Mengenai kaban seiman ¹ Nang kitak keras ngau urang te tuai, tapi rara ya sebagai apai. Rara urang te biak sebagai menyadik, ² inuk te tuai sebagai inai, inuk te biak sebagai menyadik inuk ngau penuh kemurnian. ³ Kitak kalah hurmat ke janda te bebenar janda. ⁴ Tapi antik janda yak bisik anak ucuk, sidak kalah berbakti ngau menyanak direk lau, malas budi urangtuai ngau inik sidak, empadai yak mek te bekenan ngau Allah. ⁵ Sedang ke janda ke idup dedudi ke kedirik, naruh arapan ngau Allah, tekun semayang lawas malam. ⁶ Tapi janda te idup miwah belebih-lebih, ya udah mati selagik idup. ⁷ Ingatke hal tuk ngau janda-janda yak, isak sidak idup ndai becela. ⁸ Tapi antik bisik urang te ndai meliara menyanak, apalagi seisik rumah, urang yak murtad, lebih jaik repada urang te ndai beriman. ¹⁰ Te dedaftar sebagai janda yak urang te berumur ndai kurang re enam puluh taun, te cuma belaki sekalik ⁹ te dah tebukti bepempulah baik, upa ngidup anak, merik tumpangan, nulung urang te sesak - sidak te nguna ke kesempataan ngau bebuat baik. ¹¹ Nang nerimak pendaftaran janda te agik biak. Empadai antik sidak depegaga (digairahkan) ngau utai te nyarak ke sidak re Kristus, sidak ining kawin ¹² ngau ngemungkir kesetiaan sidak ngau Ya, sidak natai ke ukum bagai direk. ¹³ Udah piyak, ngau keluar masuk langkau urang, sidak bejama ke direk lemau, bukai cuma lemau na, tapi melitir ngau nyamcur urusan urang bukai, ngau banai te ndai-ndai pantas. ¹⁴ Maka aku kak isak janda-janda biak yak kawin agik, bisik anak, mimpin rumah tangak, ngau nang merik alasan ngau lawan untuk bejaik nama kita. ¹⁵ Empadai mayuh janda dah sesat tamai Iblis. ¹⁶ Antik bisik bakas inuk te bemenyanak ke janda, tulung am sidak, isak sidak ndai jadi beban jemaat. Isak jemaat tau nulung te bebenar janda. ¹⁷ Penatuai te baik mimpin, tau dehurmat dua kalik lipat, terutama sidak te ngau jerih payah ngajar ngau bekotbah. ¹⁸ Bukai mek Kitab Suci bisik madah: "Nang kitak nganuk mulut lembu te ketengah ngibut," udek "Urang pekerja patut bulih upah." ¹⁹ Nang kitak nerimak sangkak (tuduhan) ngau penatuai, kecuali antik desukung dua tiga urang saksi. ²⁰ Sidak te bebuat dusa, kalah derara depan urang mayuh isak urang bukai takut. ²¹ De depan Allah ngau Kristus Yesus ngau bala malaikat pilihan Ya, kupesan ke bebenar ngau kitak: Cam ke bebenar petunyuk tuk ndai sah ngau prasangkak, ngau besikap (bertindak) alam semua utai ndai sik mangan (memihak). ²² Nang tegesak-tegasu numpang ke jari katau urang, nang tebai'k-bai'k kalam dusa urang bukai. Jaga kemurnian kitak. ²³ Nang agik kitak minum aik mati na, tamah ke anggur sikit, empadai karan perut (pencernaan) tekaru (terganggu) ngau tubuh kitaak rajin lemah. ²⁴ Dusa urang kedak nampak, sakan-akan ngenulau sidak ke pengadilan, tapi dusa urang kedak baruk tampak kedudi ari. ²⁵ Upa yak ugak pempulah baik yak, lansung kenak pedak, ngau antik ndai piyak, ya ndai dapat tepelabuk seruntik.