¹ Nagsao ni Yahweh kenni Moises, kinunana, ² "Ikuyogmo ni Aaron ken dagiti annakna, dagiti kawes ken ti pangpulot a lana, ti kalakian a baka a daton a gapu iti basol, dagiti dua a kalakian a karnero, ken ti basket ti tinapay nga awan lebadurana. ³ Ummongem ti amin a kagimongan iti pagserkan iti tolda ti gimong." ⁴ Inaramid ngarud ni Moises kas imbilin ni Yahweh kenkuana, ket immay a naguummong iti kagimongan iti pagserkan ti tolda ti gimong. ⁵ Kalpasanna, kinuna ni Moises iti kagimongan, "Daytoy ti imbilin ni Yahweh a rumbeng nga aramiden." ⁶ Intugot ni Moises ni Aaron ken dagiti annakna ken binuggoanna isuda iti danum. ⁷ Inkabilna kenni Aaron ti tunika ken inggalotna ti barikes iti siketna, kinawesanna isuna iti kagay ken insuotna ti efod kenkuana, ken kalpasanna, pinairutanna ti efod babaen iti barikes a nasayaat iti pannakaabelna ken inbedbedna kenkuana. ⁸ Inkabilna ti pektoral kenkuana, ken inkapetna ti Urim ken Tummim iti pektoral. ⁹ Inkabilna ti turban iti ulona, ken iti sango ti turban, inkabilna ti balitok a plato, ti nasantoan a korona, kas imbilin ni Yahweh kenkuana. ¹⁰ Innala ni Moises ti pangpulot a lana, ket pinulotanna ti tabernakulo ken amin a banag nga adda iti unegna, ket sinantipikarna ida para kenni Yahweh. ¹¹ Winarsianna ti lana ti altar iti naminpito a daras, ken pinulotanna ti altar ken amin nga alikamenna, ken ti pagbuggoan a palanggana ken ti pagbatayanna, tapno santipikarenna ida para kenni Yahweh. ¹² Imbuyatna ti dadduma a pangpulot a lana iti ulo ni Aaron ken pinulotanna isuna tapno masantipikar isuna. ¹³ Inyeg ni Moises dagiti annak a lallaki ni Aaron ken kinawesanna isuda kadagiti tunika; binarikesanna isuda ken pinutipotanna iti lino a lupot dagiti uloda, kas imbilin ni Yahweh kenkuana. ¹⁴ Innala ni Moises ti kalakian a baka a maidaton a gapu iti basol, ken impatay ni Aaron ken dagiti annakna a lallaki dagiti imada iti ulo ti kalakian a baka nga inyegda a maidaton gapu iti basol. ¹⁵ Pinatayna daytoy, ket innalana ti dara ken impulagidna daytoy iti sinan-sara iti altar babaen iti ramayna, dinalusanna ti altar, imbuyatna ti dara iti puon ti altar, ket inlasinna daytoy para iti Dios tapno mangaramid iti pangabbong para iti daytoy. ¹⁶ Innalana dagiti amin a taba nga adda kadagiti lalaem, ti balkot iti dalem, ken dagiti dua a bekkel ken dagiti tabada, ket pinuoran amin ni Moises dagitoy iti rabaw ti altar. ¹⁷ Ngem ti bulog a baka, ti lalatna, ti karnena ken dagiti rugitna ket pinuoranna iti ruar ti kampo, kas imbilin ni Yahweh kenkuana. ¹⁸ Indatag ni Moises ti kalakian a karnero a para iti daton a mapuoran, ket impatay ni Aaron ken dagiti annakna a lallaki dagiti imada iti ulo ti kalakian a karnero. ¹⁹ Pinatayna daytoy ket imbuyatna ti dara kadagiti sikigan ti altar. ²⁰ Rinangrangkayna ti kalakian a karnero ken pinuoranna ti ulo ken dagiti narangkay ken ti taba. ²¹ Binuggoanna iti danum dagiti lalaem ken saksaka, ket pinuoranna ti sibubukel a kalakian a karnero iti rabaw ti altar. Daytoy ket daton a mapuoran ken nangparnuay iti nabanglo nga ayamuom, maysa a daton a naaramid iti apuy para kenni Yahweh