¹ Semua urang te nangung beban perbudakan, ya kalah ngangap tuan sidak layak bulih penghurmatan, isak nama Allah ngau ajaran kita ndai dujat urang. ² Antik tuan sidak urang te pecayak, nang sampai ya kurang desegan empadai ya menyadik alam Kristus, tapi ya kalah delayan lebih baik agik, empadai tuan te nerimak berkat pelayanan sidak yak menyadik te pecayak ngau te dekasih. ³ Antik bisik urang ngajar te ajaran bukai ndai nunak anai sehat - anai Tuhan kita Yesus Kristus - ngau ndai nurut ajaran te sesuai ngau ibadah kita, ⁴ yaak mek urang te belagak ketau tapi sebenar ya ndai ketau nama-nama. Pemedih ya ngegak-ngegak suaal ngau besilat anai, te nyebab ke dengki, ceriga, fitnah, ⁵ pampuh (percekcokan) dentara urang te ndai bepikir sehat, ngau ayap kebenar, te ngira ibadah yak sumber keuntungan. ⁶ Mimang ibadah yak antik deserta ngau asai cukup, merik keuntungan besai. ⁷ Empadai kita ndai ngemaik nama-nama kalam denia tuk, kita pun ndai dapat ngemaik nama-nama keluar. ⁸ Asal bisik te demakai, depengau cukup me. ⁹ Tapi urang te ining kaya jatuk kalam pencubaan, kalam jerat, mayuh macam nafsu te encelaka ke, te nengelam ke mensia alam benasa. ¹⁰ Empadai akar semua te jaik (kejahatan) yak cinta duit. Empadai ngegak duit yak me urang nyelimpang re iman ngau nisa dirik ngau mayuh macam pemedih (duka). ¹¹ Tapi kitak mensia Allah, tangkis (jauhi) semua yak, kejar ke keadilan, ibadah, kesetiaan, kasih, kesabaran, ngau kelemah lembutan. ¹² Serumak alam ke iman te benar, rebut idup te kekal. Nyak mek nyuruh kitak dekumai, ngau udah dekebat utai te benar dadap mayuh saksi. ¹³ Dadap Allah te merik idup, ngau Kristus Yesus te dah ngebat te benar demua Pontius Pilatus, kuseru ke ngau kitak: ¹⁴ Tunak ke perintah tuk, ngau ndai becacat cela, sampai ari penatai Tuhan Yesus, ¹⁵ saat te detentu Penguasa,Raja datau semua raja, Tuan datau semua tuan. ¹⁶ Cuma Ya te ndai takluk ulih maut, besemayam alam terang te ndai angkil dekampir. Ndai sik urang te suah medak Ya, ngau mimang ndai dapat medak Ya. Bagi Ya mek hurmat ngau kuasa te kekal! Amin. ¹⁷ Kingat ke bala urang kaya de denia tuk isak sidak nang tingik ati, nang ngarap kekaya, tapi kalah ngau Allah te alam kekaya Ya merik ke semua utai ngau kita untuk demakai, depengau. ¹⁸ Paadah ke sidak isak bebuat baik, kaya alam pemaik, rajin merik, bebagi ¹⁹ ngau piyak sidak ngumpul ke reta sebagai dasar te baik bagi sidak untuk idup te sebenar page lusak. ²⁰ Timotius, jaga nama udah depecayak ke ngau mih. Tangkis ke anal bulak te ndai suci ngau te betentang ngau pengetau, ²¹ empadai bisik urang te ngajar ke yak, ngau upa yak dah nyelimpang re iman. Kasih karuniaa nyerta mih!