¹ Nakisao ni Yahweh kada Moises ken ni Aaron, kinunana, ² "Makisaritakayo kadagiti tattao iti Israel, ibagayo, 'Dagitoy dagiti sibibiag a banbanag a mabalinyo a kanen kadagiti amin nga ay-ayup nga adda iti daga. ³ Mabalinyo a kanen ti aniaman nga ayup nga addaan iti napisi a kuko ken agngatngatingat. ⁴ Nupay kasta, adda dagiti dadduma nga ayup a mabalin nga agngatngatingat wenno addaan iti napisi a kuko, ket masapul a saanyo a kanen dagitoy, dagiti ayup a kas iti kamelio, gapu ta agngatngatingat daytoy ngem saan a napisi ti kukona. Isu a narugit ti kamelio para kadakayo. ⁵ Uray pay ti koneho iti kabatuan: gapu ta agngatngatingat daytoy ngem saan a napisi ti kukona, narugit met laeng daytoy para kadakayo. ⁶ Ti koneho: gapu ta agngatngatingat daytoy ngem saan a napisi ti kukona, narugit daytoy para kadakayo. ⁷ Ti baboy: uray no napisi ti kukona, saan nga agngatngatingat daytoy, isu a narugit daytoy para kadakayo. ⁸ Masapul a saanyo a kanen iti aniaman a karneda wenno sagiden dagiti natay a bagida. Narugit dagitoy para kadakayo. ⁹ Dagiti ayup nga agnanaed iti danum a mabalinyo a kanen ket dagiti amin nga addaan iti pigar ken siksik, iti baybay man wenno kadagiti karayan. ¹⁰ Ngem amin a sibibiag a parsua nga awanan iti pigar ken siksik nga adda iti baybay wenno kadagiti karayan, agraman dagiti amin nga agkutkuti iti danum ken amin nga sibibiag a parsua nga adda iti danum - masapul a karimonyo dagitoy. ¹¹ Agsipud ta karimonyo dagitoy, masapul a saankayo a mangan kadagiti karneda, ken masapul a karugityo dagiti natay a bagida. ¹² Aniaman nga adda iti danum nga awanan iti pigar ken siksik ket masapul a karimonyo. ¹³ Adtoy dagiti billit a karimonyo ken saanyo a kanen gapu ta makarimonda; ti agila, ti buitre, ¹⁴ ti kullaaw, aniaman a kita ti pelikano, ¹⁵ amin a kita ti uwak, ¹⁶ ti saraan a puwek ken ti agariwawa a puwek, ti agila ti taaw, ken amin nga kita ti kali. ¹⁷ Masapul pay a karimonyo ti bassit a puwek ken ti dakkel a puwek, ti kalamon, ¹⁸ ti puraw a puwek ken ti puwek ti kamalig, dagiti dadduma pay a puwek, ¹⁹ ti tikbaboy, aniaman a kita ti kannaway, ti abublia ken uray ti panniki. ²⁰ Amin a tumatayab nga insekto a magmagna babaen kadagiti uppat a sakada ket masapul a karimontyo. ²¹ Ngem mabalinyo a kanen ti aniaman kadagiti tumatayab nga insekto a magmagna met laeng babaen kadagiti uppat a sakada no adda ti luppoda, nga isu paglagtoda iti daga. ²² Ken mabalinyo met a kanen ti aniaman a kita ti dudon ken kuriat wenno pandudon. ²³ Ngem masapul a karimonyo dagiti amin a tumatayab nga insekto nga addaan iti uppat a saka. ²⁴ Pagbalinen dakayo a narugit dagitoy nga ayup agingga iti rabii no sagidenyo ti natay a bagi ti maysa kadakuada. ²⁵ Ken ti siasinoman a mangpidut iti maysa kadagiti natay a bagida ket masapul a labaanna dagiti kawesna ken agtalinaed a narugit agingga iti rabii. ²⁶ Amin nga ayup nga addaan iti napisi a kuko a saan a naan-anay ti pannakapisina wenno saan nga agngatngatingat ket narugit para kadakayo. Agbalin a narugit ti tunggal maysa a mangsagid kadakuada. ²⁷ Aniaman a magmagna babaen iti sakada nga adda pangkaramutna kadagiti amin nga ayup a magmagna iti uppat a saka, narugit dagitoy para kadakayo. Siasinoman a mangsagid iti kasta a natay a bagi ket agtalinaed a narugit agingga iti rabii. ²⁸ Ken ti siasinoman a mangpidut iti kasta a natay a bagi ket masapul a labaanna dagiti kawesna ken agtalinaed a narugit agingga iti rabii. Narugit dagitoy nga ay-ayup para kadakayo. ²⁹ Kadagiti ayup nga agkarkarayam iti daga, dagitoy dagiti ayup a narugit para kadakayo; ti sangyo, ti utot, amin a kita ti banias, ³⁰ ti tuko, ti alibut, ti alutiit, ti alutiit ti darat, ken ti bannagaw. ³¹ Kadagiti amin nga ayup nga agkarkarayam, dagitoy dagiti ayup a narugit para kadakayo. Siasinoman a mangsagid kadagitoy no natayda ket agbalin a narugit agingga iti rabii. ³² Ken no matay ti aniaman kadakuada ket matinnag daytoy iti aniaman a banag, dayta a banag ket agbalin a narugit, naaramid man dayta iti kayo, lupot, lalat wenno nakirsang a lupot. Aniaman dayta ken aniaman ti pakaus-usaranna, masapul maikabil iti danum; agbalin a narugit daytoy agingga iti rabii. Kalpasanna, agbalinton daytoy a nadalus. ³³ Iti tunggal banga a matinnagan iti aniaman a narugit nga ayup, aniaman nga adda iti banga ket agbalin a narugit, ken masapul a burakenyo dayta a banga. ³⁴ Amin a makan a nadalus ken mapalubosan a kanen, ngem no natedtedan dagitoy iti danum manipud iti narugit a banga, agbalinton a narugit. Ken amin a mabalin nga inumen nga adda iti kasta a banga ket agbalin a narugit. ³⁵ Amin a banag a matinnagan iti paset ti natay a bagi ti narugit nga ayup ket agbalinton a narugit, iti urnu man wenno kadagiti paglutuan a banga. Masapul a buraken dagitoy. Narugit dagitoy ken agtalinaedda a narugit para kadakayo. ³⁶ Ti ubbog wenno dakkel a burnay a pagurnongan iti danum ket agtalinaed a nadalus, ngem ti siasinoman a mangsagid iti natay a bagi agbalin isuna a narugit. ³⁷ No matinnag ti aniaman a paset ti natay a bagi kadagiti bukel a maimula, dagitoy a bukbukel ket nadalus latta. ³⁸ Ngem no naikkan iti danum dagiti bukel, ken no aniaman a paset ti natay a bagi ti matinnag kadakuada, ket agbalindanton a narugit para kadakayo. ³⁹ No matay ti aniaman nga ayup a mabalinyo a kanen, ket ti mangsagid iti natay a bagi ket agbalin a narugit agingga iti rabii. ⁴⁰ Ken no siasinoman ti mangan iti dayta a natay a bagi ket masapul a labaanna dagiti kawesna ken agtalinaed a narugit agingga iti rabii. Ken siasinoman a mangpidut iti kasta a natay a bagi ket labaanna dagiti kawesna ken agtalinaed a narugit agingga iti rabii. ⁴¹ Amin nga ayup nga agkarkarayam iti daga ket masapul a karimonyo, saan a makan dagitoy. ⁴² Aniaman nga agkarayam iti buksitna, ken aniaman a magna babaen kadagiti uppat a saka, wenno aniaman nga addaan iti adu a saka - amin nga ayup nga agkarkarayam iti daga, masapul a saanyo a kanen dagitoy, ta makarimon dagitoy. ⁴³ Masapul a saanyo nga aramiden a narugit dagiti bagbagiyo kadagiti aniaman a sibibiag a parsua nga agkarkarayam; masapul a saanyo nga aramiden a narugit dagiti bagbagiyo babaen kadagitoy, ken masapul nga saan kayo a maparugit babaen kadakuada. ⁴⁴ Ta Siak, ni Yahweh a Diosyo. Ngarud idatonyo dagiti bagbagiyo kaniak ken agbalinkayo a nasatoan gapu ta nasantoanak. Saanyo koma a rugitan dagiti bagbagiyo babaen kadagiti amin a kita ti ayup nga agkutkuti ditoy daga. ⁴⁵ Ta siak ni Yahweh, a nangiruar kadakayo manipud iti daga ti Egipto, nga agbalin a Diosyo. Masapul ngarud nga agbalin kayo a nasantoan, ta nasantoanak. ⁴⁶ Daytoy ti linteg maipapan kadagiti ayup, kadagiti billit, kadagiti amin a sibibiag a parsua nga agkutkuti kadagiti danum ken kadagiti amin a parsua nga agkakarayam iti daga, ⁴⁷ ta kadagitoy ket maaramid ti pagiddiatan iti nagbaetan ti narugit ken nadalus, ken ti nagbaetan dagiti sibibiag a parsua a mabalin a kanen ken dagiti sibibiag a parsua a saan a mabalin a kanen.'"