kas imbilin ni Yahweh kenni Moises. ²² Kalpasanna, indatag ni Moises ti maysa pay a kalakian a karnero, ti kalakian a karnero a para iti pannakakonsagrar, ket impatay ni Aaron ken dagiti annakna a lallaki dagiti imada iti ulo iti kalakian a karnero. ²³ Pinatay ni Aaron daytoy, nangala ni Moises iti darana ket impulagidna iti murdong iti makannawan a lapayag ni Aaron, iti makannawan a tangan iti imana, ken iti dakkel a ramay ti makannawan a sakana. ²⁴ Innalana dagiti putot a lallaki ni Aaron, ket impulagidna ti dara kadagiti murdong ti makannawan a lapayagda, iti tangan ti makannawan nga ima ken sakada. Kalpasanna, imbuyat ni Moises ti dara kadagiti sikigan iti altar. ²⁵ Innalana ti taba, ti nalukmeg nga ipus, dagiti amin a taba nga adda kadagiti lalaem, ti balkot iti dalem, ti dua a bekkel ken ti tabada, ken ti makannawan a luppo. ²⁶ Manipud iti basket ti tinapay nga awan ti lebadurana a naidaton iti sangoanan ni Yahweh, nangala isuna iti maysa a tinapay nga awan lebadurana, ken maysa a tinapay a nalanaan, ken maysa a naingpis a tinapay, ket imparabawna dagitoy iti taba ken iti makannawan a luppo. ²⁷ Inkabilna amin dagitoy iti ima ni Aaron ken kadagiti ima dagiti annakna a lallaki, intag-ayda dagitoy iti sangoanan ni Yahweh a kas daton a mailili. ²⁸ Kalpasanna, innala ni Moises dagitoy manipud kadagiti imada ket pinuoranna dagitoy iti rabaw ti altar para iti daton a mapuoran. Dagitoy ket daton ti pannakakonsagrar ken nangparnuay iti nabanglo nga ayamu-om. Daytoy ket daton a naaramid iti apuy kenni Yahweh. ²⁹ Innala ni Moises ti barukong ti ayup ket intag-ayna daytoy a kas daton a mailili kenni Yahweh. Daytoy ti bingay ni Moises iti kalakian a karnero para iti pannakadutok dagiti papadi, kas imbilin ni Yahweh kenkuana. ³⁰ Nangala ni Moises iti bassit a pangpulot a lana ken dara nga adda iti rabaw ti altar; inwarsina dagitoy kenni Aaron, kadagiti kawesna, kadagiti annakna, ken kadagiti kawes dagiti annakna a kaduana. Iti kastoy a wagas sinantipikarna ni Aaron ken dagiti kawesna, ken dagiti annakna ken dagiti kawkawesda kenni Yahweh. ³¹ Ket ni Moises kinunana kenni Aaron ken kadagti annakna a lallaki, "Lingtaenyo ti karne iti pagserkan ti tolda ti gimong, ket kanenyo sadiay dagitoy agraman ti tinapay nga adda iti basket iti pannakakonsagrar, kas imbilinko, kinunana, 'Kanen daytoy ni Aaron ken dagiti annakna a lallaki.' ³² Ti aniaman a matda iti karne ken iti tinapay ket masapul a puoranyo. ³³ Ken masapul a saankayo a pumanaw iti pagserkan ti tolda ti gimong iti pito nga aldaw, inggana iti aldaw a malpas ti pannakakonsagraryo. Ta konsagrarannakayo ni Yahweh iti uneg iti pito nga aldaw. ³⁴ Ti naaramid ita nga aldaw - ket imbilin ni Yahweh a maaramid tapno tapno mangaramid ti pangabbong dagiti para kadakayo. ³⁵ Agtalinaedkayo iti aldaw ken rabii iti las-ud iti pito nga aldaw idiay pagserkan ti tolda ti gimong, ken salimetmetanyo ti bilin ni Yahweh, tapno saankayo a matay, gapu ta daytoy ti naibilin kaniak." ³⁶ Inaramid ngarud ni Aaron ken dagiti annakna a lallaki dagiti amin a banag nga imbilin ni Yahweh kadakuada babaen kenni Moises.