi dirik ya. ⁴ Ndai sik sikuk pun te ngamik kehormatan yak bagi dirik ya, tapi dekumai untuk yaak ulih Allah, upa te udah tejadi ngau Harun. ⁵ Upa yak ugak Kristus ndai memulia ke dirik Ya kedirik ngau jadi Imam Besai, tapi demulia ke ulih Ya (Allah) te berfirman ngau Ya: "AnakKu Mih! Mih udah kuperanak pada ari tuk", ⁶ upa firman Ya alam nas bukai: "Mih Imam untuk sampai pagi lusak (selama-lamanya), menurut peraturan Melkisedek." ⁷ Alam idup Ya sebagai mensia, Ya dah mempersembah ke doa ngau permohonan ngau ratap sabak, ngau keluhan ngau Ya, te sangup nyelamat ke Ya re maut, ngau empadai kesalehan-Ya, Ia dah didinga ke. ⁸ NGau sekalikpun Ya Anak, Ya dah belajat jadi taat ari nama te udah de derita Ya, ⁹ udah Ya ncapai kesempurnaan Ya, Ya jadi pukuk keselamatan te abadi bagi semua urang te taat ngau Ya, ¹⁰ ngau Ya dukumai jadi Imam Besai ulih Allah, menurut peraturan Melkisedek. Peringatan isak nang murtad ¹¹ Tentang hal yak, mayuh te kalah kami panai, tapi te pedih dejelas ke, empadai kitak lungau alam hal ninga. ¹² Empadai sekalikpun kitak, detin'yau re sudut waktu, udah s'arusnya jadi pengajar, kitak agik perlu dajar ke asas-asas pokok re pemadah (pernyataan) Allah, ngau kitak gik perlu susu, bukai pemakai kering. ¹³ Empadai barangsapa gik merlu susu, ya ndai paham ajaran tentang kebenaran, empadai ya gik anak kecil. ¹⁴ Tapi pemakai kering untuk urang-urang dewasa, te empadai pancaindra te telatih untuk nge'meda ke te baik re te jaik.