¹ Innala ni Nadab ken Abiu, annak a lallaki ni Aaron, ti saggaysada a paginsiensuan, nangpasgedda iti apuy iti daytoy, ken inikkanda daytoy iti insenso. Kalpasanna, nangidatonda iti apuy a saan a naanamongan iti sangoanan ni Yahweh, a saanna nga imbilin kadakuada nga idatonda. ² Isu nga adda timmaud nga apuy manipud iti sangoanan ni Yahweh ket pinuoranna ida, ket natayda iti sangoanan ni Yahweh. ³ Ket kinuna ni Moises kenni Aaron, "Daytoy ti sarsaritaen ni Yahweh idi imbagana, "Ipakitakto ti kinasantok kadagiti umasideg kaniak. Maitan-okakto iti sangoanan dagiti amin a tattao.'" ⁴ Inayaban ni Moises ni Misael ken ni Elisafan, dagiti annak a lallaki ni Uzziel nga uliteg ni Aaron, ket kinunana kadakuada, "Umaykayo ditoy ket iruaryo dagiti kakabsatyo a lallaki iti kampo manipud iti sangoanan ti tabernakulo." ⁵ Isu nga immasidegda ket inawit ken inruarda ida iti kampo, a nakakawes pay laeng iti tunika ti kinapadi, a kas imbilin ni Moises. ⁶ Kalpasanna, kinuna ni Moises kenni Aaron ken kadagiti annakna a lallaki a da Eleazar ken Itamar, "Saanyo nga iwakray dagiti buok dagiti uloyo, ken saanyo a pigisen dagiti badoyo, tapno saankayo a matay, ken tapno saan a makaunget ni Yahweh iti kagimongan. Ngem palubosanyo dagiti kakabagianyo, dagiti amin nga agnanaed iti Israel, nga agladingit para kadagidiay a pinuoran ti apuy ni Yahweh. ⁷ Masapul a saankayo a rumuar iti pagserkan ti tolda ti gimong, ta no aramidenyo dayta ket mataykayo, ta adda kadakayo ti pangpulot a lana ni Yahweh." Inaramidda ngarud dagiti imbilin ni Moises. ⁸ Nakisao ni Yahweh kenni Aaron, kinunana, ⁹ "Saanka nga uminom ti arak wenno iti naingel a mainom, sika, ken dagiti annakmo a lallaki a nabati a kaduam no sumrekkayo iti tolda ti gimong tapno saankayo a matay. Agnanayonto daytoy nga alagaden iti amin a kaputotanyo, ¹⁰ tapno mailasin ti nagdumaan ti nasantoan ken ti kadawyan, ken ti nagdumaan ti narugit ken nadalus, ¹¹ tapno maisurom kadagiti tattao ti Israel dagiti amin nga alagaden nga imbilin ni Yahweh babaen kenni Moises." ¹² Nakisao ni Moises kenni Aaron, ken kadagiti nabati nga annakna a lallaki a da Eleazar ken Itamar, "Alaenyo dagiti natda a daton a bukbukel manipud kadagiti daton kenni Yahweh a naaramid iti apuy, ken kanenyo daytoy nga awan ti lebadurana iti abay ti altar, gapu ta daytoy ket kasasantoan. ¹³ Masapul a kanenyo daytoy iti nasantoan a disso, gapu ta daytoy ti bingaymo ken dagiti annakmo a lallaki manipud iti daton kenni Yahweh a naaramid iti apuy, ta daytoy ti naibilin kaniak nga ibagak kadakayo. ¹⁴ Kas ti barukong nga daton a mailili ken ti luppo a naidatag - masapul a kanenyo dagitoy iti nadalus a lugar, sika ken dagiti annakmo a lallaki ken babbai a kaduam ket masapul a kanenyo dagitoy a paset, ta naited dagitoy a kas bingaymo ken dagiti annakmo a lallaki manipud kadagiti daton ti panagkakadua dagiti tattao iti Israel. ¹⁵ Kas iti luppo a naidatag ken ti barukong nga daton a mailili, masapul nga iyegda agraman dagiti daton a taba a naaramid iti apuy a kas daton a mailili iti sangoanan ni Yahweh. Kukuayo dagitoy ken dagiti annakmo a lallaki a kaduam a kas bingayyo iti agnanayon, kas imbilin ni Yahweh." ¹⁶ Kalpasanna, sinaludsod ni Moises ti maipapan iti kalding a daton para iti basol, ket nasarakanna a napuoranen daytoy. Isu a nakaunget isuna kenni Eleazar ken Itamar, dagiti nabati nga annak a lallaki ni Aaron; kinunana, ¹⁷ "Apay a saanyo a kinnan ti daton a para iti basol iti disso ti tabernakulo, agsipud ta daytoy ket kasasantoan, ken agsipud ta inted ni Yahweh daytoy kadakayo a mangikkat ti nadagsen a basol ti kagimongan, a mangaramid iti pangabbong kadagiti basbasolda iti sangoananna? ¹⁸ Kitaenyo, saan a naiyeg ti dara ti kalding iti uneg ti tabernakulo, isu a rumbeng koma a kinnanyo daytoy iti disso ti tabernakulo, kas imbilinko." ¹⁹ Kalpasanna, simmungbat ni Aaron kenni Moises, "Kitaem, ita nga aldaw, inaramidda ti daton para iti basolda ken ti daton a mapuoran iti sangoanan ni Yahweh, ket napasamak daytoy a banag kaniak ita nga aldaw. No kinnanko ti daton para iti basol ita nga aldaw, nakaay-ayo ngata daytoy iti imatang ni Yahweh?" ²⁰ Idi nangngeg ni Moises dayta, napnek isuna.