¹ Iti maikawalo nga aldaw, inayaban ni Moises ni Aaron ken dagiti annakna a lallaki ken dagiti panglakayen iti Israel. ² Kinunana kenni Aaron, "Mangalaka iti urbon a baka manipud iti arban nga agpaay a kas daton a gapu iti basol, ken maysa a kalakian a karnero nga awan mulitna para iti daton a mapuoran, ket idatonmo ida iti sangoanan ni Yahweh. ³ Masapul a makisaritaka kadagiti tattao ti Israel ket ibagam, 'Mangalakayo iti kalakian a kalding para iti daton a gapu iti basol ken maysa nga urbon a baka ken maysa a karnero, agpada a maysa ti tawenna ken awan iti mulitna, a para iti daton a mapuoran; ⁴ mangalakayo pay iti kalakian a baka ken kalakian a karnero para ti daton a pakikapia a maidaton iti sangoanan ni Yahweh, ken daton a bukbukel a nailaok iti lana, gapu ta agparang ni Yahweh kadakayo ita nga aldaw.' " ⁵ Inyegda ngarud dagiti amin nga imbilin ni Moises iti sangoanan ti tolda ti gimong, ken immasideg ti kagimongan ti Israel ken nagtakderda iti sangoanan ni Yahweh. ⁶ Kalpasanna, kinuna ni Moises "Kastoy ti imbilin ni Yahweh nga aramidenyo tapno agparang ti dayagna kadakayo." ⁷ Kinuna ni Moises kenni Aaron, "Umasidegka iti altar ket idatonmo ti daton a gapu iti basolmo ken ti daton a mapuoran, ket mangaramidka iti pangabbong iti basolmo ken kadagiti basbasol dagiti tattao, ken idatonmo ti daton a para kadagiti tattao tapno maabbongan dagiti basolda, a kas imbilin ni Yahweh." ⁸ Isu nga immasideg ni Aaron iti altar ket pinatayna ti urbon a baka a para iti daton a gapu iti basol, a para kenkuana. ⁹ Indatag dagiti annak a lallaki ni Aaron kenkuana ti dara, ket insawsawna ti ramayna iti daytoy ket impulagidna kadagiti sinan-sara iti altar; ken imbuyatna ti dara iti sakaanan ti altar. ¹⁰ Nupay kasta, pinuoranna ti taba, dagiti bekkel, ken ti nangbalkot iti dalem iti rabaw ti altar a kas daton gapu iti basol, kas imbilin ni Yahweh kenni Moises. ¹¹ Ken pinuoranna dagiti karne ken ti lalat iti ruar iti kampo. ¹² Pinatay ni Aaron ti daton a mapuoran, ket inted dagiti annakna a lallaki ti dara kenkuana, nga imbuyatna kadagiti sikigan iti altar. ¹³ Kalpasanna, intedda kenkuana ti daton a mapuoran, a pidapidaso, agraman ti ulo, ket pinuoranna dagitoy iti rabaw ti altar. ¹⁴ Binuggoanna dagiti lalaem ken dagiti luppo ken pinuoranna dagitoy iti rabaw ti daton a mapuoran iti rabaw ti altar. ¹⁵ Indatag ni Aaron ti daton dagiti tattao-maysa a kalding, kalpasanna, innalana daytoy ken pinatayna a kas daton para kadagiti basbasolda; indatonna daytoy gapu iti basol, kas iti inaramidna iti immuna a kalding. ¹⁶ Indatagna ti daton a mapuoran ket indatonna daytoy kas imbilin ni Yahweh. ¹⁷ Indatagna ti daton a bukbukel; nangrakem isuna iti daytoy ken pinuoranna daytoy iti rabaw ti altar, a nainayon iti daton a mapuoran iti agsapa. ¹⁸ Pinatayna pay ti kalakian a baka ken ti kalakian a karnero, ti daton ti pakikapia, a para kadagiti tattao. Inted dagiti annak a lallaki ni Aaron ti dara kenkuana, nga imbuyatna kadagiti sikigan ti altar. ¹⁹ Nupay kasta, ti taba ti kalakian a baka ken ti kalakian a karnero, ti nalukmeg nga ipus, ti taba a nangbalkot iti lalaem, dagiti bekkel, ken ti nangbalkot iti dalem- ²⁰ innalada dagiti paset a narangkay ken imparabawda kadagiti barukong, ket kalpasanna pinuoran ni Aaron ti taba iti rabaw ti altar. ²¹ Intag-ay ni Aaron ti barukong ken ti makannawan a luppo a kas daton a mailili para kenni Yahweh, a kas imbilin ni Moises. ²² Kalpasanna, intag-ay ni Aaron dagiti imana nga agturong kadagiti tattao ket binendissionanna ida; kalpasanna, bimmaba isuna manipud iti nangidatonanna ti daton a gapu iti basol, iti daton a mapuoran, ken iti daton iti pakikapia. ²³ Napan da Moises ken Aaron iti tolda ti gimong, kalapasanna, rimmuarda met laeng ken binendissionanda dagiti tattao, ket nagparang ti dayag ni Yahweh kadagiti amin a tattao. ²⁴ Adda apuy a nagtaud kenni Yahweh ket pinuoranna a naan-anay ti daton a mapuroran ken ti taba iti rabaw ti altar. Idi nakita dagiti amin a tattao daytoy, nagpukkawda ken nagpaklebda.