¹ Чолларга таъна қилмагин, лекин уларга худди отангга гапиргандек насиҳат қилгин. Ёшларга укаларингга гапиргандек, ² кампирларга онангга гапиргандек муомала қилгин, ёш қизларга бутун поклик билан сингилларингга гапиргандек насиҳат қилгин. ³ Беваларни, яъни ҳақиқий беваларни ҳурмат қилгин. ⁴ Лекин бирор беванинг фарзандлари ёки набиралари бўлса, унда улар аввал ўз оиласини ҳурмат қилишни ва ота-оналарига тегишли ҳақларини беришни ўргансинлар, чунки бу Худога маъқулдир. ⁵ Ёлғиз қолган ҳақиқий бева Худога умид қилиб, туну кунни ибодат ва илтижо билан ўтказади. ⁶ Кайф-сафога интиладигани эса тириклигида ўликдир. ⁷ Улар бенуқсон бўлишлари учун бу нарсаларни уларга уқтиргин. ⁸ Агар кимдир ўзиникилар ҳақида, айниқса, ўз хонадони ҳақида ғамхўрлик қилмаса, у имондан воз кечган бўлади ва имонсиз одамдан ҳам баттардир. ⁹ Рўйхатга киритиладиган бева аёлнинг ёши олтмишдан кам бўлмасдан, бир эркакнинг хотини бўлган бўлиши керак. ¹⁰ У эзгу ишлари билан машҳур, болаларини яхши тарбиялаган, мусофирларни қабул қилган, муқаддасларнинг оёқларини ювган, азоб чекканларга ёрдам берган ва ҳар қандай хайрли ишларни қилишга астойдил бағишланган бўлиши керак. ¹¹ Ёш беваларни эса рўйхатга қабул қилма, чунки улар Масиҳга хилоф равишда шаҳватга берилиб, эрга тегишни истайдилар. ¹² Улар маҳкумликка лойиқдирлар, чунки аввалги имонни рад қилдилар. ¹³ Бунинг устига, улар уйма-уй саёқ юриб, бекорчи бўлишни ўрганадилар ва нафақат бекорчи, балки сафсатабоз, бошқаларнинг ҳаётига бурнини суқадиган ва керак бўлмаган нарсаларни гапирадиган бўлиб қоладилар. ¹⁴ Шунинг учун ёш бевалар турмушга чиқиб, бола туғишларини, рўзғорларини бошқаришларини ва душманнинг ғийбат қилишига ҳеч қандай имкон бермасликларини мен хоҳлайман. ¹⁵ Чунки баъзилар аллақачон шайтонга эргашиб, йўлдан озиб кетганлар. ¹⁶ Агар бирон имонли эркак ёки аёлнинг бева қариндошлари бўлса, унда унинг ўзи уларга ғамхўрлик қилиши керак. Жамоатга эса уларни юкламаслиги керак, токи Жамоат ҳақиқий беваларга ёрдам бера олсин. ¹⁷ Яхши бошчилик қилаётган, айниқса, Сўзни воизлик қилишда ва таълим беришда меҳнат қилаётган жамоабошилар икки баробар кўп ҳурматга лойиқ ҳисоблансинлар. ¹⁸ Чунки Ёзув: “Янчаётган ҳўкизнинг оғзини тўсма” ва “меҳнаткаш ўз мукофотига сазовор”,- демоқда. ¹⁹ Жамоабошиларга қўйилган айбни икки ёки уч гувоҳ бўлмаса, қабул қилмагин. ²⁰ Гуноҳ қилиб юрганларни эса ҳамманинг олдида фош қилгин, токи бошқалар ҳам қўрқишсин. ²¹ Худо ва Раббий Исо Масиҳ ҳамда танланган фаришталар олдида сени қаттиқ огоҳлантираман: ҳеч бир нарсада юз-хотирчилик ва тарафдорчилик қилмай, буларга риоя қилгин. ²² Ҳеч кимга қўлингни шошилинч қўймагин ва бошқаларнинг гуноҳларига шерик бўлмагин. Ўзингни пок сақлагин. ²³ Энди фақатгина сув ичма, балки ошқозонинг ва тез-тез бўлиб турадиган касалликларинг учун озгина шароб ҳам ичиб тургин. ²⁴ Баъзи одамларнинг гуноҳлари ошкордир ва тўғридан-тўғри маҳкумликка олиб боради, баъзиларнинг гуноҳлари эса кейинроқ маълум бўлади. ²⁵ Худди шундай яхши ишлар ҳам ошкордир, агарда шундай бўлмаса ҳам, яширин бўлиб қола олмайди.